«Этноэксперт-2026» визьбур шудонлэн ньылетӥ сезонэзлэн нырысетӥ зональной люкетэз ортчиз

Ижкарын Калыкъёслэн эшъяськон юртазы егитъёс понна «Этноэксперт-2026» визьбур шудонлэн ньылетӥ сезонэзлэн нырысетӥ зональной люкетэз ортчиз. Отчы карысь школаосын дышетскисьёслэн 15 командазы пыриськиз, котькудаз быдэн ньыль мурт.

«Туннэ турнир 60 школьникъёсты огазеяз. Пиналъёс фактъёсты так гинэ уг дышето, соос дышетско валаны лулчеберетлэсь логиказэ, солэсь аспӧртэмлыкъёссэ но кызьы со идентичностез кылдытэ», – пусйиз Калыкъёслэн эшъяськон юртэнызы кивалтӥсьлэн валтӥсь ужъя воштӥсез Алёна Калинина.

Ужрад «Своя игра» шудон выллем радъямын. Турнирын 12 тема вал, котькудаз вить юан.

Таяз зональной люкетын нырысетӥ инты 80, 91 но 52 номеро школаос басьтӥзы. Соос шудонлэн финалаз потӥзы, кудӥз 26-тӥ шуркынмонэ Ижкарын Калыкъёслэн эшъяськон юртазы ортчоз.

Вуоно зональной шудонъёс ортчозы 10-тӥ шуркынмонэ Сарапулын, 11-тӥ шуркынмонэ Можгаын, 12-тӥ шуркынмонэ Глазкарын, 13-тӥ шуркынмонэ Воткаын.

«Этноэксперт» шудон – со площадка, кытын пиналъёс улосвылын улӥсь калыкъёслэн лулчеберетэнызы, йылолъёсынызы но историенызы мургес тодматско. Егитъёслы патриотизм мылкыд но Россиысь сяме пырем дунлыкъёсты пыӵатон кун азьмуртлэн Владимир Путинлэн пуктэмезъя быдэстӥськись «Молодёжь и дети» йӧскалык ӵектослэн ужпумъёсызлы тупа.