Удмуртиысь кык нылмуртъёс «Краса студенчества Финно-Угрии – 2026» вожвылъяськонэ пырисько

Удмурт кун университетысь но Глазкарысь В. Г. Короленко нимо инженерно-педагогической университетысь студентъёс Юлия Главатских но Ольга Атаманова «Краса студенчества Финно-Угрии – 2026» XIII калыккуспо вожвылъяськонэ пырисько. Ужрад элькунлэн уйпал шоркараз ортче.

Ольга Атаманова нырысетӥ курсысен нылмурт университетысь кырӟанъя школае ветлэ, сцена вылын кырӟа. Со сяна, кылбуръёс гожъя, кудъёсыз ӵемысь кырӟанъёслы пӧрмо. Удмуртк ылын нырысетӥ крыӟанзэ 10-тӥ классын дышетскыкуз гожтӥз. Ольга Атаманова – вуоно дышетӥсь. Валтӥсь ужпумез – нылпиослы устолыкез яратонэз пыӵатыны, сое валаны но отысь астэ шедьтыны юрттыны. Озьы ик «Южный ветер» педагогической отрядэ пыриське. Котькуд гужем со лагерьын вожатой луыса ужа. 2026-тӥ арын Ольга Россиысь студентъёслэн отрядъёссылэн крезьгуръя «В СМЫСЛЕ» продюсер ӵектосазы пыриськиз. Шуркынмонэ нылмурт студенческой отрядъёслэн огъяросси слётазы аслэсьтыз кырӟанзэ быдэстоз.

Юлия Главатских удмурт кылэз утён но вӧлмытон понна мыло-кыдо тырше. Нылмурт анай кылын кылбуръёс но кырӟанъёс гожъя. Озьы ик со «Удмурт нылкышно кенеш» огазеяськонлэн ёзчиез луэ. Юлия понна кыл ужан тӥрлык луиз. Со Удмуртиысь Кун Кенешын доклад лэсьтӥз, пӧртэм форумъёсы пыриське, финн-угор площадкаосын кырӟа, материалъёссэ удмурт но бускель калыкъёслэн газетъёсазы но изданиосазы келя. Вожвылъяськон Удмуртиын нырысьсэ радъяське. «Краса студенчества Финно-Угрии» ним понна тямыс нылашъёс нюръяськозы.

Ужрад улсын чеберайёс пресс-конференцие пыриськозы, вылӥ дышетсконнилэн видеовизиткаеныз тодматозы, йӧскалык дӥсьсэс возьматозы. «Мисс студенчества Финно-Угрии – 2025» конкурсын вормем Софья Снигирева мастер-класс ортчытоз.

Финал 10-тӥ шуркынмонэ Глазкарысь университетлэн валтӥсь сцена вылаз ортчоз.

Туспуктэм: Глазкарысь университетлэн «ВКонтакте» мерлыко вотэсысь