Ӵектос бордын тыршо «Куара» огинысь ӧнерчиос Удмурт Элькунысь йӧскалык политикая министерство юрттэм улсын
Удмуртъёс шуо: нылпиед керӟегъяськыку, ӟег нянь кадь небыт кариськы. Нырысетӥ выпускын куноосын — Наталья Дмитриеваен но Светлана Ручкинаен — кенешо – «быгатӥськом-а ми ӟег нянь луыны. Вераськом, ӵем-а нылпиосмы шоры куарамы бадӟыма, мар пумысен пӧсекъяськом но кызьы кисьтӥськом бугырскем мылкыдмес».
Утялтымтэ шудонъёс, лэсьтымтэ дорысь уж, телефон но мультфильмъёс — вераськонысь тӥ но асьтэды тодмалоды, дыр. Асьсэлэсь визь-кенешъёссэс сётозы мукет анай-атайес но валтӥсь экспертъёс — нылпиос.
Подкастэз кылзыны луоз Soundcloud, Castbox, Apple Podcasts приложениосысь, YouTube-ысь, ВКонтакте вотэсысь.
Туала вакытэ быдэс улон вотэсэ выжемын кадь. Озьыен ӵапак татын кыллы азинскыны но трос луонлыкъёс вань. Интернетлэн нырысетӥ куронэз: вакчи дыр куспын трос информация шедьтон. Соин ик вераськон кыл но кыӵе ке воштӥськонъёс пыр потэ. Озьы кыл интернетлы тупамон, капчи уже кутымон луэ — туала формазэ шедьтэ. Озьы ке но, кылсярысь, тросэз Интернетын ӟуч кылэз уже куто. Нош улэ меда удмурт кыл вотэсын? Вань-а солэн Интернетлы тупамон формаосыз? Егитъёс ог-огеныз вакчи гожтэтъёс — сообщениос — пыр верасько: со капчи но, маре ке веран понна дырез но трос уг басьты. Удмуртъёс вотэсын вераськыкузы (шергес ке но) таӵе вакчиятонъёсты уже куто
мкш (яке млкшн) — малы ке шуоно
бт — бадзым тау
влмн — валамон
мк. — мукет
но мз. (но музон), но мк. — но мукет
но мк.с.в. («но мсв» неофициальной югдурын) — но мукет со выллем
но о.а. — но озьы азьлань
ои — озьы ик
с.л. — со лыдын (ик)
а.э. азьло — асьме эралэсь азьло
тшп — туж шумпотӥсько
ссь — сярысь (официальной югдурын)
сь — сярысь (неофициальной югдурын)
тбт — туж бадзым тау
ксь — кылсярысь
тшп тп — туж шумпотӥсько тон понна
шсв — шуг со сярысь вераны
я. — яке
ои — озьы ик
Со сяна удмурт кылын таӵе аспӧртэмлыкез шедьтыны луэ: англи кылысь асэстэм кылъёсты удмуртъёс асьсэ букваосынызы гожъяло. Кылсярысь, «ӝинсы», «диӝей», «ӝакузи» но о. а. Та амал но вакчиятонъёс пӧлы пырыны быгатэ, уго со, кылсярысь, «дж» гожтонлэсь уте ини.
Удмурт кыллэн Интернет улоназ тунсыко на эшшо одӥг аспӧртэмлык — диалектной вакчиятонъёс. Егитъёс вераськоназы литературной кылысь куд-ог кылъёсты шумпотыса вакчиято (озьы соос асьсэ гуртазы асьсэ диалектэн верасько но туж ӵемысь таӵе формаосты вотэсын но куто), кылсярысь:
Мын ни ай — мын няй
Собере — сре
Шуисько — шко
Гинэ — гнэ
Тодӥсько — тосько
Оломар луисько — ома луко
Мар со — мащё
Озьыен, удмурт кыл Интернетын улэ, сое уже куто, млкшн (?) ортчем трансформациос ӵапак вотэслы тупамонэсь луо — соос вакчиесь но валамонэсь.
Малы кулэ таӵе воштӥськонъёс но малы соослэсь кышканы уг яра? Та юанлы валэктон сётэмын ини — али кыл вотэсын азинске, солэн улонэз книгаосысь электронной ресурсъёсы но пыӵаны кулэ. Туала егитъёслэн нылпиоссы но соослэн нылпиоссы кылэз уже мед кутозы шуыса, соос понна контент кылдытоно, мукет сямен кыл быроз.
