Шуркынмон толэзь туж узыр дано праздникъёсын. Соосты пусйыса, пиналъёсты пыриськыны ӧтё «Мон — удмурт» нимо вожвылъяськонэ.
Вожвылъяськонэ пыриськыны быгато 3 аресысен 11 аресозь нылпиос. Суредъёс быдэстэмын луыны быгато котькыӵе техникаен (акварель, гуашь, пастель, карандаш, фломастер, компьютерной графика но мукет).
Ужъёстэс возьмалозы 30-тӥ шуркынмонозь swetlanazinkova@yandex.ru электрон почтае. Вормисьёс пусъемын луозы Дипломъёсын но синпель кузьымъёсын.
Пыр-почгес вожвылъяськон сярысь тододы Положениысь.
Суред вотэсысь басьтэмын.
Татарстанысь Менделеевск карын удмурт лулчеберетлы сӥзем «Кылбугор» фестиваль-конкурс ортчоз.
Отчы ӧтё пыриськыны удмурт кылын кырӟась, удмурт культураез вӧлмытӥсь но азинтӥсь нылпи коллективъёсты. Пиналъёсты жюриос 3 номинациосъя дунъялозы: «Удмурт выжыкыл», «Кырӟан», «Художественной кыл».
Вормисьёсты сӥё-дано карозы 26-тӥ шуркынмонэ Менделеевскысь С. Гассар нимо культурая юртын.
Пыр-почгес лыдӟе положениысь:
Казаньысь чеберлыкъя «Хазинэ» йӧскалык галереяын удмуртъёслэн азьвыл улонзылы но лулчеберетсылы сӥзем «Даур Куара» адӟытон ужа.
Экспонатъёс Татарстан Элькунысь Балтач но Кукмор ёросъёсысь шаертодонъя музейысь люкамын. Соосын матысьгес тодматскыны луэ 16-тӥ коньывуонозь.
Адӟытон сяна, «Хазинэ» галереяысь ӧнерчиос нылпиос понна нимысьтыз пӧртэм ужрадъёс ортчытъяло. Та нуналъёсы йӧскалык воскресной школае ветлӥсь пиналъёслы экскурсия радъямын вал, соос удмурт калыклэн лулчеберетэныз но сям-йылолъёсыныз матысьгес тодматскизы, озьы ик удмурт пужыосын дэмдор лэсьтӥзы.
Пусъём, ужрад радъямын Россиысь калыкъёслэн лулчеберет кылёсбурзылы сӥзем ар улсын Татарстанысь удмуртъёслэн йӧскалык лулчеберетъя автомизылэн юрттэмезъя.
Таяз радэ вожвылъяськонэ быдэсь шаерысьтымы пичиосты возьмало. Та дыре куриськонъёсты кутон мынэ. Со сярысь ивортэ Татарстан Элькунысь удмуртъёслэн йӧскалык лулчеберетъя автономизы.
Вожвылъяськонэ пыриськыны ӧтё удмурт калыклэн лулчеберетэныз тунсыкъяськись нылпи садэ ветлӥсь но покчи классъёсын дышетскись пиналъёсты. Соос быгатонлыкъёссэс пӧртэм номинациосъя возьматыны быгатозы:
— «Удмурт выжыкыл» темая суред;
— Удмурт калык эктон;
— Удмурт кылын кырӟан. Коллектив;
— Удмурт кылын кырӟан. Нимаз быдэстӥсьёс;
— Удмурт кылын кылбур лыдӟон.
Вожвылъяськонэ пыриськон понна 23-тӥ коньывуонозь ссылкая https://forms.gle/kRLQqHPhuQSPoAuF6 заявка келяно.
Вожвылъяськон сярысь пыр-почгес положениын гожтэмын.
2-тӥ пӧсьтолэзе йылпумъяськиз егит азьветлӥсьёс понна радъяськись «БиГерд» форум. Туэ со ортчи Татарстанысь Бавлы ёросын.
Туэ егитъёст 4 улысъёсын тодон-валан люказы. «Творчество» ӧрын лулчеберет удысын тыршисьёс Елизваета Бехтерева но Светлана Зянкулова азьветлӥсьёсты удмурт эктонъёслы но кырӟанъёслы дышетӥзы. «Этноблогингын» егитъёс тодӥзы, кызьы лэсьтӥське блог, кызьы сое шонер нуоно но аслэсьтыд лыдӟисьтэ шедьтоно. Та ӧрын выль тодон-валан егитъёслы сетӥзы программист Виталий Пронин но Татарстанысь удмуртъёслэн огазеяськоназы тыршись Ольга Чайникова. «Фольклор» площадкаын егитъёс удмуртъёслэсь вашкала шудонъёссэс эскеризы. Искусство наукаосъя кандидат, этномузыколог Екатерина Сфоронова шудонъёсты возьматон сяна, соослэсь пуштроссэз но кулэлыксэз валэктӥз на. Нош дышетӥсь, Россиысь художникъёслэн огазеяськонзылэн ёзчиез Алексей Степанов тодматӥз люкаськемъёсты Лэн-арт направлениен. Соос неръёслэсь но писпу вайеслэсь койыкез лэсьтӥзы.
Вань быгатылонкъёссэз азьветлӥсьёс адӟытӥзы Гырон быдтон шулдыръяськонын: кырӟасьёс но эктӥсьёс концерт возьматӥзы, «Фольклор» направлениысь нылпиос лыктэм калыклы шудонъёс ортчытӥзы, «этноблогеръёс» туспуктэмъёс лэсьтӥзы, нош дизайнеръёслэн койыксы шулдыръяськон бусые пыронэз чебертӥз.
Ужрад 29-тӥ инвожоысен 2-тӥ пӧсьтолэзёзь Бавлы ёросысь Урсыгурт (Покровский Урустамак) черкогуртын ортчоз.
Форуме 16-35 аресъем удмурт егитъёс пыриськыны быгато. Соос понна пӧртэм ужрадъёс, пумиськонъёс радъямын луозы. Озьы ик Удмуртиысь но Татарстанысь вуэм ӧнерчиос ньыль ӧръёсъя дышетонъёс нуозы. Туэ ужалозы «Творчество», «Этноблогинг», «Фольклор» но «Ландшафтный дизайн» отрядъёс.
Ӧръёсъя дышетсконъёсы сюрон понна радъясьёсын сётэм ужъёсты быдэстыны кулэ. Куронъёсын чӧлсконпусъя тодматскыны луэ. Куриськонъёсты 19-тӥ инвожоозь кутозы.