Ижкарысь Октябрь ёрос кенеш но ортчытӥз конференцизэ
11.11.2026 · Иворъёс · Наталья Ямщикова

Ижкарысь Октябрь ёрос кенеш но ортчытӥз конференцизэ. Солэн активаз 60 пала улосчиос пыро. Ижкарысь Ф. Васильев нимо библиотекае вуылӥзы 40 пала ёзчиос. Соос пӧлын шаермылы тодмо адямиос: «Удмурт Кенешлэн» Тӧроез А.И. Ураськин, калык поэт В.Н. Ившин, «Мынам Удмуртие» ТРК-ысь кивалтӥсьлэн воштӥсез С.А.Касаткин, «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн кивалтӥсез Е.В. Миннигараева но мукет.
Ёрос кенешен кивалтӥсь В.М. Ившина тупен-тупен пыр-поч анализ лэсьтӥз берло отчёт вакытэ тыршемзы сярысь. Нош ужрадзэс усто усьтыны юрттӥз В.Н. Ившин, «Удмурт Кенешлы», «Анай кыл», «Флор Васильевлы» кылбуръёссэ лыдӟыса.
Аслаз докладаз В.М. Ившина пусйиз:
«Ужпӧрмы 4 ӧрлы люкиськыса арысь аре радьяське. Бадӟым Кенешмылэн липет улаз но соин валче. Кузебай Гердлы но Ашальчи Окилы сӥзем лыдзонъёс, «Гербер» ужрадъёс, Элькунмылэн нуналаз удмурт шаермес кылдытӥсьёсмес Буре ваен акциос, Вормон нуналэ Ялан ӝуась тыл дорын йыбырттон, Бадӟым Удмурт Диктант но Вормонлы сӥзем диктант - соос ваньзы планамы пусъемын луо. Город но Октябрь ёрос Администрациосын кусыпъёс - со мукетыз ужан ӧрмы. Бадӟым инты басьтэ Ижкар кенешчиосын огазе огкылысь тупаса тыршон удысмы. «Удмурт Кенеш» юрттэмъя «Ижкар Гербер», «Выль», «Тол келян», но «Горд берекет» ужрадъёс зэмос йылололлы пӧрмизы ини. Октябрь ёросмы котькуд аре отчы маке выльзэ ӵектэ: мастер-классъёс, емышъёслэсь пӧртэм композициос, табань пыжон но мукет». Шулдыр ортчыло паркез сузян огъя субботникъёс. Но вань на ёросмылэн гинэ, чылкак аслаз ужъёсыз. Трос аръёс ӵоже ини ужмылэн шорсюлэмыз луэ нылпи садъёсын, школаосын валче ужан. 284-тӥ, 112 -тӥ номеро нылпи садъёс, 70-тӥ, 11-тӥ номеро школаосын тыршиськом удмуртлыкмес вырӟытыны-азинтыны. Юн кусыпъёсмы утисько Ф. Васильев нимо библиотекаен. Удмурт кылэз азинтыны тыршон удысмы - проектъёс бордын ужан. Та одӥгез шӧдскымон ӧрмы шуыны луоз. Со сяна, туж шунытэсь кусыпъёс «Тюрагай» калык ансамблен тупатэмын".
Конференциын вераськиз, усто дунъет сётӥз но Таукаронъёс кузьмаз А.И. Ураськин. Прениосын вераськизы Ф.Васильев нимо библиотекалэн кивалтӥсез Е.Г. Пономарева Е.Г., «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн тӧроез Е.В.Миннигараева. Удмурт кун аграрной университетысь доцент П.В. Антонов тунсыко ӵектонъёссэ вераз университетысь удмурт студентъёсын но трос удмурт педагогъёсын ужан луоноыкъёс сярысь.
В.М. Ившина вераськонзэ йылпумъяса, тау кариз Правлениезлы но активистъёсызлы такема аръёс ӵоже ужамзы понна. Собере пусйиз на, та ортчем дыр ӵоже будӥзы но юнмазы егит ёрос кенеш ёзчиос. Выль тӧрое быръемын солэн ӵектэмезъя Н.П. Леонтьева - 284-тӥ нылпи садысь визьнодась. Ӟечкыласьком бадӟым осконэн!
Сюлмысь тау кариськом В.М. Ившиналы! Со 2015-тӥ арысен «Удмурт Кенеш» огазеяськонмылэн Ижкарысь Октябрь ёрос ёзэтэныз кивалтӥз.
Ивор «Удмурт Кенешлэн» огинысьтыз