«Удмурт Кенеш» огазеяськон улосвыл Данъян пул вылын

3-тӥ шуркынмонэ, Россиысь калыкъёслэн огазеяськон нуналзы но Удмуртилэн кунлык нуналэз азьын, Удмуртилэн тӧроезлэсь ужзэ огдырлы быдэсъясь Ольга Абрамова кун приём ортчытӥз. Отын улосвыл Данъян пул вылэ пыртэм 54 адямиосты но 15 коллективъёсты сӥлы каризы.

Данъян пул вылэ «Удмурт Кенеш» огазеяськон пыриз. Со туэ 35 ар тырмонзэ пусъёз.

«Со туннэ кенешчиослэн гинэ данъетсы ӧвӧл, со – вань 35 ар ӵоже тыршем адямиослэн. Мон шуысал, быдэс удмурт калыклэн данъетэз. “Удмурт Кенеш” вань удмуртъёсты огазея. Вань ужмы милям удмурт калык понна, удмуртлык понна, удмурт лулчеберетмы но кылмы понна» пусйиз огазеяськонлэн тӧроез Андрей Ураськин.

Огазеяськон уно ӵектосъёсты улонэ пыӵатон бордын тырше. Соос пӧлын «Покчи тодосчи» вожвылъяськон. Нылпи садэ ветлӥсь пиналъёс пӧртэм эскерон ужъёс ортчыто но ужъемышъёсынызы удмурт кылын тодмато. Таяз арын пиналъёс геройёссы сярысь видеороликъёс возьматӥзы. Ӵектос Азьмуртлэн грантъёсъя фондысьтыз грант утӥз. Солы луыса тулыспалэ дышетӥсьёс но визьнодасьёс понна дышетон семинар ортчытӥзы.

Котырес лыдпуссэ «Удмурт Кенеш» бадӟым ӧтчамен пусъёз. Со 4-тӥ толсуре ортчоз. Ужрадын докладъёс лыдӟозы, резолюция кутозы. бӧрысь яркыт кенешчиос но куноос понна яркыт концерт ортчоз. Люкаськемъёсты Удмуртиысь калык кырӟанъя но эктонъя «Айкай» театр шулдыртоз.

Пумиськонын озьы ик кун премиез басьтӥсьёсты данъязы, улосвыллэн вить дано кунмуртъёсызлэсь нимъёссэс шараязы.

«Удмурт Элькунлэн дано кунмуртэз» луиз «Удмурт Кенеш» огазеяськонлэн ёзчиез Игорь Семёнов. 2000-2007 аръёсы со Удмуртиысь Кун Кенешлэн тӧроез вал. Ӵапак со вакытэ «О государственных языках Удмуртской Республики и иных языках народов Удмуртской Республики» катэз кутӥзы. Со удмурт кыллэсь правовой инлыксэ юнматӥз, элькунын улӥсь калыкъёслэсь кылъёссэс но лулчеберетсэс утьыны инъет кылдытӥз.

Туспуктэм: Удмуртиысь тӧролэн но кивалтэтлэн пресс-службазы