Удмурт кылэз дышетонъя ватсэтъёсты кылдытон ӵектос улонэ пыӵа

Удмуртиысь «Ресурсный центр “Куара”» огазеяськон Ижкарын «Удмурт кылын “Вотэс” ИТ-класс» ӵектос улсын хакатон ортчытӥз. Школаын дышетскисьёс, шор ёзо но вылӥ дышетсконниосысь студентъёс удмурт кылэз дышетонъя ватсэтъёс (приложениос) бордын ужазы.

Дистанионной люкетэ 10 командаос пыриськизы. Соос кык арня ӵоже прототипъёс лэсьтӥзы. Финалэ потэм куать команда ужъемышъёссэ жюрилы возьматӥз. Ватсэтъёс нылпи садэ ветлӥсьёслы но покчи классъёсын дышетскисьёслы чакламын. Отчы пӧртэм заданиос но шудонъёс пыртэмын, кудъёсыз пыр пиналъёс выль кылъёс дышетыны но соосты шонер вераны быгато.

«Удмурт кыл мед дышетӥськоз, со актуальной но егитъёс понна тунсыко луыны кулэ. Егит калык али мукет, соослы кулэ таӵе выль проектъёс, выль продуктъёс. Соос интернетысь, сайтъёсысь, приложениысь учкыны мед быгатозы, кылсярысь, кызьы удмурт кылын чырткемъяськыны», — пусйиз Удмуртиысь йӧскалык политикая министрлэсь ужзэ быдэсъясь Эдуард Петров.

Хакатон радъяськиз «ЭтноЛаб: акселерация успеха» огъяросси ӵектос улсын, кудзэ Йӧскалык кусыпъёсъя ресурсной центр Росси азьмуртлэн грантъёсъя фондэз но Йӧскалык ужъёсъя федерал агентство юрттэмъя быдэстэ.

Удмурт кылэз дышетонъя ватсэтъёсты кылдытон ӵектос нырысь ик сяме пырем дунлыкъёсты егитъёс пӧлын вӧлмытэ. Озьы ик со пиналъёслы быгатонлыкъёссэс усьтыны но азинтыны, выль ӧнерлы дышетскыны луонлык сётэ. Ваньмыз та тупа «Молодёжь и дети» йӧскалык ӵектослэн ужпумъёсызлы, кудӥз Росси азьмуртлэн Владимир Путинлэн пуктэмезъя быдэсъяське.

Туспуктэмез: Максим Егоров