13-тӥ коньывуонэ Йӧскалык политикая министрествоын туала удмурт литературалы сӥзем «ИнГОЖ» конкурсын вормем муртъёсты сӥлы карозы.

«ИнГОЖ усьтӥське» ужрадэ лыктыны быгато вань мылкыд карисьёс, удмурт литератураез гажасьёс, али гинэ гожъяськыны кутскисьёс, профессиональной писательёс.

Ужрад дыръя сиё-дано пусъемын луозы «ИнГОЖ» конкурсын вормисьёс.

Со радъяськиз Кун Думаысь Депутатлэн Лариса Бурановалэн юрттэменыз. Отчы пыриськизы 16 аресысен 35 аресозь егитъёс. Тунсыко ужъёс вуизы Алнаш, Пичи Пурга, Кизнер, Вавож, Можга, Дэри, Балезино ёросъёсысь, Татарстанысь Кукмор ёросысь но Ижкарысь.

Ужрад дыръя ик егит гожъяськисьёс профессиональной писательёсын кенешозы, кыӵе инты калыклэн улоназ басьтыны кулэ туала литература? Кыӵе удмурт литертуралэн ӵуказе нуналыз?

Литературалы сӥзем «ИнГОЖ» конкурсэз «Удмурт дунне» газет радъяз Кун Думаысь депутатэн Лариса Бурановаен ӵош. Отчы пыриськизы удмурт кылын кылбуръёс, веросъёс гожъясь егитъёс.

Вожвылъяськон 3 номинациосъя мынӥз: «Кылбур», «Вакчи верос», «Кузь верос».

Конкурсэ ужъёс вуизы Алнаш, Пичи Пурга, Кизнер, Вавож, Можга, Дэри, Балезино ёросъёсысь, Татарстанысь Кукмор ёросысь но Ижкарысь. Соосты эскериз жюри – «Удмурт дунне» газетысь но Йӧскалык прессалэн юртысьтыз писательёс но журналистъёс.

«Вакчи верос» номинациын 1-тӥ инты басьтӥз Алнаш черкогуртысь Евгения Гусоргина, 2-тӥ инты – Пичи Пурга ёросысь Арлангуртысь Татьяна Ильина, 3-тӥ инты – Ижкарысь Дарали Лели.

«Кузь верос» номинациын 1-тӥ инты люкиськиз Пичи Пурга ёросысь Сосновка гуртысь Галина Евсеева но Ува ёросысь Выль Вамъя гуртысь Лариса Чернышева куспын. 3-тӥ инты басьтӥз Можгаысь Виктория Михайлова.

«Кылбур» номинациын висъязы Алнаш ёросысь Кузёбай гуртысь Ольга Ивановаез.

Вань вормисьёслы коньдон премия висъямын выл. Нош 19-тӥ пӧсьтолэзе Йӧскалык библиотекаын 15 часын «ИнГОЖ» конкурсэ пыриськемъёс понна сиё-дано ужрад ортчоз.