Дзержинский нимо ульчаын суредэз интыян бордын ужало ни. Солэсь эскиззэ быдэстӥз Денис Никонов, та суред понна социальной сетьёсын уно куара сётэмын вал.

Акилина Григорьевна Векшина кылбурчи сяна, эмчи луэменыз тодмо вал. Быдӟым ож вакытэ со уно ожгарчиосты йӧнатӥз, нош берло Алнаш калыкез трахомалэсь утиз. Суред Ашальчи Окилэсь кылбурчи но эмчи луэмзэ возьматоз.

Нырысетӥ удмурт нылкышно кылбурчилэсь портретсэ юртлэн борддоръёсаз интыяны Кун Думаысь депутат Лариса Буранова ӵектӥз. Проект улонэ пыӵаз «Удмурт нылкышно кенеш» огазеяськонлэн но Ижкар думалэн кивалтӥсезлэн Фарит Губаевлэн юрттэменызы.

Литературалы сӥзем «ИнГОЖ» конкурсэз «Удмурт дунне» газет радъяз Кун Думаысь депутатэн Лариса Бурановаен ӵош. Отчы пыриськизы удмурт кылын кылбуръёс, веросъёс гожъясь егитъёс.

Вожвылъяськон 3 номинациосъя мынӥз: «Кылбур», «Вакчи верос», «Кузь верос».

Конкурсэ ужъёс вуизы Алнаш, Пичи Пурга, Кизнер, Вавож, Можга, Дэри, Балезино ёросъёсысь, Татарстанысь Кукмор ёросысь но Ижкарысь. Соосты эскериз жюри – «Удмурт дунне» газетысь но Йӧскалык прессалэн юртысьтыз писательёс но журналистъёс.

«Вакчи верос» номинациын 1-тӥ инты басьтӥз Алнаш черкогуртысь Евгения Гусоргина, 2-тӥ инты – Пичи Пурга ёросысь Арлангуртысь Татьяна Ильина, 3-тӥ инты – Ижкарысь Дарали Лели.

«Кузь верос» номинациын 1-тӥ инты люкиськиз Пичи Пурга ёросысь Сосновка гуртысь Галина Евсеева но Ува ёросысь Выль Вамъя гуртысь Лариса Чернышева куспын. 3-тӥ инты басьтӥз Можгаысь Виктория Михайлова.

«Кылбур» номинациын висъязы Алнаш ёросысь Кузёбай гуртысь Ольга Ивановаез.

Вань вормисьёслы коньдон премия висъямын выл. Нош 19-тӥ пӧсьтолэзе Йӧскалык библиотекаын 15 часын «ИнГОЖ» конкурсэ пыриськемъёс понна сиё-дано ужрад ортчоз.