Башкириысь Татышлы ёросысь В.М. Комаров нимо лагерьын удмурт пиналъёс понна 20-тӥ ползэ ини ӧсъёссэ усьтӥз «Усточикар» лагерь.

Туэ пиналъёс «Дӥськут дизайн», «Суредаськон», «Театр», «Фольклор» ӧръёсъя тодон-валан люкалозы, озьы ик ваньмон дыръязы удмурт сям-йылолъёсты дышетозы, удмурт ужрадъёсы пыриськозы. Пиналъёсын Башкортостанысь но Удмурт Элькунысь ӧнерчиос ужалозы.

Толон, 10-тӥ гудырикошконэ, лагерез усьтонлы сӥзем ужрад радъяськиз. Отчы лыктэм пиналъёс пӧртэм ласянь быгатонлыкъёссэс возьматӥзы.

Нылпиосты ӟечкыласа вераськизы Татышлы ёрос администрацилэн кивалтӥсез Ф.Р. Шайхисламов, мер ужпумъёсъя воштӥсез А.У. Шайнурова, Башкортостанысь удмуртъёслэн лулчеберетъя йӧскалык центрзылэн кивалтӥсез Л.Л. Зидымаков, удмурт огазеяськонлэн Янаул ёросысь ёзэтэныз кивалтӥсь Ю.С. Саитов, лагерен кивалтӥсь М.Л. Шаритдинов. Куноос пусйизы, «Усточикар» лагерь анай кылэз, культураез, сям-йылолъёсты утьыны юрттэ шуыса.

Башкириысь удмурт пиналъёсты арлы быдэ тырше огазеяны «Усточикар» лагерь. Пандемиен кылдэм шуг-секытъёсын сэрен кӧня ке вис карем бере туэ со нош ӧсъёссэ усьтӥз.

Таяз радэ Вязовка черкогуртэ Башкириысь но Премь котырысь 70 удмурт пиналъёс люкаськизы. 10 нунал ӵоже соос «Фольклор», «Эстрада», «Театр», «Киуж» отрядъёсын тодон-валан люкалозы, ваньмон дыръязы удмурт сям-йылолъёсты дышетозы, удмурт ужрадъёсы пыриськозы.

Удмуртиысь пиналъёслы туэ лагере мыныны ӧз ке но удалты, татын гижысь-пиньысь тыршо шаерысьтымы ӧнерчиос но вожатойёс. «Эстрада» отрядэз кырӟаны дышетэ Пичи Пургаысь кырӟась Светлана Зянкулова, «Театр» отрядэн спектакль пуктэ шаерысьтымы режиссёр Дмитрий Корепанов, валтӥсь вожатойлэсь ужзэ ас вылаз мерта «Шунды» огазеяськонлэн ёзчиез Никита Соприн, вожатойёс сямен ужало озьы ик «Шунды» огазеяськонлэн ёзчиосыз Светлана Турова но Николай Пронев.