29-тӥ куарусёнэ Удмурт кылын шонер гожъяськонъя элькун ӧрилэн ёзчиосыз люкаськылӥзы. Пумиськонлэн мугез — удмурт кылын шонер гожъяськонъя кыллюкамез эскерон. Со сярысь ивортэ Йӧскалык политикая министерстволэн пресс-службаез.
Ӧрилэн ёзчиосыз тупатъям правилоос пумысен мылкыдзэс шараязы, споръяськоно юанъёсты сэрттӥзы-пертчизы, дасям кыллюкамлэсь кулэлыксэ пусйизы.
«Ойдо дышетом удмурт кылэз тодмо удмуртъёсын!» ӵектос ялӥзы кылем арын Глазкарысь «Зеленый мир» нылпи лыдӟетъюртын. Радъяське со быдэсак онлайн амалэн.
Ӵектослэн авторез Елена Блинова видео пыр тырше пиналъёсты удмурт кыллы дышетыны, озьы ик соослы удмурт книгаосмес возьматыны.
Пиналъёсты удмурт кылъёсын тодматӥзы ини «Удмурт Кенеш» огазеяськонлэн Тӧроез Татьяна Ишматова, «Удмурт дунне» газетлэн валтӥсь редакторез, «Удмурт нылкышно кенеш» огазеяськонлэн кивалтӥсез Елена Миннигараева, «Удмуртие» телерадиокомпанилэн валтӥсь редакторезлэн воштӥсез Сергей Касаткин, «Иднакар» газетлэн валтӥсь редакторез Елена Пономарева но мукетъёсыз.
Тунсыко но аспӧртэмлыко ӵектосэн пыр-почгес тодматскыны быгатӥськоды «Время приключений в Зелёном мире» огинэ выжыса.
Ижкарысь 284-тӥ номеро нылпи сад дасяське выль дышетскон арысен удмурт группа усьтыны. Али со бордын нимысьтыз ӧри ужа ини.
Нимысьтыз ужась ӧрие пырисько — садысь дышетӥсь, психолог, валтӥсь визьнодась, крезьгуръя кивалтӥсь но удмурт группаосын ужаны дась визьнодасьёс. Ваньзы ик люкаськемъёс бадӟым мылкыдзэс веразы «Удмурт Кенеш» огазеяськонэн кусып тупатыса ужаны.
«284-тӥ номеро нылпи сад туж мыло-кыдо пыриське пӧртэм удмурт ужрадъёсы, инъетсы соослэн дась», — шуэ «Удмурт Кенеш» огазеяськонлэн Ижкарысь Октябрь ёрос ёзэтэзлэн кивалтӥсез Валентина Ившина.
«Удмурт Кенеш» огазеяськон ивортэмъя.
24-тӥ инвожое, Егитъёслэн нуналзылы сӥзьыса, Ижкарын «Удмурт-а мон?!» улосвылкуспо форум ортчиз. Отчы 100 пала мыло-кыдо удмурт егитъёс пыриськизы.
Форумез радъязы Удмуртилэн Кун Кенешысьтыз тодосъя, дышетонъя, лулчеберетъя, туризмъя но йӧскалык политикая ялан ужась ӧри, «Удмурт Кенеш» огазеяськон но удмурт егитъёслэн «Шунды» огазеяськонзы элькунысь йӧскалык политикая министерство юрттэмъя.
Форумлэн нырысь ик пленарной кенешонэз ортчиз. Егитъёс люкаськизы Удмурт Элькунысь Кун Кенешлэн юртаз. Кенешонэз нуиз «Удмурт Кенеш» огазеяськонлэн Тӧроез Татьяна Ишматова. Со пусйиз, форум радъямын вал егитъёслэсь мылкыдзэс ӝутон, кулэлыксэс шӧдытон, ас кужымзылы оскон пыӵатон понна шуыса.
Егитъёсты ӟечкыласа вазиськизы Кун Кенешлэн тӧроез Владимир Невоструев, йӧскалык политикая министр Эдуард Петров, Егитъёсын ужан политикая агентствоен кивалтӥсь Алексей Выстребов, Удмурт егитъёслэн «Шунды» огазеяськонзылэн тӧроез Виолетта Анисимова.
Форумлэн пленарной люкетаз ик докладъёс но чузъяськизы. «Даур ТВ» интернет-телевиденилэн кылдытӥсез, Удмуртиысь Калыкъёслэн эшъяськон юртысьтызы методист Богдан Анфиногенов егитъёслэн туала удмурт ӵектосъёссы пумысен вераськиз. Нош «Шунды» огазеяськонэн 2008-тӥ-2009-тӥ аръёсы кивалтӥсь, Йӧскалык прессалэн юртысьтыз ӧнерчи Людмила Чернова мадиз удмурт азьветлӥсьёсты будэтонын «Шундыкар» лагерьлэн бадӟым интыез сярысь.
Пленарной кенешон бере форумлэн ужез секциосын азьланьтӥськиз. Отын егитъёс улонзэс проект амалэн радъян пумысен кенешизы, мерлыко вотэсъёсын ужан амалъёсын тодматскизы, ас куаразылы но мугорзылы кузё луон сярысь мастер-классэ пыриськизы.
Пумиськон радъяськиз Калыкъёслэн эшъяськон юртазы. Ужэрадэз нуиз огазеяськонлэн Тӧроез Татьяна Ишматова. Пичи кенешлэн ужаз пыриськизы йӧскалык политикая министр Эдуард Степанович Петров, дышетонъя но тодосъя министр Светлана Михайловна Болотникова.
Пумиськонын котьку сямен лэчыт юанъёс ӝутэмын вал анай кылэз дышетон пумысен. 1-тӥ куарусёнысен школаос выль Федерал кун стандартъёсъя ужаны кутскозы. Таяз арын отчы 1-тӥ-5-тӥ классъёс выжозы. Нош быдэсак со улонэ пыӵаны кулэ 2025-тӥ арозь. Соин ик кенешчиослэн сюлмаськонъёссы кылдо, кызьы выль стандартъёс улсын дышетон радъямын луоз шуыса. Светлана Михайловна пусйиз, та учыре удмурт кылъя урокъёс кулэстэмын уз луэ шуыса.
Шуг-сектъёс кылдо удмурт учебникъёсъя но. Татарстанысь удмуртъёс али дыре электрон учебникъёсын дышетско шуыса вераз Лулчберетъя автономизылэн кивалтӥсез Андрей Сергеевич Герасимов. Татьяна Витальевна валэктӥз, со понна интыысь дышетонъя министерствоосы вазиськыны кулэ шуыса. Уго Удмуртиысь учебникъёсты басьтон понна соос коньдон висъяло. «Зэм но, та юан трос пол ӝутэмын ни вал Кукморын но, Балтасиын но. Но малы ке сое быдэстыны уг пӧрмыто али ке но. Ми но таӵе ик амалэн Татарстанысь бигер кылъя учебникъёсты октӥськом. Башкириысь удмуртъёс но учебникъёсмес капчиен басьто», — шуиз со. Ватсаса вераломы на, палэснысь удмуртъёслэн азьпалан шуг-секытъёссы медаз кылдэ шуыса, «Удмур Кенешлэн» кичӧлтэмезъя, Удмурт Элькунысь йӧскалык политикая министерстволэн выль кун программаяз удмурт кылъя учебникъёсты басьтон понна ватсаса люкет пыртэмын. Оскиськом, программа улонэ пыӵалоз шуыса, но учебникъёс котькуд школае вуозы.
Ӵапак али дыре со кун программаез юнматон но сое уксёен тырмытон бордын министерствоын уж нуиське. Со сярысь кенешчиослы ивортӥз Эдуард Степанович. Вань удмуртъёслэн 14-тӥез ӧтчамазы Резолюцие кутэм мукет ужъёслэн быдэсъяськеменызы но тодматӥз министр. Кылсярысь, со элькунамы кык кун кылъёслэн кутӥськемзы сярысь. Берло дыре ужъюртъёс, огазеяськонъёс но предприятиос нимъёссэс ас валамзыя но удмурт кылэз тодэмзыя берыктыны кутскизы. Соин ӟуч кылысь удмурт кылэ нимысьтыз берыктӥсьёсты юнматозы.
Удмурт кылъя улоскуспо олипиада 17-тӥ оштолэзе ортчиз. Нош толон, 26-тӥ куартолэзе, Ижкарысь 60-тӥ школаын вормисьёсты но призёръёсты данъязы.
60-тӥ школаын удмурт кылъя олимпиада 2010-тӥ арысен радъяське ни. Но берло кык арзэ дистант амалъя ортче. Кызьы шуо радъясьёс, со луонлык сётэ Удмуртиысь сяна, Татарстанысь, Башкириысь пиналъёслы но анай кылэз тодэмзэс возьматыны.
Олимпиадае котькуд мылкыд карись пинал пыриськыны быгатэ. Туэ удмурт кылъя тодон-валанзэс 2-тӥ-8-тӥ классын 100 дышетскисьёс эскеризы: элькунысьтымы 84 нылпи, Татарстанысь — 15 но Башкортостанысь — 1 адями.
Дэри ёросысь удмурт кылэз дышетӥсь пиналъёс понна «Гуждор» фестиваль туэ кыкетӥ ползэ ортчиз ни. Радъяськиз со «Лудорвай» музей-заповедникын.
Таяз радэ школаын дышетскисьёслы гинэ ӧвӧл, садике ветлӥсь пичыльтыкъёслы но празднике вуылыны луонлык кылдытэмын вал. Куное озьы ик ӧтемын вал элькунысьтымы Пичи Пурга ёросысь но Татарстанысь Агрыз ёросысь пиналъёс но.
Мыло-кыдо, удмурт шӧмо пӧрмытизы фестивалез люкаськемъёс. Калык дӥськутэн лыктэм нылъёс но пиос сцена вылысен кылбуръёс лыдӟизы, кырӟазы-эктӥзы, сценкаос но мода возьматӥзы.
Удмурт пиналъёсыз праздникен ӟечкыланы вуылӥзы Дэри ёрослэн йырыз Константин Русинов, «Удмурт Кенеш» огазеяськонлэн Тӧроез Татьяна Ишматова, Дэри ёрос ёзэтмылэн кивалтӥсез Лидия Биянова. Соос пиналъёслы азинлыкъёс сӥзизы, тау кылъёссэс веразы анай-атайёссылы, визьнодасьёссылы, дышетӥсьёссылы тыршемзы понна, нылпиослы удмуртлыкез пыӵатыны амалъёс шедьтэмзы понна.
Ужзы «КУАРА» огинлэн клипмейкингъя «Пус» лаборатория улсын быдэстӥське. Та ӵектоссы «Лулчеберетъя кичӧлтонъёсын» Азьмуртлэн Фондысьтыз грантсэ утӥз.
Нырысь-валысь клипмейкингъя лабораторие пыриськисьёс интенсиве люкаськылӥзы. Отын соос выризы предпродакшнэн: котькуд клиплы сториборд дасязы, тыл бордын, образъёс бордын ужазы, клипъёсты снимать карыны интыос но геройёс утчазы, малпанъёсынызы кырӟасьёсты тодматӥзы.
Лабораторие пыриськемъёслэн верамзыя, интенсив улсын ик ортчиз онлайн пумиськон Москваысь монтажёрен, видео колористэн, Хохлов Сабатовский киношколаысь ӧнерчиен Евгений Тенэн.
Со люкаськемъёслы видео лэсьтон удыслэн ужамез сярысь вераз. Со сяна, Евгений «пусчиос» пӧлын вожвылъяськон ортчытоз на, устоез проектэз лэсьтӥсьёслы кенеш сётоз, клипсэс буяны юрттоз.
Клипмейкингъя «Пус» лабораторие пыриськисьёс ньыль съёмочной группалы люкемын. Та дырлы нырысетӥ клип дасямын ини IVINAVI проектлы. Таяз арняе ужзэ мытоз но выль клип бордын тыршоз кыкетӥез группа.
Удмурт кун университетлэн лыдӟетъюртаз Дэри ёросысь дышетӥсьёс понна «Мынам удмурт кылъя (литературая) пӧлэстэм уроке» вожвылъяськон ортчиз. Малпаз но радъяз сое Лудорвай шоръёзо школалэн директорез, этнокультураез азинтонъя «ЛудДор» ресурс центрлэн кивалтӥсез Надежда Николаевна Мерзлякова.
Ужрад улсын удмурт кылъя но литературая дышетӥсьёс физикая, математикая, экологияя, англи кылъя, физкультурая, крезьгуръя, психологияя ӧнерчиосын ӵош огазеяськыса, пӧлэстэм урокъёсты нуонъя мастер-классъёс возьматӥзы. «Адӟыны луиз, кызьы пӧлэстэм урокъёс пыр удмурт кыллэсь тодон-валан сётон удысын кутӥськемзэ паськытатыны, дышетскон ужпӧрез нылпилы тунсыко карыны, улон шоры паськытгес учкыны дышетыны луоно» — вераз «Вордскем кыл» журналлэн валтӥсь редакторез, вожвылъяськонлэн жюриезлэн ёзчиез Андрей Клементьев.
Вожвылъяськонлэсь Гран-призэ басьтӥзы Шор Постол шор ёзо школаысь удмурт кылъя но литертурая дышетӥсь Надежда Васильевна Кабанова но математикая дышетӥсь Юлия Алексеевна Бобылева.
«Удмурт кылъя (лыдӟиськонъя) устоез пӧлэстэм урок» номинациын устоосыз луизы Юськи шоръёзо школысь покчи классъёсын дышетӥсь Елена Васильевна Иванова но физкультурая дышетӥсь Ирина Александровна Глухова. «Удмурт кылъя (литературая) устоез пӧлэстэм урок» номинациын вормизы Изгурт шоръёзо школаысь удмурт кылъя но литературая дышетӥсь Галина Витальевна Мамонтова но экологияя дышетӥсь Христина Григорьевна Липина.
Вожвылъяськонын оглом возьматэмын вал 13 мастер-класс. Устоосыз мастеръёс ӟечкыламын луозы 12-тӥ куартолэзе «Гуждор» фестивальын.
2-тӥ оштолэзе Удмуртиын но солэн палэназ дас одӥгетӥзэ ини «Бадӟым удмурт диктант» акция ортчиз. Туэ со Удмуртиын ялэм Дышетонлэн арезлы сӥземын вал. Диктантлэсь текстсэ гожтӥз «Кенеш» журналлэн валтӥсь редакторез Анастасия Шумилова.
Диктантэз туэ гожтыны луиз «Мынам Удмуртие» радиолэн но телевидениелэн меӵак эфирез улсын, озьы ик каръёсын но ёросъёсын усьтэм площадкаосын. Удмуртиын сыӵе площадкаос ужазы 125 интыын, со сяна 30 площадкаос усьтэмын на вал мукет улосъёсын но.
Радъясьёслэн верамзыя, Удмуртиын сяна, удмурт диктант гожтӥзы Москваын, Санкт-Петербургын, Муромын, Башкортостанын, Татарстанын но Марий Элын.
Акцие оглом 2 943 мурт пыриськиз. Со пӧлысь 700 котырез – текстэз радио пыр лыдӟем улсын гожтӥз. «Бадӟым удмурт диктант» ужрадэ пыриськисьёс пӧлын тужгес пиналъёсыз Ижкарысь, Башкортостанысь но Татарстанысь 7 аресъем вить пиналъёс луизы. Нош тужгес арлыдоосыз – Балезино ёросысь 85 аресъем кык нылкышноос. Ваньмызлэсь трос диктант гожтӥсьёс — Дэри ёросын улӥсьёс.
Диктант гожтӥсьёслэсь ужъёссэс Удмурт кун университетысь Удмурт кылосбуръя, финно-угроведениея но журналистикая институтысь дышетӥсьёс учкизы. Озьыен, диктантэз янгышъёстэк гожтӥз но 100 балл люказ 92 адями.
Бадӟым удмурт диктантэ пыриськемъёс асьсэлэсь баллъёссэс тодыны но электрон сертификат басьтыны быгатозы 16-тӥ куартолэзьысен та чӧлскетъя — udmdiktant.ru
Гужем смена ужалоз 23-тӥ инвожоысен 28-тӥ инвожоозь «Березка» санаториын.
Лагерь туэ кыкетӥ ползэ ортчоз. Сменаез радъян понна Ува ёросысь дышетӥсьёс но «Удмурт Кенеш» ёзэтлэн ёзчиосыз та унналъёсы кенешонэ люкаськылӥзы.
«Ӟучомем ёросмы понна та ужрад туж кулэлыко но пайдаё луэ, — шуо гужем сменаез радъясьёс. — Кылем арын пиналъёсмы трос выльзэ тодӥзы: журналистикаен тодматскизы, видеосъёмка но видеомонтаж лэсьтон бордын тыршизы, арганэн но кубызэн шудыны дышетскизы но трос мукет. Но валтӥсез – вить нунал ӵоже отын чузъяськиз удмурт кыл».
Ивор басьтэмын «Удмурт Кенеш» огазеяськонлэн мерлыко вотэсбамысьтыз.
Текстлэн авторез «Кенеш» журналлэн валтӥсь редакторез Анастасия Шумилова луоз
Та сярысь огкылэ вуиз акциез радъян бордын ужась группа. Диктантлэн текстэз сӥземын Удмуртиын ялэм Дышетонлэн арезлы. Нош гожтонлэн нуналыз юнматэмын Ашальчи Окилэн вордскем нуналэзлы матэ карыса.
Тодады вайытом, акци радъяське «Мынам Ужмуртие» телерадиокомпаниен, йӧскалык политикая министерствоен, «Удмурт Кенеш» огазеяськонэн но УдГУ-ысь ӧнерчиосын.
Кылем арын Удмуртиын 45 площадкаосын диктантэз гожъязы. Со сяна, Россилэн мукет улосъёсаз 13 площадка ужаз.
Удмурт егитъёслэн «Куара» студиязы Элькунысь кык тодосчиос вуылӥзы.
Филология тодосъёсъя кандидат, УдГУ-ысь тодосчи Галина Шушакова мадиз удмурт калык выжыкыл сярысь, нош этномузыколог Екатерина Софронова вераз удмурт крезьгуро фольклорез бичан но эскерон амалъёс сярысь.
Конкурсэ пыриськыны быгато 16 аресысен 35 аресозь егитъёс.
Келяно удмурт кылын гожтэм но нокытын печатласькымтэ ужъёсты.
Номинациос:
Котькуд номинацияя куинь вормисьёсты бырйыны чакламын. Соос 5 сюрсысен 25 сюрсозь коньдон премиосын пусъемын луозы, яке Йӧскалык прессая юрт юрттоз соослы книгазэс поттыны.
Вожвылъяськон сярысь ужкагаз татын
Фильм нимамын «Кин кызьы узырме, яке ограбление по-удмуртски». Сценарий гожтон уж кема кыстӥськиз, ар пала. Оскиськом, туэ гужем кутском ни съёмкаос борды. Та вакыт краудфандинг амалэн уксё люкаськом
Максим Григорьев, Удмурт Театрысь артист
Выль удмурт фильм бордын ужан, Удмурт Театрлэн выльдэм репертуарез сярысь вераз Удмурт Театрысь артист Максим Григорьев «Даур ТВ» интернет-телеканаллэн эфираз «Нуназе подкаст» телеадӟытонын
туспуктэм басьтэмын Максим Григорьевлэн вотэсбамысьтыз
Выль проектлэн нимыз — ПУС лаборатория. Отчы котькуд мылкыд карись кырӟась пыриськыны быгатэ. Курон — кырӟан азьвыл ик гожтэмын луыны кулэ ини.
Оглом 4 крезьгуро адӟытон дасямын луоз.
ӵектосэ пыриськон вылысь курон келяно та чӧлскетъя
Тодады вайытом, «Куара» огазеяськон клипмейкинген кемалась тодмо ини. «Тамга» видеошкола улсын озьы ик видеоклипъёс лэсьтэмын вал.
Удмурт нылпиос понна «Шундыкар» лагерь смена 15 -тӥ гудырикошконэ кутскоз. Отчы пыриськон вылысь нимысьтыз вожвылъяськон ялэмын.
Мар кароно лагере шедён понна?
Нимтулдэс, вордӥськем ардэс, улон интыдэс, кыӵе классэз быдтэмдэс, пӧртэм огазеяськонъёслэн ужазы пыриськемдэс, «Шундыкар» лагере вуылэмдэс (арзэ но ӧрзэ) гожтыса, телефон номердэс яке электрон почтадэс, быръем ӧрдэс пусйыса гожтэт келяно.
Быръем ӧрдыя уж быдэстоно:
Ужъёстэс ыстоно 20-тӥ пӧсьтолэзёзь таӵе адресъя: 426063, Ижкар, Орджоникидзе урам, 33-тӥ «а» юрт, 204-тӥ висъет яке электрон почта пыр udmshundy@mail.ru адресъя быръем ӧрдэс гожтэтлэн темаяз пусйыса.
Йылпумъянъёс 1-тӥ гудырикошкон бере поттэмын луозы «Шунды» огазеяськонлэн shundy.ru вӧтэс бамаз, «Шундыкар» лагерьлэн «ВКонтакте» бамаз, «Удмурт дуннеын» но мукет элькун СМИосын.
Кылдэм юанъёсын вазиськоно «Шунды» огазеяськонлэн тӧроезлы Вадим Крестьяниновлы 8-919-695-32-06 номеро телефоня, яке«Шунды» огазьяськонлэн правлениезлэн ёзчиезлы Алиналы Черновалы
8 (951) 218-35-33.
Азьветлӥсьёс лэсьтэм ужъёссылы дунъет сётӥзы, вуоноезлы быдэстоно ужпумъёс пуктӥзы.
Школаосын но нылпи садъёсын ӟеч кусыпъёс юнматоно шуизы люкаськемъёс. Пиналъёсын ужъёс нуоно. Асьме историенымы, культураенымы соосты тодматон бордын тыршоно, ӵошен калык праздникъёсты ортчытъяно.
«Пӧртэм творчествоя кружокъёсты но радъясалмы ке, умой луысал, школаос гинэ солы дась мед луозы» — пусйизы кенешчиос.
Милям семьямы туж тунсыко. Ачим городын вордӥськем но будэм удмурт, кузпалы Трансильваниысь мадьяр, кык нылъёсмы нош пичиысен ик ини пӧртэм кылъёсын тодмоесь. Нырысь ик верало ачим сярысь.
Кыӵе ке ужрадъёсын монэ адямиос ӵемысь юало:
Кыӵе ёросысь тӥ?
Шумпотыса вазисько: Индустриальной!
Карын будэмме тазьы валэктоно луисько. Зэм, ӵемысь озьы луэ: удмурт гуртысь ӟуч городэ вуыса, анай-атайёс вордскем нылпиосынызы автоматически ӟуч сямен вераськыны кутско, карын удмурт кылэз дышетыны луонлыкъёс ӧжытгес уго (мон пичи дыръя воксё но ӧй вал!). Но анаелы бадӟым тау шуисько, монэ удмурт сямен кӧкыын веттамез, нуныямез понна!
Эшшо ке, ясли сюрымтэен, монэ одӥг арлы гуртэ песянае доры келяло. Татын скал йӧлын ӵош пыӵаз, дыр, ини удмуртлык но удмурт сям!..Но таин история уг быры. Нылпи садэ мынон дыр вуиз. Нош садын воспитатель но ӟуч, пиналъёс но ӟучесь. Мынам йыры сураськем, лэся: вераськемысь воксё но дугдӥськем. Соин анае-атае ӟуч сямен вераськыны кутскизы монэн – мукет луонлыксы вылымтэ, лэся. Озьы мон «ӟучомем» луи. Гуртэ вуылыкум но, пумитам удмурт сямен вазьыкузы, ӟуч сямен вазисько вал. Но пичиысен йӧлын пыӵам анай кыл, озьы гинэ уг ышы. Кызьы кидыс шуныт, небыт музъеме сюрыса пушъет сётэ, озьы ик кылмы но, ӟеч луонлыкъёс кылдыку, шарае потэ. (Соин ик тодосчиос пусъё, макем вазьгес кутске нылпи анай кылэз дышетыны, сокем умойгес).
Тодӥсько на, школаын дышетскыкум ини, киям «Анай кыл. 2-тӥ класс» учебник сюриз. Анаелы соку шуи: «Удмурт кылэз дышетэме потэ!». Озьы, пичиен-пичиен, ачим-а, анаелэн юрттэменыз-а, учебникысь ужъёсты лэсьтыса, удмурт кылэз дышетыны йӧндыри. Берло ини карын но луонлыкъёс кылдӥзы удмурт кылэз дышетыны. Ижкарысь Гуманитарной лицее дышетскыны пыри, кытын анай кылэн гинэ ӧвӧл, удмурт литератураен, этнографиен, историен, финн кылэн но финн-угор калыкъёслэн лулчеберетэнызы тодматскыны луонлыке кылдӥз. Со сяна, пӧртэм финн-угор шаеръёсы но вуылӥм: Марий Элэ, Коми Республикае, Эстоние, Финляндие, бускель Татарстанэ но. Вот таиз зэмзэ «тылгизьы аратӥз» та бадӟым дунне вылын асме удмуртэн шӧдон понна,
кин луэмме валан понна. Та ик луиз, дыр, азьпал улонам нырысетӥ вамыш но…
Дышетскыны келяны туртто вал Эстоние, но шуи: уг мыны. Одӥг ар куспын Удмурт кун университетын Удмурт филология факультетлэн финн-угор (мадяр) ёзэтаз дышетскыны кельшиз. Кӧня ке пол вуылӥ Мадяр шаере, вуоно кузпалыным тодматски.
Миклош Дэметэр – кузпалы – Трансильваниысь (Румыниысь) сэкей (székely, нем. cеклер, рум. секуй) выжыысь мадяр, Карпат гурезьёс дорын Шепшисэнтдёрдь карын вордӥськем мурт. Румыниын вордӥськемын но будэмын ке но, румын кылэз лябгес тодэ; отысь мадяръёс доразы, дышетсконниосын, ужан интыязы яке урамын котьку мадяр сямен верасько.
Анай кылзэс но лулчеберетсэс гажамзы котькытын шӧдӥське: газет бамъёсын-а, юртъер пушкын-а, дӥсьсы вылын-а, школа урокъёсын-а. Вераны кулэ, нырысетӥ дунневыл ожын Трансильваниен ӵош Венгрилэсь «вандэм» Сэкей шаер, али ке но ас эрикез понна, Румын кун пушкын автономия понна нюръяське. Нимысьтыз элькунзы ӧвӧл ке но, анай кылзэс юн утё, ог-огенызы валче улыны тыршо. Мадяр шаерын тодматским бере, нырысь аръёссэ отын ик улӥм (кузпалы дышетске на вал ай). Нылъёсмы но отын ик вордӥськизы. Печ университетысь дышетӥсьмы Эва Фанчали
нылъёсыным одно ик анай кылын вераськыны косӥз, индылэмез али ке но пелям.
Миклошен но озьы кенешим, со ас кылыныз, мон ас кылыным вераськом шуыса. Сотэк кызьы нылъёсмы песянай-песятайёсынызы, ӵыжы-выжыосынызы вераськозы. Нош ӟуч кыл пумысен ӧм кышкалэ: Россие вуылыса, одӥг адями но ӟуч кылэз тодытэк ӧз кыльы на!..
Озьы дорын вераськон кылъёсмы удмурт но мадяр кылъёс луизы. Нырысь аръёсы нылъёсмы кылъёсты суралляло ик вал, кытӥяз мадяр кылъёс борды удмурт кылпумъёс но кылъёс ватсалляськизы (viszi-сько «нуисько», labda-е «тупе», pohár-ез «стаканэз», уг pisi oda «уг чисьы отчы»), кытӥяз удмуртэз борды мадяр кылпумъёс (meg-зыра-ljuk «зыралом», буд-nak «будо», кутӥсь-kodok «кутӥськисько», гоп-ba «гопе», дэрем-em «дэреме»), яке веранъёссэс кылысь кылэ «калька» амалэн берыктылӥзы (ez fáj volt «вӧсь вал» (ez fájt интые), кезьыт вань(hideg van) но мукет). Но вераськыны дышетскись пичи
мурт одӥг кылын вераськыкуз но янгышъёс лэсьтэ, соин ик со пумысен
сюлэмшугъяськонъёсмы ӧй вал, тодӥм, берло ваньмыз интыяз пуксёз шуыса, будэмзыя сураськемысь дугдозы шуыса.
Мадяр шаерын, мадяръёс пӧлын улыса, семьяямы но мадяр кыл тросгес чузъяськыны кутскиз, валтӥсь кыл луиз, шуыны луоз (кузпалыным но ӵемысь та кылын вераськиськом, удмурт кылэз тодэ ке но). Но удмурт кылмес семья пушкамы утиськом. Со понна трос ик кулэ ӧвӧл: нылъёсыным КОТЬКУ удмурт сямен вераськыны тыршисько (мыным мадяр сямен берен вазё ке но), удмурт книгаосты лыдӟиськом, удмурт кырӟанъёсты но радиоверанъёсты кылзӥськом, интернэтысь «Шудон корка», «Мон егит» но мукет телеадӟытонъёсты учкиськом, удмурт шудонъёсын шудӥськом.
Но валтӥсь кыл но ас интызэ ыштыны, лябомытыны быгатэ, тупась учыр шеде ке. Кылсярысь, куке огпол гужем мон нылъёсыным дорам Удмуртие бертӥ, нош атаймы Венгрие кылиз, куинь аресъем Инӟы (Gyöngyi), одӥг толэзь куспын удмуртъёс пӧлын улыса, мадяр кылзэ ик вунэтӥз. Толэзь ортчыса, атаез вуэм бере, соин удмурт сямен вераськиз – Миклош паймемын вал! Но берло, конечно, выльысь тодаз ваиз. Со дырысен Инӟымы удмурт но мадяр кылъёсын огкадь вераське. Катюшмылэн (мадяр сямен Kata) Удмуртиын улыкумы (кузпалы 4 ар УдГУ-ын мадяр кыллы дышетӥз) валтӥсь кылэз удмурт вал, удмурт нылпи садэ ветлӥз. Нош Трансильвание улыны кошкеммы бере, тросгес мадяр кылын вераськыны кутскиз, но осконэ ноку но оз бырылы – Удмуртие вуим ке, удмурт кылзэ нош тодаз ваёз шуыса. Озьы ик луиз! Туэ гужем Удмурт шаере вуылыкумы, ӵыжы-выжыосынымы, эшъёсынымы удмурт сямен вераськиз. Со сяна, вераме потэ на, нылъёсмы мукет выжы калыкъёслэсь кылзэс умой шӧдо, капчиен дышето шуыса. Иностранной кылэн нырысь пумиськонзы Венгриын вал, улон интыямы
бускельёсмы немецъёс вал, уго. Гужем шутэтскыны шуыса вуэм бускельёс шоры пичи нылъёсмы часъёсын но учкыны дась вал, дыр, туж тунсыко потэм, лэся, тодмотэм, валантэм немец кыл. Кӧня ке дыр ортчыса, нылъёсмы ог-огенызы ас «немец» кылынызы вераськыны туртто вал ини, немец интонациез, куд-ог куараосыз вераськоназы пыртыса, шудон-каламбур кылын вераськизы.
Нош Россие вуыса, ӟуч кылэз тодӥсьтэм нылъёсмы понна сыӵе каламбур кыл ӟуч кыл луиз. Нылпи садэ ветлыны кутскытозязы ик, урамысь кылэм ӟуч кыл соос понна шудон кыл луиз ини, «да», «нет», «на», «давай», «девочка», «один», «два» но мукет кылъёс шудон сямен вераськоназы пыризы. Берло ини нылпи садын но школаын вераськон ӟуч кыл азьпал интые потыны кутскиз, удмуртсэ но мадярзэ «сэргы шымыртыны» турттыса, но атаймы ӝог гинэ талы пум понӥз, «ӟуч кылын вераськемды потэ ке, мынэ бускельёс доры» шуыса. Школаын дышетскись Инӟы но садике ветлӥсь Катюш дорамы ӟуч кылын трос вераськыны ӧз дӥсьтэ ни. Бен, куддыр таӵе чурыт амалъёсты но кутоно луэ, сотэк сыӵе окружениын улыса анай кылмес утьыны но азинтыны шуг луысал.
Табере нылъёсмы кыксы ик школаын дышетско ни. Румыниын улӥськом бере, мадяр кылэз сяна, румын кылэз но дышето. Татын нырысетӥ классысен ик англи кылэз дышетыны кутско, куатетӥ классысен немец кыл ватсаське на. Лыдъялэ ай, ваньмыз кӧня кыл луэ? – Удмурт, мадяр, ӟуч, румын, англи но немец (тямысэтӥ классын латин кылэз дышетозы на) – куать кыл ганяк пичи йыръёсазы тэре, огез мукетсэ дышетыны юртто гинэ, уг люкето. Мон сямен, кылъёсты тодон – со шумпотон! Юнме уг шуо ук, кӧня кыл тодӥськод, сомында адями луиськод. Сое, жаляса верано, уг валало сыӵе адямиос, кудъёсыз одӥг кыл сяна уг тодо. Нылпи садысьтымы психолог группаысь анай-атайёсты индылӥз: дорады тросгес вераське ӟуч кылын, ӟуч кыл – со кун кыл. Виры ик пӧзьыны кутскиз! Нош удмурт кыл – кун кыл ӧвӧл, шат? Кытын собере удмурт кылын вераськоно, семьяын ке ӧвӧл. Кин утёз, азинтоз на удмурт кылмес, удмурт семья ӧз ке утьы? Сокем огшоры – вераськыны гинэ кулэ ук! Соин ик, малпасько, нылпиосын вордскем дырысенызы ик анай кылын вераськоно. Но со гинэ тырмыт ӧвӧл. Школаын гинэ ӧвӧл, нылпи садысен ик кутсконо вал ини удмурт кылэз дышетыны быдэс элькунамы. Ӟуч но мукет выжы калыкъёслэн пиналъёссылы со сокем шуг ӧвӧл. Макем вазьгес кутске адями мукет культураен тодматскыны сокем умойгес, капчиенгес дышетэ кылэз но. Мон ачим но нылпи садын
ужай, карысь нылпиосты удмурт кыллы дышетӥ. Та юан шоры кыкнапал ласянь учкыны быгатӥсько: анай сямен но, дышетӥсь сямен но. Ӵемысь ӟуч анай-атайёслэсь но кылыны луэ вал, макем нылпизылы кельше удмурт кылэз дышетыны, удмурт кырӟанъёсты кырӟаны, удмурт дэремен дӥсяськыны. Кык яке тросгес кыл дышетонэз асьме элькынамы но огшоры ужен, «естественный процессэн» лыдъяны кулэ, кызьы со дуннелэн пӧртэм сэрегъёсаз пӧртэм калыкъёс пӧлын лыдъяське
туспуктэм — Дэметер кузпалъёслэн вотэс бамъёсысьтызы
Малпаськоды гинэ ай яке возьмаськоды ни ке билингва нылпиез
Лариса Широбокова (PhD)
билингва (кыккылолыко) нылпиослы ӟуч кылэз дышетӥсь
англи кылэз дышетӥсь (Magic Teacher Hocus&Lotus)
Рим, Италия
Берыктӥз Александр Егоров (канд. филол. наук)
Ужрад улсын кенешчиос шаерлэн кивалтӥсезлы проектъёссы но асьсэ кужмынызы радъям ужрадъёссы сярысь веразы
2019-тӥ арысен ини Азьмурт грантъёсъя Фондлэн юрттэменыз «Удмурт Кенешлэн» нылкышно творчествоя «Чеберай» марафонэз ортчытӥське. Со Удмуртиын одӥгез яркытэз но тужгес бадӟымез йӧскалык ӵектос луэ. «Чеберай» марафон кышномуртлэн чеберлыкез пыр удмурт йӧскалык лулчеберетэз но киужез вӧлмытыны, удмурт нылкышноослэсь гуртъёсын улонзэс творчество но ужбергатон пыр ӟечлыкогес карыны, тужгес устолыко удмурт нылашъёсты но кышномуртъёсты шараяны, быгатонлыкъёссэс калыке поттыны но азинтыны чакламын.
Марафон улсын туннэ нуналлы ортчоно ужрадъёсын ӵектослэн кивалтӥсез Ксения Широбокова тодматӥз: «Али дыре марафонлэн командаез «Cheberai» журнал поттон бордын тырше. Отчы «Чеберай-2020» вожвылъяськонлэн быръён люкетаз вормись нылашъёслэн но нылкышноослэн киужъёсын мастер-классъёсы пырозы. Озьы ик «Чеберай – 2020» вожвылъяськонлэн фналэзлы дасяськон мынэ. Со таяз арын шуркынмон толэзе Ижкарысь «Металлург» лулчеберетъя юртын ортчытыны чакламын».
Александр Бречалов «Чеберай» марафонэз туж вылӥ дунъяз. Лулчеберетмес утеммы потэ ке, таӵе устоесь проектъёс кылдытъяно, соосыз егитъёс пӧлын возьматыны дышетсконо шуиз кивалтӥсь.
«Удмурт Кенеш» туж ӟеч кусып возе Удмурт кун университетэн но. Школаосын дышетскись нылпиос но студентъёс понна котькуд ар пӧртэм ужрадъёс ортчытъясько. Тужгес бадӟымез со «Наукае нырысетӥ вамышъёсы» эскорон ужъёсын но проектъёсын улосвылкуспо ӵошатскон. Куинетӥзэ ини ортчиз Юрий Перевощиков нимо визьбур многоборье. Со 7-тӥ-11-тӥ классын дышетскись пиналъёс пӧлын радъяське. Соолэсь удмурт кылъя, экономикая но обществознания тодон-валанъёссэс эскеро.
УдГУ-ысь Удмурт кылосбуръя, финно-угроведениея но журналистикая институтлэн кивалтӥсез Наталья Кондратьевалэн верамезъя, таӵе ужрадъёс нырысь ик удмурт кылэз но лулчеберетэз азинтон понна лэсьтӥсько. «Лингвист кадь, мон вераны быгатӥсько, жаляса верано, трос пӧртэм мугъёсъя, удмурт кылэз тодӥсьёс арысь аре кулэсмо. Но нылпиос вераськизы ке, кылмы улоз», — шуиз со.
Трос ужъёс нуисько ёросъёсын но. Асьсэ кужмынызы радъям ужрадъёссы сярысь вераськизы «Удмурт Кенешлэн» ёзэтъёсынызы кивалтӥсьёс. Кылсярысь, Дэри ёросын тужгес бадӟым саклык висъяны тыршо улосчиосмылы, кудъёсыз асьсэлэн уженызы, быгатымлыкенызы данъязы асьмелэсь ошмесо Удмурт шаермес.
Глаз ёросын кенешчиос Иосиф Наговицынлэсь нимзэ ӝутонын тыршо. Со удмурт автономиез кылдытӥсьёс пӧлысь одӥгез вал. Туэ, Удмуртилэн кунлыкезлы 100 ар тырмон аре, Глазкарын удмурт кылэз дышетонэн гимнази классъёс усьтӥськозы. Нош азьланяз, «Удмурт Кенеш» огазеяськонлэн Глаз карысь но ёросысь ёзэтэзлэн кивалтӥсез Инесса Рябова верамезъя, кенешчиос школалы Иосиф Наговицынлэсь нимзэ сётыны ӵектонэн потыны малпало.
ивор басьтэмын Удмурт кенеш огазеяськонлэн сайтысьтыз
Али комиссиын выль ёзчиос но вань, соос пӧлын — удмурт егитъёс.
2020-тӥ ар понна нырысетӥзэ, комиссилэн ёзчиосыз онлайн амалэн пумиськон ортчытӥзы.
ТОК-лэн валтӥсь ужпумез — удмурт кылэз узыргес карон, терминологиез, топонимиез, орфографиез но пунктуациез радъян, со сяна ӟуч кылысь удмурт кылэ берыктон
Комиссилы бадӟым уж лэсьтыны чакламын — котькуд нунал дунне вылэ удмурт СМИ-ос пото, приложениос но нылпиос понна мобильной шудонъёс лэсьтӥсько, англи но ӟуч кылын удмурт кылэз дышетонъя видеоос лэсьтӥсько, озьы ик художественной но научно-популярной литература паськыта…ваньмыз тавыль кылъёсты — неологизмъёсты — уже кутыны куре.
ТОК-ен валче ик удмурт терминология бордын вотэсысь огшоры юзчиос но нуо. Егит удмурт азьветлӥсьёс понна но анай кыллэн узырмонэз кулэ ужпум луэ. Кылсярысь «ВКонтакте» мерлыко вотэсын удмурт кылэ берыктонъя нимысьтыз огинъёс кылдытэмын. 9 ар талэсь азьло «ВКонтакте» удмурт кылэ берыктэмын вал. Али ке но берыктон ужъёс мыно на. ТОК-лэн ёзчиосыз онлайн-берыктӥсьёслэсь дэмланъёссэс но учкыны, санэ басьтыны вераськизы.
Йӧскалык политикая министрлэн, Лириса Бурановалэн, верамезъя, нимысьтыз уж янгышъёс но опечтакаос бордын нуоно, ӵемысь соос кун ужъюртъёслэсь нимъёссэс берыктонын пумисько.
Мар возьма азьланяз учкисьёсты? Кыӵе мыно ужъёсыз телеканаллэн? Вера «ДАУР ТВ» каналлэн малпасез но валтӥсь редакторез Богдан Анфиногенов
Нырысетӥзэ ДАУР ТВ эфире 8-тӥ оштолэзе потӥз. 8 час ӵоже ВКонтакте-ысь нимысьтыз группаын канал меӵак эфирын вал. ВКонтакте-ын нуналлы быдэ трос учкисьёс понна меӵак эфир нуыны умой луонлык вань. Каналлэн программаяз художественной но документальной фильмъёс, видеолекциос, умдурт крезьгуро клипъёс, серемес видеоос, удмурт кылын мультфильмъёс, тодмо телепрограммаослэн люкетъёссы но видеоблогъёс.
Богдан Анфиногенов:
«8-тӥ куратолэзьысен эфир 15 час ӵоже мыныны кутскиз, али со 7:00 час ӵукнаысен 22:00 час ӝытозь мынэ. Таче выльдӥськон каналлы одӥг толэзь тырмонэзлы сӥземын вал. Со бере мон аслым ужпум пуктӥ — котькуд толэзе маке выльзэ ватсано, мазэ ке воштоно. Кылсярысь, 8-тӥ инвожое дорысеным меӵак эфире потыны, учкисьёсын вераськыны малпасько«
Телеканал меӵак эфире потыны кутскыку ВКонтакте-ысь группаын 2500 гожтӥськисьлэсь ӧжытгес вал, нош туннэ понна 4,5 сюрслэсь тросгес гожтӥськись ини. 26-тӥ оштолэзе телеканалэз тужгес но трос калык – 41 адями – учкиз. Нунал куспын каналэз 3-5 сюрс адями учке, нош 26-тӥ куратолэзе «Брангурт песянайёс» сярысь эфирез 15 час куспын 14 сюрс адями учкиз.
«Лыдпусъес бадзымесь ик ӧвӧл, уго контентэз но телеканаллэн огшоры ӧвӧл. Со сяна, али эфирын видеоослэсь «лултэм» возьматонъёс гинэ мыно, со материалъёсты котькудӥз мылкыд карись ачиз Интернетысь шедьтынын быгатэ. Мон администратор бере, шумпотӥсько, адямиос котькуд нунал кыӵе ке комментарий, вазиськон, кельто, эфирез Россилэн пӧртэм сэрегъёсаз – Пермьын, Татарстанын, Воронежын, Белгородын но о.а. – учко шуыса»
Тужгес но учкисьёсты удмурт кылын полнометражной фильмъёс – «Пузкар» но «Узы-Боры» тунсыкъяськыто. Куартолэзе проектэз азинтон понна уксё бичаны луонлыкез кылдӥз. Туннэ нунал понна учкисьёс 1250 манет висъязы ини.
Каналлэн эфирез зэмос телевиденилэсь туссэ басьтэ ини – татын перепеч вуттон сярысь реклама адӟыны луэ.Нош матысь дыре учкисьёсты студиысь меӵак эфиръёс возьмало, соос авторлэсь рубрикаослэн «демо-версизы» луозы. Азьланяз рубрикаос ДАУР ТВ-лэн программаосыз луыны быгатозы, со понна Калыкъёслэн Эшъяськон юртазы нимысьтыз видеостудия дасямын луоз.
«Проектлэн валтӥсь малпанэз – котькуд мылкыд карись, ачиз группае пырыса, эфирез телевизорез сямен мед учкоз. Али дырлы ваньмыз ВКонтакте-ысь репостъёс но ивортонъёс пыр ортче. Мукет сямен вераса, пӧртэм интыосы эфирез уд вӧлмытиськы ке, лентаын уд потаськы ке, адямиос уг пыро но уг учко. Но пӧлазы вань кӧня ке котьку но эфирез учкись адямиос, соослы мон туж шумпотӥсько. Малпасько, группаын тросгес пыриськись луиз ке, каналлэн аслаз контентэз кылдиз ке, ужпум мукетгес луоз»
Таӵе ӵектосэз «Куара» огин Удмурт Элькунысь йӧскалык политикая Министерствоен валче азинтэ
Видеокурсъёслэн нырысетӥ выпусксы удмурт кыллэн аспӧртэмлыкъёсызлы сӥземын. Видеокурсъёсты Кузёбай Герд нимо гимназиысь история но обществознаниея дышетӥсь Артём Малинин нуэ. Сценарийзэ «Удмурт Дунне» газетысь журналист, удмурт кылбурчи, кылысь кылэ берыктӥсь Анастасия Шумилова гожъя.
Проектлэн режиссёрез, «Куара» огинлэн тӧроез Владислав Степанов верамъя, оглом 20 выпуск луоз, 10-эз соос пӧлысь – ӟуч кылын, 10-эз – англи кылын.
«ВКонтакте»-ын группаязы егит удмурт азьветлӥсьёс удмурт кылэз дышетыны мылкыд карисьёс понна кулэ чӧлсконъёс но сёто: