«Удмурт нылкышно кенеш» огазеяськонэн радъям «Пичи Чеберайёс но Батыръёс – 2022» конкурс йылпумъяськиз. Та нуналъёсы вормисьёсты ялӥзы. Соослэсь списоксэс учкыны луоз вожвылъяськонлэн вотэс бамысьтыз.
«Пичи Чеберайёс но Батыръёс» конкурсэ Удмуртиысь но бускель улосвылъёсысь нылпи садэ ветлӥсь пиналъёс, покчи классъёсын дышетскисьёс пыриськыны быгатӥзы. Соос калыксы сярысь веразы, тунсыкъяськонъёсынызы тодматӥзы, калыксылэн узырлыксы сярысь мадизы. Конкурсын нимысьтыз саклык висъяськиз нылпиослэн удмурт кылын вераськыны быгатэмзылы.
Вормисьёсты 19-тӥ толсуре Ижкарысь Калыкъёслэн эшъяськон юртазы ӟечкылалозы, соосты кузьымъёсын но дипломъёсын данъялозы. Озьы ик татын пиналъёс понна тунсыко Выль ар программа радъяськоз, люкаськемъёс Тол Бабаен но Лымы нылэн пумиськозы. Ужрад 11.00 часын кутскоз.
Удмуртлык понна вань сюлэмынызы висись, калык понна трос лэсьтэм адямиосты, азинлыко тыршисьёсты «Удмурт Кенеш» огазеяськон арлы быдэс пыртэ аслаз Данъян книгаяз. Туэ вить адямиез сӥлы каризы.
Алевтина Перевощикова — «Удмурт Кенеш» огазеяськонлэн Вотка ёросысь ёзэныз кивалтӥсь. Со сюлмаськемен, татысь Кукуй гурт пӧрмиз удмурт культурая центрлы. Алевтина Николаевна ёросысь вань удмурт гуртъёсты огазеяны быгатӥз, соос понна пӧртэм ужрадъёс радъялля. Кылсярысь, сяме пыриз ни арлы быдэ ортчытъяны «Шудо табань» улосвылкуспо фестиваль. Кукуе артысь улосъёсысь но куноос вуыло, удмуртъёслэн йылолъёсынызы тодматско, табань, перепеч пӧрало. Татын нимысьтыз турмаршрут но кылдытэмын. А. Перевощикова «Купанча» ансамблен кивалтэ на.
Александр Аблаев — Грак ёрос муниципал кылдытэтлэн йырызлэн воштӥсез, «Удмурт Кенеш» огазеяськонлэн ёросысь ёзэныз кивалтӥсь. Александр Валентинович йыг-йыг сямыныз быгатӥз ёросысь удмуртъёсты огазеяны, удмурт движениез юнматыны. Лулошур-Возжи гуртын Роман Валишин писателез буре ваён ӝытъёс, Вужгуртысь Даниил Майоров писательлы сӥзем лыдӟонъёс ортчытъя. Усточи удмуртъёсын калыкез тодматыса, творческой пумиськонъёс радъялля. Ачиз но пӧртэм инструментъёсын шудэ, чебер кырӟа.
Валентина Комиссарова — «Удмурт Кенеш» огазеяськонлэн Ува ёросысь ёзэныз кивалтӥсь, «Купанча» калык ансамблен кивалтӥсь, кырӟась, удмуртлыкез утись но ӝутӥсь. Концертъёсын пӧртэм улосъёсы вуылэ, калыккуспо фестивальёсы пыриськылэ. 2013-тӥ арын Валентина Анатольевна кылдытӥз «Шунды сиос» нылпи ансамбль. Ёросазы удмурт кылэз, культураез утён но азинтон понна трос лэсьтэ. Пӧртэм проектъёсын выре. Кылсярысь, анай кылэз дышетӥсь нылпиос пӧлын лагерьёс, ужрадъёс радъялля, ачиз ик кыллы дышетэ но. Егитъёс пӧлын КВН ортчытъя.
Надежда Касаткина — Эгра ёросысь Эшъяськон юртысь суредась-модельер, «Питыран» нимо модая театрлэн директорез. Надежда Васильевна 10 ар ӵоже удмурт дӥсьлы сӥзем пӧртэм уно коллекциосын адӟытонъёс радъяз ни Удмуртилэн палэназ но. Утчаське, вашкалаысь ӝутэ вунэтэм удмурт дэремъёсты, выль шӧм пыртэ удмурт костюмъёслы. Вуриськонъя, чеберъяськонъёс, суйпосъёс, чыртывесьёс, юртъер котырын кутӥськись арбериос лэсьтонъя мастер-классъёс радъялля. Модая театраз нылпиос но, бадӟымъёс но мыло-кыдо пырисько, асьсэлы нуналлы быдэ культураысьтымы маке выльзэ усьтыса.
Андрей Герасимов – Татарстанысь удмуртъёслэн национально-культурной автономиенызы кивалтӥсь. Со сюлмаськемен, Татарстанысь удмуртъёслэсь культуразэс, кылзэс утён но азинтон сярысь 2025-тӥ арозь стратегия кылдытэмын. Со улсын пӧртэм проектъёс ортчыло. Кылсярысь, нылпи садъёсын но покчи классъёсын дышетскисьёс понна удмурт культуралы сӥзем «Мудорвай» фестиваль-конкурсэ ог 3 сюрс пинал пыриськиз ни. Гыронбыдтон праздник улсын удмурт егитъёс «БиГерд» форуме люкаськыло. 2020-тӥ арысен удмурт кылъя визьнодасьёс пӧлын конкурс ортче, Андрей Сергеевич устооссэ ачиз ик премиен дунъя.
7-тӥ толсуре азьветлӥсь удмуртъёс люкаськизы Ижкарысь Калыкъёслэн эшъяськон юртазы. Татын Вань удмуртъёслэн XV (азьвыл чакламтэ) ӧтчамзы ортче. Ужрадэ Удмурт Элькунысь, Башкортостанысь, Татарстанысь, Марий Элысь, Пермь шаерысь, Киров улосысь, Санкт-Петербургысь 215 делегатъёс вуизы. Озьы ик ӧтчамлэн ужаз пыриськизы Правительстволэн Тӧроез Ярослав Семенов, министръёс но депутатъёс.
Ӧтчамлэсь пленарной кенешсэ котьку сямен «Удмурт Кенешлэн» гимнэныз усьтӥзы. Собере делегатъёс сӥё-дано ужез быдэстӥзы: кенешчиослэн ӟеч сямлы пӧрмемын ини котькуд ӧтчамзэс кутскыны Удмурт кунлыкез кылдытӥсьёсты, удмурт калыклэсь дано пиоссэ — Трокай Борисовез, Иосиф Наговицынэз но Кузебай Гердэз — буре вайыса, синпелетъёссы доры сяська поныны.
«Удмурт Кенешлэн» Тӧроез Татьяна Ишматова огазеяськемлэн берло 2 аръёсы ужамезлы йылпумъянъёс лэсьтӥз. Докладаз со пусйиз, асьме удмурт кылмылэн нимысьтыз инлыкез вань. Котькуд ёросын пӧртэм ужрадъёс ортчытъясько, бадӟым уж нуиське йӧскалык дышетонын. Но удмурт кылэз дышетон ужпумез нылпи садъёс но школаос вылэ гинэ куштыны уг яра. Мукет ӧръёсысь но ӧнерчиосты, азьветлӥсьёсты кысконо. Огазе кариськыса ужано шуиз со.
Озьы ик докладэн вераськизы «Удмурт Кенеш» огазеяськемлэн Балезино ёросысь ёзэзлэн кивалтӥсез Надежда Наговицына, Татарстанысь удмуртъёслэн лулчеберетъя йӧскалык автономизылэн кивалтӥсез Андрей Герасимов, «Удмурт Кенеш» огазеяськемлэн Вавож ёросысь ёзэзлэн кивалтӥсез Ирина Ложкина но Вотка карысь 44-тӥ номеро нылпи садлэн кивалтӥсез Валентина Вахрушева. Соос веразы, кызьы асьсэ доразы удмуртлыкез азинто, кыӵе амалъёсты ужазы куто, озьы ик тодматӥзы тужгес усто ӵектосъёсынызы.
Ӧтчам улсын мыло-кыдо кенешчиос пӧртэм данъетъёсын пусъемын вал. Трокай Борисов нимо йӧскалык премилэсь лауреатсэ данъязы. 2022-тӥ ар понна сӥё-дано нимез басьтӥз Александр Аркадьевич Прохоров, Шаркан ёрослэн азьвыл йырыз, гурт удысъя но сиён-юонъя азьвыл министр. «Удмурт Кенешлэн» Данъян книгаяз но выль нимъёсты пыртӥзы. Со: Алевтина Перевощикова — «Удмурт Кенеш» огазеяськонлэн Вотка ёросысь ёзэныз кивалтӥсь, Александр Аблаев — Грак ёрос муниципал кылдытэтлэн йырызлэн воштӥсез, «Удмурт Кенеш» огазеяськонлэн ёросысь ёзэныз кивалтӥсь, Валентина Комиссарова — «Удмурт Кенеш» огазеяськонлэн Ува ёросысь ёзэныз кивалтӥсь, «Купанча» калык ансамблен кивалтӥсь, кырӟась, удмуртлыкез утись но ӝутӥсь, Надежда Касаткина — Эгра ёросысь Эшъяськон юртысь суредась-модельер, «Питыран» нимо модая театрлэн директорез, Андрей Герасимов — Татарстанысь удмуртъёслэн национально-культурной автономиенызы кивалтӥсь.
Нош Тӧрозы воштӥськоз шуыса кенешчиос азьвылгес тодо ни вал, уго Татьяна Ишматова Пичи кенеш азьын куриз вал ассэ «Удмурт Кенеш» кивалтонлэсь мозмытыны. Ас интыяз со ӵектӥз Кун Кенешысь Культурая, туризмъя но нациосын ужан политикая ялан ужась ӧрилэсь кивалтӥсьсэ Андрей Ураськинэз. Куара сётон шара радъяськиз. Оглом калык Андрей Иванович понна дурбасьтӥз.
Быръёнъёс бере уж азинскиз секциосын: «Удмурт Кенеш», «Удмурт нылкышно кенеш», «Шунды» но бускель улосъёсын улӥсь удмуртъёс асьсэ сюлмаськонъёссы сярысь кенешизы.
Сегодня в Доме Дружбы народов прошёл XV-ый (внеочередной) Съезд удмуртов. На нём обсудили актуальные вопросы популяризации удмуртского языка, приняли изменения в устав организации «Удмурт Кенеш», также избрали её нового Председателя.
Открыла съезд Татьяна Ишматова, которая возглавляла организацию последние 6 лет. В своём докладе она отметила, что в каждом районе республики проходят мероприятия на удмуртском языке, пристальное внимание уделяется сфере национального образования. Но для достижения больших целей к данной деятельности должны приобщаться не только педагоги, работники культуры, но и активисты из других сфер. Работа должна вестись сообща.
Председатели районных и региональных ячеек «Удмурт Кенеш» рассказали о работе организации в Балезинском, Вавожском, Воткинском районах и в республике Татарстан.
На съезде Национальной премией имени Трокая Борисова был награждён Александр Аркадьевич Прохоров, бывший Министр сельского хозяйства.
Руководители Воткинской, Увинской, Граховской ячеек организации «Удмурт Кенеш» Алевтина Перевощикова, Валентина Комиссарова, Александр Аблаев, создатель модного театра «Питыран» Надежда Касаткина, руководитель национально-культурной автономии удмуртов из Татарстана Андрей Герасимов были занесены в Почётную книгу ассоциации.
Общим голосованием были приняты изменения в устав организации. Также делегаты избрали нового руководителя. Им стал Председатель постоянной комиссии Государственного Совета Удмуртской Республики по культуре, туризму и национальной политике Андрей Ураськин, который более 15-ти лет являлся директором Национального театра Удмуртии.
«Удмурт культурая нуналъёс» проект улсын ужрадъёс йылпумъяськизы, берпуметӥез пумиськон радъяськиз 2-тӥ толсуре Башкортостанысь Калтасы ёросын.
Удмуртиысь делегцие пыризы Йӧскалык политикая министр Эдуард Петров, «Удмурт нылкышно кенеш» огазеяськонлэн кивалтӥсез, «Удмурт дунне» газетлэн редакторез Елена Миннигараева, Удмурт кун университетысь Удмурт филологияя но журналистикая факультетлэн деканэз Галина Глухова, «Удмурт Кенеш» огазеяськонлэн ёзчиосыз, «Шунды», «Куара», «Артэ» огазеяськонъёс, Йӧскалык дышетонъя институтысь наукая ужасьёс но мукетъёс.
Ужрад ортчиз Калтасы ёросысь лулчеберетъя юртын. Отын радъямын вал удмурт киужъёсын возьматон, «Удмуртия» издательстволэн книгаосыныз вуз карон, удмурт газет-журналъёсын тодматскон. Со сяна, татын ик Башкортостанысь удмуртъёс асьсэ сямъёсынызы, киужъёсынызы, пӧраськемъёсын тодматӥзы.
Культура юртын ужрадэз усьтӥз Башкортостанысь Калтасы ёрослэн йырыз Забир Габдуллин. Со пусйиз, таӵе ужрад доразы нырысьсэ ортче. Соос талы шумпото но азьланяз но Удмуртиен кусып возьыны тыршозы. Нош Йӧскалык политикая министр Эдуард Петров мадиз, кызьы туннэ нуналлы удмурт кылэз, культураез азинтон ужъёс радъясько. «Удмурт нылкышно кенешлэн» кивалтӥсез Елена Миннигараева пусйиз та ужын «Удмурт Кенеш» но мукет общественной огазеяськонъёслэн интызы сярысь.
Башкортостанысь удмурт движение пыриськисьёс пӧртэм тау каронъёсын пусъемын вал. Нош собере уж кӧня ке секцияя радъяськиз: этнообразование, удмурт кылэз но культураез азинтон проектъёс, егитъёсын ужан, эктон.
Ӝыт люкаськем калык понна концерт возьматӥз фольклор кырӟанъя но эктонъя «Айкай» кун театр. Башкортостанысь удмуртъёс понна та нунал бадӟым но пайдаё праздниклы пӧрмиз.
Тодады вайытом, удмурт культуралы сӥзем нуналъёс туэ ортчизы 5 улосъёсын: Киров, Пермь шаеръёсын, Марий Элынын, Татарстанын, Башкортостанын.
Ивортон «Удмурт дунне» газетлэн вотэс бамысьтыз басьтэмын
2022-тӥ ар понна сӥё-дано нимез басьтӥз Александр Аркадьевич Прохоров, Шаркан ёрослэн азьвыл йырыз, гурт удысъя но сиён-юонъя азьвыл министр.
Александр Аркадьевич быдэс улонзэ яратоно ёросэзлы сӥзиз. Вордскем палъёссэ ӝутон но кужмоосыз пӧлы поттон понна трос кужымзэ сётӥз. Котьку сюлмаськиз гуртъёсын улонэз умоятон понна. Солэн тыршеменыз Шаркан ёросын пӧртэм турмаршрутъёс но кылдылӥзы. Одӥгез синмаськымон проектсы — «Тол бабай дорын куноын». Нош макем вань калыкез синмаськытӥз ини «Быг-быг» фестиваль.
Министр луыса ужакуз но Александр Аркадьевич предприятиослы, личной подсобной хозяйство возисьёслы, фермеръёслы висъяськись юрттэтэз будэтон понна трос лэсьтӥз.
Котьку мыло-кыдо пыриськиз удмурт движение. Ёросысьтызы «Инвис» газетэз поттон но вӧлмытон понна сюлмаськиз, элькунамы потӥсь удмурт изданиослы подписка радъяны юрттылӥз. Александр Аркадьевич али ке но удмурт кылмес но культурамес азинтонъя аслэсьтыз ӵектонъёссэ вера.
Пусъём, Трокай Борисов нимо премия сётӥське 2018-тӥ арысен кивалтон удысын удмурт калык понна трос лэсьтэм адямиослы.
Ужрад радъяськиз ёрос культурая юртын. Куноосты вӧйын-нянен пумитазы, «Ялыке» ансамбле пыриськисьёс пумиськонэз задор кырӟанъёсын шулдыртӥзы.
Ӵектослэн кивалтӥсез Татьяна Колхир юрттӥсьёсыз Татьяна Головизнина но Лариса Агееваен ӵош калык праздникъёсын тодматӥзы: мар каризы со нуналэ, кыӵе йӧскалык сиён-юон пӧразы, кызьы шулдыръяськизы. Люкаськем семьяос мыло-кыдо куарнянь сокам лэсьтонъя мастер-классэ пыриськизы. Озьы ик тодматскизы на мукет удмурт пыжиськемъёсын но, эктӥзы-кырӟазы, шудонъёсын шудӥзы.
Пусъём, «Бускельёс дорын 2.0» проект улсын 8 пумиськон радъяськиз. Отчы удмурт, ӟуч но бигер выжыысь 47 семьяос пыриськизы.
«Туж жадим, но сюлэм вылын али сыӵе ганяк мылкыд, туж кулэ ужез лэсьтыны, улонэ пыӵатыны быгатӥм уго. Бадӟым тау кареме потэ ваньзылы, кин юрттӥз, кин шумпотыса пыриськиз та ужрадамы. Кӧня ке шутэтском но — азьлань! Выль малпанъёс но выль ӵектосъёс витё. Озьыен, удмуртлыкмес утём но вӧлмытом!»
«Тэчы, поттомушка, пыр ик, сарачи, капон, лыназе, эля, нёпо… Вавожысь ке тон, тодод, мае возьмато та кылъёс. Удмурт Кун университетысь удмурт кылосбуръя факультетэз быдтэмъёслэн куд-огезлэн йыразы кылиз на, дыр, диалектология параосын кылэм тунсыко кылъёс. Нош кылемъёсызлы оло воксё но удмурт кылъёс кадь ик уг пото, дыр», — верало Вавож ёросысь кенешчиос.
Удмурт кыллэн дунневыл нуналэз азьын Вавожысь шаертодонъя музейын ужасьёс но кенешчиос вавож диалектной кылъёсын выжлёгет «куизы», нош Выль Бия школаысь дышетӥсь Нина Ефремова со кылъёслэсь кылбур «пӧраз».
Кызьы мачко вавожъёс?
Чудӟаысь Дурга Серга
Ведра тыр кутэм дарга,
Нош Ӟамбай эшез Толя
Куать кило калтэм эля.
Толя кышно, эля кӧт,
Кытысь-мар тодэм – ӧйтӧд,
Эляез, пе, базарын
Вузало дуно дунын.
Картэз борды ериськиз,
Дарга сямен пештырскиз,
Мын, пе, чорты Сергаез –
Солэн но трос даргаез.
Ваньбурез малы быдтод,
Эсьмаса, коньдон жильдод:
Калык лыназе вискын
Ванмыз сямен базарын…
…Тани пуко кык эшъёс –
Воксё ӟудэмын соос:
Огез басьяськись лыктӥз,
«Шӧнтэмъёс» шуса кошкиз.
Мукетыз тани вуиз –
Ой, гориз ук, ой, гориз!..
Собере «Та «марымдэс»
Асьтэос сие», — шуиз…
Воргоронъёс, жадьыса,
Берто, нёпо коласа,
Кышнооссы нош пуко,
Поттомушка куадаса.
Толяез йыръе Оля:
«Эн кутылы ни эля…»
Сергаез тарка Верка,
Кожалод, ачиз дарга:
«Юнме дыр быдтид тӥни,
Эсьма кут вал чукырни…
Ма, марзэ басьтод солэсь,
Пештыр эля-даргалэсь?..
Табере, пе, кык эшъёс
Шурысь ваё чипейёс,
Ведра тыр ӧвӧл ке но,
Ӵок, уг зульы ни кышно…
Тэк пукемлэсь – кыл но бур,
Пӧрмиз оло ӧз кылбур –
Валады меда, эшъёс,
Кызьы мачко вавожъёс?..
Йылпумъяны кылбурме
«Лушкай» одӥгзэ кылме,
Вождэс эн вае, эшъёс,
Валалозы уйпалъёс…
Туннэ Удмурт автономи кылдытонлы инъет сётэм огез азьветлӥсьлы — Трокай Борисовлы — вордӥськемез дырысен 131 ар тырме.
Удмурт калыклэсь дано пизэ буре вайыса, «Удмурт Кенешлэн» исполкомчиосыз ужан нуналзэс солэн Ижкарысь синпелетэз дорын мытӥзы, Трокай Борисовлэн пыд азяз сяська поныса, сӥлы каризы.
Тодады вайытом, Трокай Борисовлэн вордӥськем нуналэз катэн тодэ ваён нунал сямен юнматэмын.
Пичи Пурга ёросысь Гожня гуртын дышетӥсьёс но бадӟым классын дышетскись пиналъёс понна «Инву гурез утчаса» фестиваль ортчиз. Ужрад радъямын вал Удмурт кыллэн нуналыз улсын.
«Кыллэн кужымез туж бадӟым. Вордскем кыллэн — вормонтэм ! Кылмылы юрттоно гинэ бурдъёссэ вӧлъяны», — шуэ «Удмурт Кенешлэн» ёзэтэзлэн кивалтӥсез Надежда Степанова.
Фестивальын пиналъёс понна ужазы 6 пумо кыл-куаос: «Хоккуысен верлиброзь», «Удмурт ке — кырӟа», «Шунды эктонъёс», «Шудон пӧл», «Удмурт дебат», «Кусаллям ми оригами».
Удмурт кыллэн туала ужпумъёсыз но вордскем кылмес ӟеч дышетон амалъёс сярысь котырес ӝок сьӧрын кенешизы удмурт кылъя дышетӥсьёс но «Удмурт Кенеш» огазеяськонлэн азьветлӥсьёсыз.
Бускель улосвылъёсын улӥсь удмуртъёс дорын удмурт культуралы сӥзем нуналъёс азьланьтӥсько. Эшшо одӥгез пумиськон ортчиз Киров улосвылысь Уни каргуртын.
Ужрад пленарной люкетэн кутскиз. Вань люксаськемъёсты пумитаса вераськизы элькунысьтымы йӧскалык политикая министр Эдуард Петров, Уни муниципал кылдытэт администрацилэн кивалтӥсезлэн воштӥсез Иван Машковцев, Киров улосысь Калыкъёслэн эшъяськон юртсылэн валтӥсь ужъёсызъя директорлэн воштӥсез Ирина Никитина.
Пумиськон азьланьтӥськиз тематической площадкаосын. Пусъём, котькуд улосын соос пӧртэмесь луо. Таяз радэ но дасямын вал Киров улосвылын улӥсь удмуртъёслэн куронъёсызъя. «Чипчирган» ансамбльлэн хореографез Лилия Леонтьева удмурт калык эктонъёсъя но шудонъёсъя мастер-класс возьматӥз, «Арт-резиденциысь» ӧнерчи Дарали Лели йӧскалык дэремъёслэн аспӧртэмлыкъёссы сярысь вераськиз, Калыкъёслэн эшъяськон юртысьтызы ужасьёс удмурт егитъёслэн азинлыко ӵектосъёсынызы тодматӥзы. Нимысьтыз «Удмурт Кенешлэн» площадкаез но ужаз. Татын удмурт кылэз но лучберетэз утён, азинтон но вӧлмытон пумысен юанъёсты сэрттӥзы-пертчизы.
Пумиськон Ижкарысь «Чипчирган» ансамбльлэн концертэныз йылпумъяськиз.
Своё очередное занятие они посвятили удмуртским народным танцам, играм и традиционному костюму.
Дети, занимающиеся в центре «Билингва», живут в городе и владеют двумя языками – русским и удмуртским. Чтобы оба языка развивались в равной степени, специалисты проекта проводят для детей 3-х-7-ми лет интерактивные игры, мастер-классы, музыкальные и подвижные игры.
26-ого ноября дети рисовали цветок италмас – символ нашей республики – на салфетке. Все подготовили стихи на удмуртском языке, каждый чтец получил в подарок книгу со стихами о родном крае. А мамы ребят приняли участие в мастер-классе по созданию брошей из фоамирана.
Бускель улосвылъёсын улӥсь удмуртъёс дорын удмурт лулчеберетлы сӥзем нуналъёс кутскизы. Нырысетӥез пумиськон Пермь улосвылысь Куеда ёросын ортчиз. Удмурт калык люкаськиз Бадӟым Гондыр гуртын.
Удмуртиысь делегация быдэс автобусэн вуиз. Куноосты кырӟаса но эктыса лулчеберет юртысь ужасьёс пумитазы.
Ужрад кутскиз пленарной кенешонэн. Люкаськемъёс азьын вераськизы ӧтем куноос: Пермь улосысь йӧскалык но вӧсьбур кусыпъёсъя Департаментлэн директорез Анастасия Субботина, Куеда муниципал кылдытэтлэн кивалтӥсез Анатолий Верхоланцев, Удмурт Элькунысь йӧскалык политикая министр Эдуард Петров, «Удмурт Кенеш» огазеяськонлэн вице-президентэз Елена Ленцова, Пермь улосысь удмуртъёслэн йӧскалык лулчеберетъя центрзылэн кивалтӥсез Алина Туктагулова.
Удмурт лулчеберетъя нуналъёс азьланьтӥськизы секциосын но мастер-классъёсын. Кылсярысь, Бадӟым Гондыр школаын дышетӥсьёс но дышетскись пиналъёс понна история тодосъя кандидат, доцент, Кузебай Герд нимо йӧскалык музейысь тодосъя секретарь Юрий Перевозчиков удмурт калылкэн историез но культураез сярысь вераз. Чеберлыко киужъёсъя йӧскалык центрлэн ёзчиосыз люкаськемъёсты калык ӧнерлыкъёсын тодматӥзы. Калык эктонъя «Чебеляй» образцовой студилэн кивалтӥсез Наталья Чиркова удмурт йӧскалык эктонъёслы дышетӥз. Удмурт егитъёслэн «Шунды» огазеяськонзы проектъёссы сярысь мадиз, пиналъёсты «Шундыкар» лагере ӧтиз. Нош «Удмурт Кенешлэн» площадкаяз удмурт кылэз, лулчеберетэз утён но азинтон пумысен юанъёсты ӝутӥзы.
Яркыт но пуштросо ужрад йылпумъяськиз бадӟым концертэн. Люкаськемъёсты шулдыртӥзы Ижкарысь «Чебеляй» студиысь нылпиос но Пермь улосысь йӧскалык коллективъёс.
Удмурт кыллы но лулчеберетлы сӥзем нуналъёс 2- тӥ толсурозь кыстӥськозы. Вуоноез пумиськон ортчоз ини 24-тӥ шуркынмонэ Киров улосвылын. Ужрадъёс улсын озьы ик чакламын котырес ӝӧк сьӧрын кенешонъёс, билингва нылпиосын но соослэн анай-атайёсынызы семинаръёс, егитъёсын пумиськонъёс, эктыны дышетонъя но мукет мастер-классъёс. Пусъём, таӵе ужрадъёс тупал удмуртъёс дорын арлы быдэ ортчыло.
Сегодня стартовали Дни удмуртской культуры в регионах с компактным проживанием удмуртов.
Сейчас идёт работа по тематическим секциям. Так, кандидат исторических наук, доцент кафедры археологии и истории УдГУ, учёный секретарь Национального музея имени Кузебая Герда Юрий Перевозчиков рассказывает об истории и культуре удмуртского народа преподавателям и ученикам Большегондыревской школы. Сотрудники Национального центра декоративно-прикладного искусства Удмуртии приобщают собравшихся к народным промыслам. С удмуртскими национальными танцами знакомит художественный руководитель Образцовой студии национального танца «Чебеляй» Наталья Чиркова. А обсуждение актуальных проектов в сфере сохранения и развития удмуртского языка, образования и культуры ведёт Вице-президент Всеудмуртской ассоциации «Удмурт Кенеш» Елена Ленцова. Ребята из организации «Шунды» рассказывают о проекте «Шундыкар».
Завершением большой программы станет концерт с участием студии танца «Чебеляй» и творческих коллективов Пермского края.
В течение месяца Дни удмуртской культуры пройдут и в других республиках, делегация из Удмуртии посетит Башкирию, Татарстан, Кировскую область и республику Марий Эл.
Шуркынмон толэзь туж узыр дано праздникъёсын. Соосты пусйыса, пиналъёсты пыриськыны ӧтё «Мон — удмурт» нимо вожвылъяськонэ.
Вожвылъяськонэ пыриськыны быгато 3 аресысен 11 аресозь нылпиос. Суредъёс быдэстэмын луыны быгато котькыӵе техникаен (акварель, гуашь, пастель, карандаш, фломастер, компьютерной графика но мукет).
Ужъёстэс возьмалозы 30-тӥ шуркынмонозь swetlanazinkova@yandex.ru электрон почтае. Вормисьёс пусъемын луозы Дипломъёсын но синпель кузьымъёсын.
Пыр-почгес вожвылъяськон сярысь тододы Положениысь.
Суред вотэсысь басьтэмын.
Удмурт лулчеберетлы сӥзем нуналъёс ортчозы бускель улосвылъёсын улӥсь удмуртъёс дорын. Таӵе ужрадъёс котькуд ар ортчыло кусыпъёсты тупатон но огазеян, палэнысь удмуртъёслэсь сюлэм шугъяськонъёссэс тодон но кылдэм ужпумъёссэс серттон-пертчон, пӧртэм ӵектосъёсты улонэ валче пыӵатон вылысь.
Таяз радэ пумиськонъёс чакламын Татарстанын, Башкорстостанын, Киров, Марий Эл но Пермь улосъёсын. Программа дасяське котькуд регионлы нимысьтыз, соослэсь мылкыдъёссэс, куронъёссэс но маин ке но кулэяськонзэс лыдэ басьтыса.
Ужрадъёс улсын удмурт кылэз но лулчеберетэз дышетон, утён но азинтон ужпумъёсъя котырес ӝокъёс, эктонъя но киужъёсъя мастер-классъёс, егитъёслы сӥзем площадкаос но трос мукет ужрадъёс радъяськозы. Нош йылпумъяськозы пумиськонъёс бадӟым удмурт концертъёсын. Удмурт лулчеберетэз возьматозы кырӟанъя но эктонъя «Айкай» кун театр, эктонъя «Чебеляй» студия но «Чипчирган» ансамбль.
Нырысетӥез пумиськон радъяськоз ини 18-тӥ шуркынмонэ Пермь шаерысь Бадӟым Гондыр гуртын.
Ужрадлэн радъясьёсыз: «Удмурт Кенеш» огазеяськон, Йӧскалык политикая министерство, Калыкъёслэн эшъяськон юртсы, Камсьӧр удмуртъёслэн центрзы но удмурт егитъёслэн «Шунды» дэменлыксы.
10-тӥ шуркынмонэ Калыкъёслэн эшъяськон юртазы «Удмурт Кенеш» огазеяськонлэн Пичи кенешез ортчиз. Люкаськемъёс вань удмуртъёслэсь азьвыл чакламтэ ӧтчамзэс, огазеяськонлэн уставаз воштонъёсты пыртон сярысь вераськизы, озьы ик мукет ужпумъёсты но эскеризы.
Ӧтчамез 7-тӥ толсуре ортчытыны чакламын. Ужрадэ Удмуртиысь, Башкортостанысь, Марий Элысь, Татарстаынысь, Киров, Пермь но Свердловск улосвылъёсысь, Москваысь, Санкт-Петербургысь делегатъёс пыриськозы. Соос огазеяськонлэн кык ар ӵоже ужамезлы йылпумъянъёс лэсьтозы, азьвыл ӧтчамын кутэм резолюциез быдэсъямлы дунъет сётозы.
Со сяна делегатъёс «Удмурт Кенешлэсь» выльдэм уставзэ юнматыны кулэ. Огазеяськонлэн валтӥсь ужкагазаз воштонъёсты, тупатонъёсты пыртонэз Пичи кенешлэн ёзчиосыз учкизы. «Туж трос выль куронъёс мерлыко огазеяськонъёс азе пуктэмын федерал катъёсы. Выльдӥськонъёс кутэмын луозы соосты чакласа. Кылсярысь, кызьы асьмеос быгатӥськом дистанционный амалэн ужрадъёсмес ортчытъяны, решениосмес кутылыны. Азьвыл со чалкамын ӧй вал. Нош пандемия возьматӥз: Пичи кенешъёсмес но, Исполкомъёсмес но, мукет куд-ог совещаниосмес но мукет сямен радъяно луылӥз», — шуиз «Удмурт Кенешлэн» Тӧроез Татьяна Ишматова.
Ӧтчамлы йылпумъянъёс лэсьтыса, Трокай Борисов нимо йӧскалык премилэсь лауреатсэ но огазеяськонлэн Данъян книгаяз пыртэм муртъёсты сӥлы карозы.
Пичи Пургаын Семён Самсонов нимо ёрос премилэсь лауреатъёссэ пусйизы. Данъян ортчиз Удмурт Элькунлэн нуналэзлы сӥзем сӥё-дано ужрад улсын.
Туэ данъетэз басьтӥзы «Удмурт Кенешлэн» Пичи Пурга ёзэтэзлэн азьветлӥсьёсыз:
— Галактионова Анна Фёдоровна — удмурт кылэз утён но азинтон удысын тыршемез понна;
— Владимир Федосеевич но Нина Ивановна Ботниковъёс — шаертодон но этнотуризм удысын азинлыко тыршемзы понна;
— Елизарова Зинаида Семёновна — литература но искусство удысын азинлыко тыршемез понна.
Туннэ, 4-тӥ шуркынмонэ, удмурт калыклэн Кунлык басьтэмез дырысен 102 ар тырмиз.
Таяз радэ но Ижкарысь Иосиф Наговицынлы, Трокай Борисовлы но Кузебай Гердлы сӥзем синпелетъёс доры уно адямиос люкаськизы: Элькун кивалтэтлэн Тӧроез, Кун Кенешысь депутатъёс, удмурт министръёс, «Удмурт Кенешлэн» азьветлӥсьёсыз, мукет йӧскалык огазеяськонъёслэн ёзчиоссы, егитъёс, пиналъёс.
Люкаськемъёс тодазы ваизы историез, Удмуртилэсь кунлыксэ кылдытонэ пыриськемъёслы трос шуныт кылъёссэс веразы, тау каризы удмурт калыклэн дано пиосызлы.
«Тыро-пыдо» конференцие ужъёсты келян дыр бырытозь кылиз на кык нунал гинэ. Дыртэ! Отчы возьмало 1-тӥ-4-тӥ классын дышетскись удмурт пиналъёслэсь тодослыко (научной) ужъёссэс. Радъясез: «Удмурт нылкышно кенеш» огазеяськон.
Эскеронъёсты таӵе ӧръёсъя дасяны луэ:
• Краеведение — Шаертодон
• Обществознание — Адями но дунне
• Естественные науки — Инкуазь
Конференцилэн радлыкез таӵе:
10-30 октябре возьмало тодослыко уждэс но соя PowerPoint программаын лэсьтэм презентациез udmurtnyl@yandex.ru почтае
31 октябре – 7 ноябре — оргкомитет устооссэ 30 ужъёсты быръёз
15 ноябре — соослэсь авторъёссэс Кузебай Герд нимо гимназие ӧтёзы. Нылпиос ужзы сярысь вералозы, жюри соосын кенешоз, юанъёс сётъялоз, быръёз тужгес но ӟечъессэ. Татын ик нылпиос понна наукая тунсыко шудонъёс радъяськозы.
Вань покчиос кузьым но таукарон басьтозы. Юанъёсын жингыртоно 8-950-155-23-56 телефонъя, яке вазиськоно проектлэн кураторезлы Наталья Образцовалы. Пыр-почгес гожтэм положениын.
Вери эскерон ужзэ келяса вуттӥз ни. Нош тон?
Практически каждую субботу Дом Дружбы народов погружается в мир билингвизма. С начала октября у нас проходят занятия Удмуртского центра «Билингва».
Дети, занимающиеся в центре «Билингва», живут в городе и владеют двумя языками – русским и удмуртским. Чтобы оба языка развивались в равной степени, специалисты проекта проводят для детей 3-х-7-ми лет интерактивные игры, мастер-классы, музыкальные и подвижные игры. Так, например, знакомясь с названиями домашних птиц и их птенцов, ребята лепили петушков.
На занятиях большое внимание уделяется и родителям. Психологи, логопеды, педагоги организуют консультации, обучающие семинары по воспитанию детей-билингвов.
22-тӥ коньывуонэ Глазовысь ЗАГС ёзэтын удмурт сюан гуръёс чузъяськизы кык пар кузпалъяськисьёс – Анна Урсегова но Даниил Мусихин, озьы ик Мария Гагарина но Сергей Главатских – понна. Со сярысь ивортӥзы Глаз ёросын потӥсь «Иднакар» газетлэн вотэс бамаз.
Удмурт кылын гожтӥськон радлыкез ортчытӥз ЗАГС-ын ужась Наталья Вениаминовна Касаткина, со кемалась ини сюлмаз возьыса улӥз удмурт сюан ортчытонэз, ачиз ик малпаз, сценарий гожтӥз. Ужез пӧрмиз!
Удмурт йылолъёсты возьматӥзы но удмурт гуръёсты кырӟазы Глазов ёросысь «Чупчи гуръёс» калык ансамбль. Кивалтӥсез Ольга Бегишева но коллективын кырӟасьёс – ваньзы ик удмуртъёс, умой тодо сюан ортчытон сямез.
Егитъёслы шуныт кылъёссэ вераз «Удмурт Кенеш»-лэн Глазов карысь но ёросысь ёзэтэзлэн кивалтӥсез Елена Пономарева.
— Сюлмысьтым ик шумпотӥсько, егитъёс гажало но валало удмурт йылолъёсты. Удмурт сямъёсъя сюан ортчытон – со удмурт калыкез гажан гинэ ӧвӧл, со кылдэм семьядэ шуг-секытъёслэсь, керетонъёслэсь, син усемлэсь утён но. Тани, шуом, егитъёслэсь киоссэс ӵушконэн керттӥзы – со шудон ӧвӧл ук, куспетӥзы ортчисьёс, люкисьёс медаз луэ шуыса со ортчытӥське, – шуиз Елена Вениаминовна.
Музейын пичильтыкъёс понна экскурсиос ортчытъяло. Татын соос вордскем шаеренызы, солэн лулчеберетэныз, удмурт калыклэн сям-йылолъёсыныз но дано адямиосыныз тодматско.
«Родничок» нимо нылпи садлэн кивалтӥсез Алёна Петрова ивортэмъя, музеен кивалтэ визьнодасьсы Светлана Куликова. Экскурсиос сяна, нылпиосын со пöртэм тунсыко ужрадъëс, мастер-классъëс, кенешонъëс радъялля на.
Удмуртлыкез гажан но утëн бордын ужан амалъëсты улонэ пыӵатыны алнашъёслэн луонлыксы кылдӥз ӵектос гожтыса, озьы ик нимысьтыз «Удмурт Кенеш» огазеяськон юрттэмен.
Ӵектос улсын интерактив-музее басьтэмын вал адӟытонэз радъян вылысь арбериос, мунёос, вуремын лымшорпал но уйпал удмурт дэремъёс.
Сое интыязы Улын Юри школалэн борддор вылаз.
Людмила Ильинична — Росси Федерациысь дышетон удысысь сӥё-дано ужась, Росси Федерациысь ужысь ветеран, Пичи Пурга ёрослэн дано нылыз, Семен Самсонов нимо Пичи Пурга ёрос премилэн лауреатэз, Улын Юри школалэн азьвыл директорез но калыктодос музеез кылдытонлэн кичӧлтӥсез.
Людмила Федероваез данъяса, буре ваён ужрадэ люкаськизы солэн ӵыжы-выжыосыз, дышетӥсьёс, дышетскисьёс, «Удмурт Кенеш» огазеяськонлэн ёзчиосыз но мукетъёс. Люкаськемъёсты пумитаса вераськизы Пичи Пурга ёросысь депутатъёслэн кенешсылэн кивалтӥсез Василий Москвин, «Удмурт Кенешлэн» Тӧроез Татьяна Ишматова но огазеяськонлэн Пичи Пурга ёросысь ёзэтэзлэн кивалтӥсез Надежда Степанова. Тау карон кылъёсын вазиськизы Людмила Ильиничналэн кузпалыз Михаил Федоров но пиез Сергей Федоров.
Нош дышетӥсьёс но дышетскись пиналъёс пичильтык концерт возьматӥзы. Пумиськон туж шуныт радъяськиз.
Пусъём, мемориал пул лэсьтэмын Улын Юриысь Удмурт мерлыко центрлэн кичӧлтэмезъя но «Удмурт Кенеш» огазеяськонлэн юрттэменыз.