2022-тӥ ар куспын шаермылэн пӧртэм сэрегъёсаз 400-лэсь ятыр ужрадъёс ортчытэмын вал, со пӧлысь 100-эз радъяськиз асьме элькунамы.

Калыкъёслэн лулчеберетсылы сӥзем арлы йылпумъянъёс лэсьтонъя яркыт ужрад ортчиз Удмурт йӧскалык театрын. Ужрад улсын ик радъяськиз калыкъёслэн культуразыя «Даур гур. Перезагрузка» фестивальлэн гала-концертэз но.

Фестивале пыриськемъёслы тау карыса, шуныт кылъёссэс веразы элькунысьтымы культурая министр Владимир Соловьёв, Кун Кенешлэн Тӧроезлэн воштӥсез Татьяна Ишматова, «Удмурт Кенеш» огазеяськонлэн Тӧроез, Кун Кенешысь ялан ужась комиссиен кивалтӥсь Андрей Ураськин, Калык творчествоя элькун юртлэн кивалтӥсез Светлана Кайсина. Озьы ик соос фестивальлэсь лауреатъёссэ пусйизы, данъетъёс сётӥзы.

Фестивальлэн финалаз потэм пӧртэм коллективъёс усто концерт возьматӥзы.

Форум улонэ пыӵалоз «Лулчеберет» нацпроект чотын Президентлэн Лулчеберетысь ӵектосъёсъя фондэзлэн юрттэменыз. Радъяськоз со 15-тӥ-18-тӥ инвожое.

Форуме пыриськозы 18-35 аресъем 70 егитъёс. Соосты дышетозы удмурт лулчеберетэз азинтон понна проектъёс гожъяны, бадӟым ужрадъёсты ортчытъяны. Форум дыръя ик егитъёс басьтэм тодон-валанъёссэс эскерозы — ужалозы «Эктоника но Бабушкина Дача 2022» фестивальын.

Форуме пыриськон понна кулэ «Волонтёры культуры Удмуртской Республики» огинэ пырыса, 27-тӥ куартолэзёзь куриськон келяны (куриськонлы чӧлскон огинын юнматэмын).