Удмуртиын «Бадӟым этнографи диктант» акция радъяськиз

Удмуртиын «Бадӟым этнографи диктант» акция радъяськиз.

Туэ со 11-тӥзэ ортчиз. Со Россиысь калыкъёслэн огъя луэмзылэн арезлы тупатэмын.

Акция очной амалэн гинэ ортче. Со 12-тӥ шуркынмонозь кыстӥськоз. Элькунын 260-лэсь трос площадка радъямын. Валтӥсез Калыкъёслэн эшъяськон юртазы вал. Тодон-валанъёссэс эскерыны 40-лэсь трос адями люкаськиз. Диктантэз гожтон азьын соос Удмуртилэн историез но лулчеберетэз сярысь 10 юанъёслы валэктон сётӥзы.

«Туж шумпотӥсько, трос егитъёс пыриськыны мылкыд каро шуыса. Кӧня асьмелэн мылкыдмы ог-огенымы тодматскыны, мургес тодыны сям-йылолъёсмес, сокем асьмеос умойгес но ог-огмес гажаса улыны быгатӥськом. Данъяськисько, асьме Удмурт Элькунмы луиз та диктантэз радъясьёс пӧлын но сое малпасьёс пӧлын, малы ке шуоно именно та музъем вылын солэн идеяез кылдӥз. Туннэ нуналлы со туж шуныт ужрад луиз, кудӥз огазея вань калыкъёсты », — вераз Россиысь Кун Думаын Удмуртилэсь депутат Татьяна Ишматова.

Али ужрадэз Россиысь йӧскалык ужъёсъя федерал агентство радъя. Бадӟым этнографи диктантэз гожтон пыр адямиос калыкъёслэн лулчеберетэнызы но йылолъёсынызы тодматско. Со ог-огдэ гажан мылкыдэз, калыкъёслэсь кусыпъёссэс юнматэ.