Толон Можга ёросын усьтӥськиз «Егит Тулкым» лагерь. Туэ со 13-тӥзэ радъяське ни.
Лагере Можга но со котырысь ёросъёсысь 40 егитъёс люкаськизы. Кӧня ке нунал ӵоже соос тодон-валан люкалозы SMM, театр, декоративно-прикладное искусство, эстрада, хореография но калык творчество удысъёсын.
Туэ сменаын отрядъёс бадӟым саклык висъялохы удмурт воршудъёслы но удмурт калыклэсь лулчеберетсэ утёнлы. «Егит тулкымез» усьтонын вожатойёс гижысь-пиньысь дасям номеръёс возьматӥзы, нылпиос но ужрадэ мыло-кыдо пыриськизы: усто визиткаоссэс возьматӥзы.
Кызьы вашкала удмурт дӥськутэз туала кароно? Кыӵе амалъёсты уже кутӥзы асьме выжыосмы дӥськут вурыкузы? Та сярысь тодыны луоз «Луло» студиын.
8 занятие куспын отын луэ тодыны удмурт дӥськутлэсь аспӧртэмлыксэ, вашкала йылолъёс вылэ пыкъяськыса, лэсьтыны туала чеберъяськон арбериосты. Со сяна мылкыд карисьёс быгато оскалтыны сӥньысъёсты буяны, куиськыны, басмаысь мунё лэсьтыны.
Та удсыны тодон-валан люканы мылкыд карисьёсты дышетэ Киужъёсъя центрысь ӧнерчи, стилист, Россиысь дизайнеръёслэн союззылэн ёзчиез Анна Сергеева.
Праздник Реж карын радъяськиз. Ас котыраз со трос калыкез люказ.
Куное бадӟым делегациен вуылӥзы Удмуртиын улӥсьёс — «Удмурт Кенешлэн» пӧртэм ёросъёсысь ёзчиосыз, Камсьӧр удмуртъёслэн Ижысь огазеяськоназ пырисьёс, журналистъёс, элькунысьтымы пӧртэм ансамбльёсын кырӟасьёс. Празднике озьы ик пыриськизы Челябинскысь, Пермысь, Свердловскысь коллективъёс но.
Шулдыръяськонэ люкаськемъёсты ческыт ӝукен но сюкасен куноятӥзы. Озьы ик татын пӧртэм адӟытонъёс ужазы. Вань мылкыд карисьёс киужъя мастер-классъёсы пыриськыны быгатӥзы.
Нош «Удмурт Кенеш» огазеяськон Свердловскысь удмуртъёслы трос удмурт книгаос кузьмаз.
Башкортостанысь Татышлы ёросын Калыкъёслэн эшъяськон юртсылэн филиалаз – Историяя но лулчеберетъя удмурт центр бордын Егит удмурт семьяослэсь клубзэс кылдытӥзы.
Туннэ нуналлы удмурт центр бордын ужало кык клубъёс – удмурт нылкышноослэн «Эшъяськон тугоко» клубзы но удмурт нылпиослэн «Ренбик» клубзы. Табере отын ужалоз удмурт егит семьяос понна клуб но.
Клубез егит семьяослэсь данзэс ӝутон, удмурт сям-йылолъёсты утён понна малпазы. Отын пӧртэм-пӧртэм ужрадъёс ортчытъяны чаклало: котырес ӝӧкъёс, ужбергатон шудонъёс, кенешонъёс, мастер-классъёс, шулдыръяськонъёс, ӵошатсконъёс.
Туннэ нуналлы клубе Татышлы ёросысь Выльгуртысь (Новые Татышлы) 15 егит удмурт семьяос пыриськыны мылкыд каризы ини. Клублэн кивалтӥсез Ксения Милиятова пусъе, соос ялан гуртын уг уло, палэнын ужало ке но, туж бадӟым мылкыдын доразы лыктӥзы шуыса. Али егит удмурт семьяос клубзылы ним малпало. Нош бӧрысь рос-прос ужаны кутскозы.
Нялтас вераса, клубе пыриськисьёс ёросысьтызы мукет матысь гуртъёсысь егит семьяосын кусып юнматон понна ужрадъёс ортчытъяны ӧдъяло. Кылсярысь, КВН выллем шудонъёс. Бускель ёросъёсы но потаны мылкыдзы вань.
Ивортодэтъя «Удмуртия» агентство ивортэмъя
Элькунмылэн картаез шоры учкыса, ӵемысь син шоры сюро одӥг кадь гурт нимъёс. Шуом: Игра (Эгра ёрос), Старая Игра, Верхняя Игра (Грах ёрос), Алганча-Игра (Пурга ёрос); яке Выль Моння-Сьӧлта но Пичи Пурга ёросъёс; озьы ик Бадӟым Пурга, Тупал Пурга (Эгра ёрос) но Пичи Пурга (Пичи Пурга ёрос). Талэн мугез тросэзлы тодмо – со вашкала удмуртъёслэн воршуд выжыен улон сямзы.
Милям но, Пичи Пурга черкогуртын улӥсьёсслэн, тодэммы потӥз малы меда милям Пургамы, кудаз улэ ог тямыс сюрс адями, нимаське «пичи», нош Эгра ёросысь Бадӟым Пургаез, кудаз улӥсез ог 100 пала гинэ лыдъяське, «бадӟым» шуо? Малы Пурга вӧзысьтымы Орлой гурт куке но Кваскашур-Пурга нимаськиз, нош Куреггуртэз пересьёсмы Агрыз-Пурга шуылӥллям? Сыӵе юанъёс луонлык сётӥзы «Воршуд шурлэн кутсконаз – выль сямен учкон» проектлы вордӥськыны, кудӥз «Культурная мозаика малых городов и сел» огъяросси вожвылъяськонын одӥгез вормисез луиз.
Проектэн ужакумы (со ужрад радъямын вал 2 ар ӵоже, 2015-тӥ-2016-тӥ аръёсы) пуктэмын вал таӵе ужпумъёс: Пичи пурга но Бадӟым Пурга черкогуртъёслэсь историзэс эскерыса, отын улӥсьёслэсь улон сямъёссэс, йылолъёссэс ӵошатыса, пыӵатыны будӥсь нылпиосмылы вордскем шаерзэс но калыксэс гажан но яратон мылкыд.
Со понна егитъёс пӧлын кылдытэмын вал куинь исследовательской группаос, кудъёсыз эскеризы Пурга выжылэсь йылолъёссэс, сямъёссэс, дӥсьcэс, чорыган, пӧйшуран но муш возён сямъёссэс, озьы ик удмуртъёслэсь улон шоры учконзэс.
Кык ар ӵоже трос гинэ лэсьтэмын вал – экспедициен вуылӥмы вашкала пересьёсмылэн улэм интыязы – Эгра ёросысь Бадӟым Пурга черкогуртэ, пумиськылӥмы пересьёсын (кызьы али шуо – информантъёсын), эскеримы тодосчислэсь ужъёссэc — та ласянь бадӟым юрттэт сётӥзы М.Г.Атамановлэн ужъёсыз, асэныз нo пумиськон радъямы вань та лэсьтэм ужмы вылэ пыкъяськыса, ёрос лыдӟиcькон юртын тунсыко этноэкспозиция усьтӥськиз, озьы ик Чимошурын пӧйшуранлы, чорыганлы но муш вордонлы сӥзем музей усьтэмын вал.
Ортчытӥм бадӟым фестиваль, кудӥз огазеяз ёросысытымы Пурга Воршудысь потэм калыкез — нош соос уло Пурга, Орлой, Бигра, Курег но Чутожмон гуртъёсын (нялтас верало на, Пурга воршуд луэ одӥгез бадӟымез воршуд, со пумиське 170 гуртъёсын). Озьы ик дорамы вуылӥзы Эгра ёросысь Бадӟым Пурга черкогуртысь вaшкaлa вoршуд ӵыжы-выжыосмы. Татарстанысь но куноосмы вуылӥзы – варклед-бӧдьяос, кудъёсыз куке но улэмын Пичи Пургалан, Пурга воршудэн артэ, нош кыӵе ке но мугъёсъя кошконо луиллям али улон интыосазы. Соос но та нуналэ гуртазы бертылэм кадь луизы. Фестиваль пӧрмиз зэмос праздниклы, кытын котькудӥз валаз аслэсьтыз кин луэмзэ, данъяськыны кутскиз аслаз выжыеныз.
Ми но, пичи пургаос, юимы кадь вашкала выжыосмылэсь ошмeсысьтызы дун вузэс, шодӥм соослэсь юрттэмзэс но кужым сётэмзэс. Куке но вискысытымы чигтэм сӥньысмес быгатӥмы выльысь ваче герӟаны.
Улонэ пыӵатэм проектмы бугыртыны быгатӥз ёросысьтымы калыкез но, тросээ тунсыкъяськыны кутскизы асьсэ выжыенызы. Та ласянь адӟымон луиз Баграш-Бигра гуртысь Ботё семьяослэн адӟытонзы, соос ас мылкыд каремзыя вазен ини выжызылэсь историзэс эскеронын бадӟым уж нуо, али но Ботё выжызылэсь пуссэ утё. (Пус шуэмысь. Та ужен вырыкум, аслым ачим но усьтон лэсьтӥ. Ӵужмемеелэсь кылем чыртывесям жильы бордын дурeмын азвесь коньдонлы укшась арбери, кудаз пуктэмын кыӵе ке нo cуред. Мон ноку но ӧй вaлaлля, малы со висъяське мукет коньдонъёслэсь. Мыным сое анае но вераны ӧз быгаты, ӵужмемее но ӧй вал ини. М. Г.Атамоновлэсь «Происхождение удмуртского народа» книгазэ лыдӟем берам гинэ валай – со дэндор (яке милям дэмдор) вылэм шуыса — выжымылэн пусыз. Туж шумпотӥ, со пус ми дорозь вуыны быгатэм шуыса). Воршудлы cӥзем фестивалямы ваньзэсты паймытӥз Анатолий Иванович Прозоров, кудӥз озьы ик ас выжыпушъетъёссэ эскерoнлы трос саклык виcъяз.
Проектлэн ужaмeз улсын ёросмылэн пӧртэм сэрегъёсаз — гуртъёсын ортчизы Бигра, Норья воршудъёслы сӥзем ужрадъёс, бадӟым исследовательской уж нуиське Эдэйгуртын Уча воршудъя.
Удмуртъёслэн воршуд выжыен улэмeнызы Кузебай Герд но тунсыкъяськиз. «Докья выжы удмуртъёс» ужаз со гожтэ «Вашкала дыръя удмуртъёс выжыен-выжыен улозы вылэм. Котькыӵе выжы ялан ас понназ, ас выжы калыкеныз гинэ улоз вылэм».
Кузебай Герд азиз Докъя воршуд выжыысь луэ. Кызьы тодмо, со выжы Вавож ёросысь милям ёросамы но вуэмын — Яган-Докья гуртэ. Та гуртын улӥсьёс вазен ини асьсэ выжыенызы тунсыкъясько. Шаерчи Людмила Михайловна Посадова кивалтэм улсын пиналъёс исследовательской ужъёс нуо, со ужъёсынызы Москваын но пӧртэм вожвылъяськонъёсы пыриськылизы ини.
Кузебай Герд вуылэмын милям ёросамы, Яган-Докьяе, 1918-тӥ арын. Татын ик со нырысьсэ калыкысь кылэм гондыръёс сярысь выжыкылэз, кудӥз бӧрысь пӧрмиз тодмо «Гондыръёс» поэмалы.
Аслэсьтым веранме мон нимай «Воршуд шур кузя: маин кужмо удмуртъёс» шуыса. Удмурт калыкмылэн сюрсо аръёс пыр потэм историез возьмaтэ: асьмелэн кужыммы выжыосмы бордын. Ӵош, валче, ог-огмес валаса, вашкала сямъёсмес утьыса но гaжaсa улӥмы ке, ум сётӥське пашмыны, кылмес, ас валанлыкмес лябомытыны.