Ижкарын Удмуртилэсь кунлык нуналзэ пусйизы

Ижкарын Удмуртилэсь кунлык нуналзэ пусйизы. Элькунлэн кутсконаз сылӥсьёсты тодэ вайыны но тау карыны «Удмурт Кенеш» огазеяськонлэн ёзчиосыз, улосвыл но кар тӧролык ёзэсъёсысь огмуртъёс, карын улӥсьёс люкаськизы.

«Кунлык басьтон понна ужазы, выризы, туж трос кужымзэс сётӥзы асьмелэн удмурт пиосмы, удмурт воргоронъёсмы, асьмелэн просветительёсмы, кудъёсыныз ми данъяськиськом, ум вунэтӥське и котькуд ар 4-тӥ ноябре лыктӥськом соослэн синпелет доразы, соосыз тодэ вайиськом, сяська понӥськом», – вераз элькун Кун Кенешысь лулчеберетъя, туризмъя но йӧскалык политикая ялан ужась ӧрилэн кивалтӥсез, «Удмурт Кенеш» огазеяськонлэн тӧроез Андрей Ураськин.

Сяська понон Удмурт автономилэн нырысетӥ кивалтӥсезлэн Иосиф Наговицынлэн бюстэз дорын кутскиз. Бӧрысь люкаськемъёс Трокай Борисовлы синпелет доры вуизы. Ужрад Кузебай Гердлы синпелет дорын йылпумъяськиз. Дышем сямъя Кузебай Герд нимо йӧскалык гимназиын но Удмурт кун университетын дышетскисьёс Кузебай Гердлэсь, Николай Байтеряковлэсь, Даниил Яшинлэсь кылбуръёссэс лыдӟизы.

Удмуртилэсь кунлык нуналзэ пусъён – со элькунлэсь историзэ утён, сое тодонэз будӥсь выжыослы кельтон, егитъёслы вордскем шаерен данъяськон мылкыд пыӵатон. Россиысь калыкъёслэн огъя луэмзылэн араз со тужгес но кулэлыко луэ.