Россиысь калыкъёслэн огъя луэмзылэн арезлы йылпумъянъёсты эскеризы Калыкъёслэн эшъяськон юртазы

Ижкарын Калыкъёслэн эшъяськон юртазы Йӧскалык кусыпъёсъя перлыко кенешлэн пумиськонэз ортчиз. Ужрадэ Удмуртиысь лулчеберетъя йӧскалык огазеяськонъёсын но вӧсьбур огазеяськонъёсын 40-лэсь трос кивалтӥсьёс люкаськизы. Соос Россиысь калыкъёслэн огъя луэмзылэн арезлы йылпумъянъёсты эскеризы.

«Россиысь калыкъёслэн огъя луэмзылэн арез йылпумъяське. Трос тунсыко ӵектосъёс, спорт но лулчеберет ужрадъёс радъямын вал. Нимаз пусъеме потэ пиналъёсын но егитъёсын ужез – выль шудонъёс но эшъяськон урокъёс будӥсь выжыосты огазеяло. Та ӧрлы нимысьтыз саклык висъяно. Озьы ик тау шуисько грант вожвылъяськонъёсы пыриськемды понна. Таяз арын гинэ Росси азьмуртлэн грантъёсъя фондэзлэн но Азьмуртлэн лулчеберет кичӧлтонъёсъя фондэзлэн вожвылъяськонъёссы пыр тӥ 35 миллион манет кыскиды. Со туж усто результат, кудӥз выль луонлыкъёс усьтэ», - вераз Ольга Абрамова, Удмуртилэн тӧроезлэсь ужзэ огдырлы быдэсъясь. Озьы ик со пусйиз, Федераци юрттэмен 2027-тӥ арын Кузебай Герд нимо йӧскалык музеез тупатъялозы.

Элькунысь йӧскалык политикая министрлэсь ужзэ быдэсъясь Эдуард Петров лулчеберетъя йӧскалык огазеяськонъёслэн ӵектосъёссылы юрттон сярысь вераз: «2026-тӥ арын огазеяськонъёслэсь кун йӧскалык политика удысысь ӵектосъёссэс но ужрадъёссэс радъян понна элькун коньдэтысь 2 миллион манетлэсь трос висъямын вал – вожвылъяськон пыр юрттэтэз басьтӥзы 25 ӵектосъёс но 12 огазеяськонъёс. Озьы ик ватсаса 3 миллион манет висъямын егитъёслэн кылъёсъя ӵектосъёсынызы вожвылъяськонлы: 30 куриськон пӧлысь быръемын 13 вормисьёс»

Улосвыл кивалтэтлэн тӧроезлэн воштӥсезлэсь ужзэ быдэсъясь Наталья Тойкина ӟуч лулчеберетъя огазеяськонлэн ӵектосъёсыз сярысь мадиз. Соос пӧлын Славян гожъяськетлэн но лулчеберетэн нуналэз, ӟуч лулчеберетъя «Высокий берег» огъяросси фестиваль, «Русская семья и её традиции – ценность России» ужрад, нылпиослэн «Ильинский хоровод» калыккылос фестивальзы. 2026-тӥ арын огазеяськонлы 35 ар тырмиз. Элькунысь каръёсын но ёросъёсын огазеяськонлэн 34 ёзэтъёсыз но ӟуч лулчеберетъя 60-лэсь трос центръёс ужало. Отчы 15 сюрслэсь трос адями пыриське. Элькунын кылъёсъя «Сохранение, изучение и развитие государственных и иных языков народов Удмуртской Республики» кун программа ужа, пусйиз Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез Андрей Ураськин. Со ватсаз, «Яндексэн» ӵош ужамлы луыса солэн сервисъёсыз удмурт кылын вераськемез валало но текстэз берыктыны быгато. Таӵе ужын удмурт кыл финн-угор кылъёс пӧлын нырысетӥез но Россиын улӥсь калыкъёслэн кылъёссы пӧлын ньылетӥез луиз. Удмуртиын «Вотэс» ИТ-класс кылдытэмын, кытын нылпиос удмурт кылын шудонъёс лэсьто, но «УдМульт» студия, кудӥз 40 пала мультфильм поттӥз. Али GigaChat (ГигаЧат) нейросетез удмурт кыллы дышетон кутскиз. Россиысь калыкъёслэн ассамблеязылэн улосвыл ёзэтэзлэн кивалтӥсез Анна Габдуллина огазеяськонлэн усто ӵектосъёсыз сярысь вераз. Соос пӧлын «Этно вдохновляет» арт-хакатон, Россиысь калыкъёслэн кылъёссылэн нуналзылы квиз но Россилэн куншетэзлэн нуналэзлы тупатэм ужрад. Нимысьтыз пусъемын вал ассамблеялэсь интыосын ёзэтъёссэ но егитъёслэсь активзэс кылдытон уж.