«Удмурт Кенеш» огазеяськонлэн Пичи кенешез ортчиз

10-тӥ шуркынмонэ Ижкарын «Удмурт Кенеш» огазеяськонлэн Пичи кенешез ортчиз. Со улсын Трокай Борисов нимо йӧскалык премилэсь выль лауреатсэ данъязы. 2026-тӥ ар понна сое Ижысь кар думалэн тӧроез Любовь Зайцева басьтӥз.

«Шонер вераса, конечно, туж шумпотӥсько, мынэсьтым ужме, кудзэ мон сётӥ удмурт калык понна, дунъязы шуыса. Неожиданно вал. Нош малпаса: 24 ар мон ортчытэмын городской Герберез Кызьпу арамаын, ортчылӥзы «Тол келян» но, мукет но праздникъёс удмурт калык понна, чтобы культура но, вераськон кыл но мед развиваться кариськоз шуыса», – вераз Любовь Зайцева.

Любовь Зайцева ужан сюрессэ кутскиз Ижкарысь 69 номеро школаын математикая дышетӥсь луыса. Собере 69 номеро школалэн кивалтӥсезлэн дышетон но визьнодан ужъя воштӥсез, школалэн кивалтӥсез вал. Ӵапак со дыръя школаын удмурт кылэз дышетыны ӧдъязы. Зэм, о
тысь кошкемез бере кык ар ортчыса, кутскем ужзэ куспетӥ каризы, жаляса вераз Любовь Евлампиевна.

Удмурт лулчеберетэз утён но вӧлмытон понна трос лэсьтӥз Ижысь Индустри ёрос администрациын ужакуз – нырысь тӧролэн мерлыко ужпумъёсъя воштӥсез, собере тӧро луыса.

«Шумпотӥсько, Кызьпу арамаын туж бадӟым ужъёс мыно шуыса. Потэ вал, конечно, отын больше удмурт сямыз мед кылёз шуыса. Та виысь Кызьпу арамае лыктӥсько ке, первой ик мон ӟыгыртӥсько Шунды-Мумыез», – вераз Трокай Борисов нимо йӧскалык премилэн лауреатэз.

Озьы ик Пичи кенешын «Удмурт Кенеш» огазеяськонлэн Данъян книгаяз пыртоно муртъёсты сӥлы каризы. Соос пӧлын:

– Надежда Максимова – Дэбес ёросысь Сюрногурт шор ёзо школаысь удмурт кылъя но литературая дышетӥсь;

– Анна Трубачева – Дэри ёросысь Пыӵанка шор ёзо школаысь удмурт кылъя но литературая дышетӥсь;

– Альбина Баженова – Глазкарысь шаерчиослэн огазеяськонзылэн кивалтӥсез;

– Маргарита Новосёлова – Вавожысь ёрос кенешез кылдытӥсьёс радысь азьветлӥсь;

– Пётр Чернов (кулэмез бере) – Удмуртиысь калык писатель, Удмурт Элькунысь культура удысысь сӥё-дано ужась, Вань удмуртъёслэн «Удмурт Кенеш» огазеяськонзылэн «Герд» газетсылэн нырысетӥ редакторез.

Туспуктэм: «Удмурт Кенеш» огазеяськонлэн ВКонтакте вотэсысь