Удмурт кыллэн нуналэзлы тупатэм ужрадъёс ортчо Удмуртиын

18.11.2026 · Иворъёс · Наталья Ямщикова

Удмурт кыллэн нуналэзлы тупатэм ужрадъёс ортчо Удмуртиын

18-28 шуркынмонэ Удмуртиын Удмурт кыллэн нуналэзлы тупатэм ужрадъёс ортчо. Со сярысь улосвыл тӧролэн но кивалтэтлэн пресс-службазы ивортӥз.

27-тӥ шуркынмонозь Калыкъёслэн эшъяськон юртсы «КылГур» онлайн-марафон (0+) но нылпи садэ ветлӥсь 5-7 аресъем пиналъёслы удмурт кылын произведениосты шара лыдӟонъя «Анай кыл – луллэн кылыз» онлайн-вожвылъяськон (6+) радъя.

26-тӥ шуркынмонэ Ижкарын «Этнокультурное образование Удмуртии: единство традиций и инновация в полиэтническом пространстве России» огъяросси тодос но дышетон форум (18+) ортчоз.

27-тӥ шуркынмонэ Йӧскалык лыдӟиськонниын нылпиослы произведениосын «Кузьыли муӵ» антологиен (6+) тодматон ортчоз.

Со нуналэ ик Татарстанысь Кукмор ёросысь Нӧръя черкогуртын удмурт лулчеберетлэн нуналэз (12+) ортчоз, кытсы Удмуртиысь делегация вуылоз. Со улсын пленарной пукет, мастер-классъёс, удмурт калыклэсь лулчеберетсэ, йылолъёссэ но кылзэ утёнлы но азинтонлы сӥзем стратегической сессия. Программа Удмуртиысь калык кырӟанъя но эктонъя «Айкай» кун театрлэн концертэныз йылпумъяськоз. Та выллем ужрадъёс радъясько мукет улосвылъёсын но, кытын удмуртъёс уло.

ИА «Удмуртия» ивортэмъя