Та но мукет ужпумъёс сярысь вераськон мынӥз «Удмурт Кенеш» огазеяськонлэн исполкомаз
Кенешчиос сяна, ужрадэ пыриськизы на Кун Думаысь депутат А.Е.Загребин, Удмуртиысь йӧскалык политикая министр Л.Н.Буранова, Ижкарысь Администрацилэн Тӧроезлэн воштӥсез Д.А.Чистяков, Лулчеберетъя министерствоысь ёросъёсын кусып возись ёзэтэзлэн кивалтӥсез З.М.Никитина.
Нырысетӥ юан ӝутэмын вал Кызьпу арама сярысь. Кызьы тодӥськом, сое умоятон-утялтон сярысь вераськонъёс кемалась мыно ини. Ижкарысь Администрацилэн Тӧроезлэн воштӥсез оскытӥз, кивалтӥсьёс та югдурез чакласа возё шуыса.
Ми валаськом, удмуртъёслэн та туж кулэ интызы. Соин ик малпасько, азьпалан но ӵошен кариськыса ужаломы, одно ик Кызьпу арамаез выльдомы
Дмитрий Чистяков озьы ик афишаосты, рекламаосты кык кылын лэсьтон пумысен но валэктонъёс сётӥз. Со вераз Россилэн нуналаз но Ижкарлэн нуналаз удмурт кылын гожтэмъёс нокытын но ӧй вал шуыса со юри лэсьтэмын ӧй вал. Ужпумъёс пуктэмын ке но вал, праздник азьын огыр-бугыр луэмен сыӵе янгыш кошкемын. Дмитрий Александрович кылзэ сётӥз, азьпалан таӵе учыръёс уз луэ ни шуыса.
Вунэтытэк кельтыны уг луы мукет валтӥсь ужпумъёсты но. Туэ армы быдэсак сӥземын удмурт кунлыклэн 100 ар тырмонэзлы. Лариса Буранова соин валче ортчоно ужрадъёсын тодматӥз. Жаляса верано, пандемияен сэрен туж трос малпам ужрадъёс уз ортче шуиз министр. Но туж ӟеч, та нуналъёсы дасяськонъёс мыно «Виль» праздниклы. Со 22-тӥ гудырикошконэ ортчыны кулэ. Вуоно арняын оргкомитет ужаны кутскоз.
Шумпоттэ, чаклам ужрадъёс улсын, Кузебай Гердлэн, Трокай Борисовлэн но Иосиф Наговицынлэн синпелетъёссы тупатэмын луозы шуыса. Выльдӥськон ужрадъёсты шуркынмонозь йылпумъяны чакламын.
Уксё висъяськоз Кузебай Герд нимо йӧскалык музейлы но шуыса пусйиз Лулчеберетъя министерстволэн ёросъёсын кусып возись ёзэтэзлэн кивалтӥсез Зинаида Никитина. Вераны кулэ, туэ музейлы но 100 ар тырмоз. Озьы ик ӝутӥськон ужъёс азьланьтӥсько йӧскалык библиотекаын но. Али дыре солы ним утчан бордын но тыршо ужасьёс. Кенешчиос дэмлазы Короленколэсь нимзэ сётыны. Уго со гожьяськись но вал, элькунмы понна но трос лэсьтӥз.
ивор басьтэмын «Удмурт кенеш«-лэн огинысьтыз
Со интыяськемын шай вылын. Секыт война аръёсы уго тросаз гуртъёсысь эмъяськонниосы вайылӥзы сӧсырмем яке висись солдатъёсты. Йӧнамъёсыз выльысь фронтэ берытскылӥзы, но ваньмыз бурмонлы ӧз сётӥське. Сыӵеосты отысь ик шай вылэ ватылӥзы. Озьы пыраклы кылемъёс вань Юнда музъем вылын но. Со сярысь вера синпелетлы кичӧлтон сётӥсь, уно аръёс ӵоже гуртысь музейын ужам нылкышно Ангелина Урасинова.
интервью дасямын ГТРК «Удмуртия»