Ужрад радъяськиз ёрос культурая юртын. Куноосты вӧйын-нянен пумитазы, «Ялыке» ансамбле пыриськисьёс пумиськонэз задор кырӟанъёсын шулдыртӥзы.

Ӵектослэн кивалтӥсез Татьяна Колхир юрттӥсьёсыз Татьяна Головизнина но Лариса Агееваен ӵош калык праздникъёсын тодматӥзы: мар каризы со нуналэ, кыӵе йӧскалык сиён-юон пӧразы, кызьы шулдыръяськизы. Люкаськем семьяос мыло-кыдо куарнянь сокам лэсьтонъя мастер-классэ пыриськизы. Озьы ик тодматскизы на мукет удмурт пыжиськемъёсын но, эктӥзы-кырӟазы, шудонъёсын шудӥзы.

Пусъём, «Бускельёс дорын 2.0» проект улсын 8 пумиськон радъяськиз. Отчы удмурт, ӟуч но бигер выжыысь 47 семьяос пыриськизы.

«Туж жадим, но сюлэм вылын али сыӵе ганяк мылкыд, туж кулэ ужез лэсьтыны, улонэ пыӵатыны быгатӥм уго. Бадӟым тау кареме потэ ваньзылы, кин юрттӥз, кин шумпотыса пыриськиз та ужрадамы. Кӧня ке шутэтском но — азьлань! Выль малпанъёс но выль ӵектосъёс витё. Озьыен, удмуртлыкмес утём но вӧлмытом!»

Якшур-Бӧдья ёросысь нылпиосын семьяос понна «пукон корка» выллем удмурт шулдыръяськон ӝытъёс радъяськозы. Ужрадъёс тямыс гуртъёсын ортчытыны чакламын.

Радъясьёслэн верамзыя, озьы соос удмуртлыкез калыке пыӵатозы. Ӵектосэ пыриськисьёсты соос удмурт сям-йылолъёсын, фольклорен, калык праздникъёсын тодматозы, ӵошен эктозы-кырӟалозы, пӧртэм шудонъёсын шудозы, одно ик ческыт сиё-юонъёсты но пӧралозы.

Та нуналъёсы ӵектос улсын нырысетӥез пумиськон ортчиз ини. Радъяськиз со Якшур гуртысь удмурт культурая «Туклячиос» центрын. 

«Куноосмы шумприч гинэ вуизы, гань-гань кылзӥськыса пукизы, тодматскизы сӥзьыл дыръя ортчытъяськись удмурт сям-йылолъёсынымы. Табере соос туж умой тодо «Виль», «Пукрол» но «Сӥзьыл юон» праздникъёсты. Мӧйыослы но, пичиослы но туж кельшиз кадь «пукон коркамы». Вуонояз пумиськонъёсамы но курисько ини», — вера проектлэн одӥгез радъясез Татьяна Колхир.

Шулдыръяськон ӝытэ пыриськемъёс удмурт шӧмо пичильтык синпелет кузьымъёсын кошкизы. Нош вуоноез пумиськон радъяськоз ини 7-тӥ коньывуонэ Сюровайын.