Геннадий Корепанов-Камский нимо премиез сётон ужрад ортчиз кун филармониын

Геннадий Корепанов-Камский нимо премиез сётон ужрад ортчиз кун филармониын.

Удмуртиысь кун филармониын элькун кивалтэтлэсь «Наследники» премизэ но Геннадий Корепанов-Камский нимо премиез сётон ужрад ортчиз. Данъетъёсты басьтӥзы быгатӥсь пиналъёс но чеберлыко творчество удысын вормонъёс басьтэм студентъёс. Со сярысь улосвыл тӧролэн но кивалтэтлэн пресс-службазы ивортӥз.

«Таяз арын “Наследники” премиез басьтон понна элькунысь устолыкъёсъя 25 нылпи школаысь 73 куриськон вуиз. Геннадий Корепанов-Камский нимо премилы куриськон келязы крезьгуръя элькун колледжысь но Удмурт кун университетысь куать студентъёс. Котькуд лауреат понна та данъет – тыршемзэс пусъён но азьланяз будыны мылкыд сётон. Котькуд вормон понна трос ужаны кулэ, но наставникъёслэн но анай-атайёслэн юрттэтсытэк быгатонлыкъёсты усьтыны но результатъёс возьматыны туж секыт. Ӵапак соос юртто шуг-секытъёс пыр ортчыны, аслыд оскыны но азьлань вамыштыны», – вераз Удмуртиысь лулчеберетъя министрлэсь ужзэ быдэсъясьЮрий Краснопёров.

Удмуртиысь калык артист Геннадий Корепанов-Камский нимо премия 2001-тӥ арын кылдытэмын. 2009-тӥ арын со борды улосвыл кивалтэтлэн «Наследники» премиез ватсаськиз.

Данъян ужрадын лауреатъёс быгатонлыкъёссэс сцена вылын возьматӥзы. Фойеын «Изобразительное искусство» но «Декоративно-прикладное искусство» номинациосын вормисьёслэн ужъёсынызы адӟытон ужаз.