Данъян пул вылэ Вань удмуртъёслэн «Удмурт Кенеш» огазеяськонзы пыриз
05.11.2026 · Иворъёс · Наталья Ямщикова

Россиысь калыкъёслэн огазеяськон нуналзы но Удмуртилэн кунлык басьтон нуналэз азьын, Удмуртилэн тӧроезлэсь ужзэ огдырлы быдэсъясь Ольга Абрамова кун приём ортчытӥз. Отын улосвыл Данъян пул вылэ пыртэм адямиосты но коллективъёсты сӥлы каризы.
Данъян пул вылэ Вань удмуртъёслэн «Удмурт Кенеш» огазеяськонзы пыриз!
«Со туннэ кенешчиослэн гинэ данъетсы ӧвӧл, со - вань 35 ар ӵоже тыршем адямиослэн, быдэс удмурт калыклэн данъетэз. «Удмурт Кенеш» вань удмуртъёсты огазея. Вань ужмы лэсьтӥське удмурт калык понна, удмуртлык понна, удмурт лулчеберетмы но кылмы понна», - пусйиз огазеяськонлэн Тӧроез Андрей Ураськин.
Пумиськонын элькунлэсь дано кунмуртъёсызлэсь нимъёссэс шараязы. Соос пӧлын огазеяськонлэн азьвыл Тӧроез, ас вакытаз Удмуртилэн Кун Кенешеныз кивалтэм мурт Игорь Семёнов но тодосчи, педагогикая наукаосъя кандидат Зоя Суворова.
Озьы ик кун премиез басьтӥсьёсты данъязы. Искусство но литература удысын премиен пусъемын Удмурт Элькунлэн дано кунмуртэз, писатель Михаил Атаманов но удмурт кылын шонер гожъяськонъя кыллюкамез кылдытӥсьёслэн коллективзы - Историяя, кылъя но литературая Удмурт институтысь кылтодонэз эскеронъя ёзысь лингвистъёс Сергей Максимов, Татьяна Душенкова, Удмурт кун университетысь дышетӥсьёс Мира Самарова, Надежда Тимерханова.