«Туннэзэ дунъяса, вуонозэ чакласа» ужрадэ Дэри, Алнаш, Пичи Пурга ёросъёсысь но Ижкарысь 120 дышетӥсьёс но визьнодасьёс пыриськизы.

Люкаськемъёс удмурт кыллы но культуралы пайдалыко дышетон практикаосты учкизы, этнокультуралы дышетон пыр нылпиослэсь функциональной грамотностьсэс кылдытон сярысь вераськизы.

Семинар улсын ик «Вордскем кыл» журналлэн выль ар азьын потэм спецномерезлы презентация но радъяськиз. Со быдэсак сӥземын вал Дэри ёросысь йӧскалык дышетонлы.

– Дэри ёросын этнокультурной образованилы бадӟым саклык висъяське. Тыршиськом, ужмы пӧзе! Аръёс ортчыса но, синмаськисько командаысьтымы эшъёсылы, кинэн ӵош ужасько, – шараяз мылкыдзэ «Удмурт Кенеш» огазеяськонлэн Дэри ёросысь ёзэтэзлэн кивалтӥсез Лидия Биянова.

Дышетӥсьёслы сӥзем «Вордскем кыл» журнал но Удмурт кун университетысь Удмурт кылосбуръя, финно-угроведениея но журналистикая институт ӧтё пыриськыны «Егит ӧнерчи но нодъясь» вожвылъяськонэ.

«Егит ӧнерчи но нодъясь» вожвылъяськон туэ 3-тӥзэ радъяськоз ни. Конкурс Удмурт Элькунысь Печатья но ивор вӧлмытонъя агентстволэн но Дышетонъя но наукая министерстволэн юрттэменызы радъяське.

10-тӥ шуркынмонэ Удмурт кун университетлэн лыдӟетъюртаз нодъясьёслэсь ужан амалъёссэс шараялозы, удмурт кыллы но лулчеберетлы дышетӥсь егит ӧнерчиослэсь ӵектосъёссэ кылзозы.

Вожвылъяськонын куинь уж быдэстыны чакламын: егит ӧнерчи нодъясеныз ӵош кылдэм малпанзэ улонэ пыӵатэменыз тодматоз, нодъясь егит дышетӥсьёсты ужан амалъёсыныз, мастер-класс радъяса, тодматоз, нодъясь но егит ӧнерчи удысысьтызы кыӵе ке югдурез сэрттозы-пертчозы.

Ужрадэ кылзӥсь чотын пыриськыны мылкыд карисьёс та ссылкая пусйиськыны кулэ.