Статьялэн авторез Александр Егоров, УИИЯЛ УрО РАН—ысь тодосчи
Котькинлы тодмо: улон азинскемъя кыл но азинске. Шонергес вераса, сое асьмеос азинтӥськомы — анай кылын вераськисьёс, гожъяськисьёс кылысь кылэ берыктӥсьёс. Удмурт кылмес цивилизацилэн куронъёсызлы тупась карон понна, асьмелы трос ужаны кулэ на.
Удмурт дунне — со экономика но политика, география но ботаника, кылтодос, эмтодос но трос мукет удысъёс.
Озьыен, огшоры вераськон удмурт кыл сяна, вань на гожъяськон удысын паськыт кутӥськись кыл — со газет-журналъёслэн, тодослэн, ужкагаз нуонлэн кылзы.
Туала вакытэ дуннеысь тросаз кылъёсын шӧдӥськыны кутскиз «глобализация» шуон — огъя дуннеысь экономикая, политикая, лулчеберетъя (культурая) но вӧсяськонъя (религияя) интеграция но унификация. Тросэз тодосчиос — кылсярысь, М.В. Алпатова, И.В. Гордеева, Е.С. Гриценко, В.С. Елистратова, А.В. Кирилина, Т.Е Кузьмина, Е.Ф. Тарасова, М.А. Тульнова но мукетъёс — гожъязы ни глобализация сярысь но солэн кылъёс но культураос вылэ влияниез сярысь .
Европаысь кылъёслэсь историзэс учконо ке, литературной кылзэс кылдытон, вераськон кылзылэсь литературной формазэ азинтон вакытэ унояз мукет кунъёсын но трос аръёс ӵоже нюръяськон мынӥз. Кылсярысь, Германиын XVII дауре гожъяськисьёс, кылчиос кема дыр ӵоже нюръяськизы немец кылэ пырем латин но француз кылъёслы пумит, XVIII дауре чехъёс вераськонысьтызы немец кылъёсты палэнтыны выризы, финнъёс — швед но немец кылъёсты, эстонецъёс — немец но ӟуч кылъёсты. Выль кылъёс но нимкылъёс кылдытон бордын куинь даур ӵоже нюръяськизы венгеръёс. Творчество удысын ужась мадьяръёс, тодосчиос но кылчиос, мадьяр кылъёсысь ик, латин но немец кылъёсъя калька амалэз уже кутыса кылдытӥллям 10 000-лэсь уно выль кылъёс. Соос пӧлысь литературной кылазы пырем 5000 пала кыл.
Европаысь тросаз кунъёсын тодосчиос секыт югдурен лыдъяло туала вакытэ англи кыллэсь паськытгес но паськытгес вӧлмемзэ.
Туала Франциын, кылсярысь, глобализацилэсь кужымзэ кулэстон понна кунэн нимысьтыз кылъя политика нуиське. Солэн валтӥсь целез француз кыллэсь интызэ утён котькыӵе сфераосын. Со понна ужало кылъя политикая институтъёс (Француз Академия, терминологияя но неологияя Генеральной комиссия, француз кылъя но Франциысь кылъёсъя Валтӥсь управление но мукет).
Француз тодосчиос сямен, англи кылэз лябомытон понна одӥгез трос пайда ваись амал луэ официальной француз кыллэн словарной составысьтыз англи выжыё кылъёсты палантон. Со понна англи кылъёс интые зэмос француз кылъёсты пыртоно. Та югдур возьматэ, одӥг ласянь, Франциын ортчись туала кылъя регулированилэсь луонлыкъёссэ, нош, мукет ласянь, француз кыллэсь выль узырмон амалъёссэ.
Огшоры француз кыллэсь но палэнэ уг кыльы та процессъёслэсь: кылсярысь, Франциысь огезлэн кылъя политикая институтлэн — терминологияя но неологияя Генеральной комисссилэн — сайтаз ӵектэмын Вашкала кылъёс вылэ пькиськыса кылдытэм выль лексика, ялэмын соиз яке таиз выль француз термин понна куара сётон. Кыл удысысь та выллем кун политика тужгес но кулэ луэ глобализация вакытэ, йӧскалык кылэз но культураез утён понна.
Удмурт письменность, кызьы тодӥськомы, кылдытэмын XVIII дауре, кириллица вылэ пыкиськыса. XVIII даурлэн шораз, черкъёслэн мылкыдзыя, кутске удмурт кылэз дышетонъя бадӟым уж. 1775-тӥ арын печатлаське нырысетӥез удмурт кылъя грамматика. Кык даур ӵоже миссионеръёсн о Россиысь тодосчиос бадӟым уж нуо лингвистикая материалъёсты люканъя но радъянъя. ХIX даурлэн пумаз но ХХ даурлэн кутсконаз та уж кужмоя, мер (общественной) улонын огъям литературной кыл кулэ луэмен.
1917-тӥ арьн Казане люкаське Поволжьеысь но Уралысь пичи калыкъёслэн съездзы. Отчы пырисько удмурт калыклэн тужгес дышетскем адямиосыз — публицист, филолог, этнограф Трофим Кузьмич Борисов, писатель, драматург но педагог Иван Степанович Михеев, прозаик, драматург но кылбурчи Константин Сергеевич Яковлев, кылбурчи, педагог, просветитель, «Интернационалэз» удмурт кылэз берыктӥсь Максим Прокопьевич Прокопьев но мукетъёс. Кенеше льштэмъёс нырысь ик эскеризы удмурт калыклэсь дышетон удысын кылдэм ужпумъёссэ, котькудӥз ас вылаз басьтӥз учебникъёс кьлдыто сярысь сюлмаськонэз.
Трофим Кузьмич Борисов, кылсярысь, басьтӥськиз удмурт кылын гожъяськонъя учебник но удмурт-ӟуч кьллюкам кылдытон борды.
Но огъя удмурт литературной кыл кылдӥз 1920-тӥ аръёсы гинэ. Та ужез быдэстон понна трос лэсьтӥз удмурт кылэз улонэ пыӵатонъя ӧри, кудзэ собере «Рудья» шуыса нимазы. Со быгатӥз удмурт литературной кыллы огъя правилоос кылдытыны но соосты юнматыны, выль нимкылъёс пыртылыса, удмурт кылэз узырмытыны кутскиз.
Та ӧрилэн ик отемезъя 1928-тӥ арын удмурт шаере вуылӥз тодмо ӟуч академик, филолог, историк, этнограф но археолог Николай Яковлевич Марр. Облисполкомен но «Рудья» ӧриен радъям кенешын вераськиз быдӟым лингвист но. Николай Яковлевичлэн удмурт кылтодосчиослы ӵектэм дэмланъёсыз пӧлысь одӥгез таӵе вал: «Удмурт кылэ пыртылыны кулэлыкез ӧвӧл ни сыӵе калыкъёслэн кылъёсысьтызы нимкылъёсты (терминъёсты), кудъёсыз дунне вылын но ӧвӧл ни. Чаклалэ пичиослэсь, школаын дышетскисьёслэсь вераськемзэс. Дӥсьтыса пыртылоно книгаосы, гожъяно газетъёсы улэп кылэз. Озьы гинэ узырмоз но юнмалоз тӥляд кылды, валамон луоз вань удмуртъёслы» (Гудыри. 1928. N87. 27-тӥ пӧсьтолэзь).
Удмурт кыллэн азинсконаз выль вакыт кутскиз, Совето власть вуэмен. XX дауре обществолэн ортчем сюресэз, соин ӵош ик Советъёслэн сюрессы меӵак возьматӥз, кылэн герӟаськем ужъёсты радъяны кулэ кун шуыса, кулэ луо нимысьтыз программаос, со ужпумъёсты быдэсъян понна кутоно катъёс но мукет документъёс.
1920-тӥ-50-тӥ аръёсы литературной кыллы инъет быръемын вал, шонер гожъяськонъя но знакъёс пуктылонъя правилоос радъямын, поттэмын орфографияя (1936, 1959) словарьёс, кылдытэмын школаослы удмурт кылъя но литературая выль учебникъёс (С. Жуйков, А. Баинцев, А. Поздеева, А. Галичанина, А. Конюхова, М. Горбушин), кутскемын удмурт лексикая выль кылъёс кылдытон но соосты радъян ужъёс.
Соку та удысын сюлмо ужазы кылбурчи, прозаик но просветитель Иван Васильевич Яковлев, кылбурчи, гожъяськись но тодосчи Михаил Ильич Ильин, тодосчи Семен Прокопьевич Жуйков, тодмо кылбурчи, прозаик, общественной деятель, тодосчи Кузебай Герд.
Удмурт кыллэн азинскон катъёсызлэсь луонлыкъёссэ уже кутыса но финн, ӟуч кылъёсты калька амалэн кылысь кылэ берыктыса, Кузебай Герд 300 пала выль кылъёс но нимкылъёс (терминъёс) кылдытӥз. Соосты со печатлаз «Кенеш» журналлэн 1926-тӥ, 1928-тӥ аръёсы потэм 3-тӥ-4-тӥ, 15-тӥ номеръёсаз. Кузебай Гердлэн тросэз выль кылъёсыз удмурт литературной кылэ пыризы, кылсярысь, таӵеосыз: верос, кылбур, кылбурчи, азьветлӥсь, ужазинлык, уждун, кунгож, йыръян, азькыл, инкуазь, инвие, дано ним, калыккылос (фольклор), быдӟала, мындала (тираж), йыруж, чильпыраны, азьланьлык но мукет. Кузебай Гердлэсь адӟем карыса, выль кылъёсты газет поттонын ужасьёс, гожъяськисьёс но кылдытъязы. Удмурт литературной кыллэн словарной составез озьы трослы узырмиз. Жаляса верано одӥгзэ гинэ: Гердлэн ванымыз ик выль кылъёсыз литературной кылэ ӧз пыре.
1940-тӥ аръёсы удмурт вераськетъёсы вӧлмем кылъёсты уже кутонлы пленум меӵак пумит кариське, ӵектэ ӧжыт вӧлмем «надуманной» терминъёслэсь мозмытскыны, кун, кенеш, пукран, курбон, быдӟым, эксэй выллем кылъёслэсь палэнскыны, соос вашкала улонэз, буржуазной идеологиез возьмато шуыса, пӧрмемзыя бигер луись кылъёсты но косэмын вал ӟуч кылъёсын воштыса гожъяны. Озьы кутскиз удмурт литературной кыллэн азинсконаз куинетӥез вакыт, кудӥз 1990-тӥ аръёслэн кутсконзы дорозь кыстӥськиз. Озьы 1940-тӥ-90-тӥ аръёсы литературной кыламы туж трос ӟуч кылъёсты пыртыны ӧдъязы, удмурт кылын верано луонозэ но ӟуч кылын вераны но гожъяны кутскизы, кылсярысь: обращение-вазиськон интые, приветствие — ӟечкылан интые, Верховной Совет — Вылӥ Кенеш интые, существительной — нимкыл интые, вопросительной знак — юан пус интые, умножение — уноян интые, вычитание — кулэстон интые; договоричкыны, обижачкыны, соревновачкыны выллем кылъёсты но вераськонэ пумтэм трос кутыны ӧдъязы. Озьы удмурт кыллэн грамматической радызлэн удмурт вылтусыз но шӧмыз чылкак ышизы-быризы.
Литературной кыллэн азинсконэзлэн куинетӥ вакытаз удмурт кыллэсь теоризэ, ономастикаез, вераськетъёсты дышетон, 1920-тӥ-50-тӥ аръёсын ӵошатыса, шӧдскымон азинскиз ке но, удмурт кыллэсь лексиказэ выль кылъёсын, выль нимкылъёсын узырмытон удысын нокыӵе адӟем карымон уж ӧз нуиськы. Удмурт кыллэсь ӟучо-удмурто луэмзэ шӧдыса, 1980-тӥ аръёслэн пумазы но 90-тӥ аръёслэн кутсконазы творчество удысын ужасьёс, тужгес ик книга-газет поттонын, радиоын, телевидениын тыршисьёс, гожъяськисьёс но тодосчиос нош ик басьтӥськизы удмурт кыллэсь лексиказэ выль кылъёсын но нимкылъёсын узырмытон борды. Вераны кулэ: вакчи дыр куспын та удысын шӧдскымон азинсконъёс басьтэмын: выльысь улыӟытэмын вунэтэм вашкала удмурт нунал но толэзь нимъёс, удмурт кыллэсь кыл пӧрмытон пуш законъёссэ лыдэ басьтыса но берыктонэз уже кутыса, трос гинэ выль нимкылъёс кылдытэмын. Удмурт кылэ соос пӧлысь уноез пыӵазы ни, кылсярысь: тӧро — председатель, тӧролэн воштӥсез — аместитель председателя, зарезьчи — моряк, крезьгурчи — композитор, кыкчи — двоечник, вераськет — диалект, вакытъян — периодизация, Вылӥ Кенеш- Верховный Совет, камкоӵо — чайка, лулсэр — нерв но мукет.
Таин валче Удмурт Элькунысь Кун Кенешлэн Кивалтэтэз 1995-тӥ арын «Удмурт нимкылъёсъя но шонер гожъяськонъя элькун ӧри сярысь» постановление кутӥз. Со азьын сылӥсь ужпумъёс бадӟымесь но паськытэсь. Ӧрилэн ужамезъя 1995-тӥ арын печатламын Элькунмылэн выль Конституциез.
Ӧри радъяны кулэ выль нимкылъёс но валатонъёс кылдытонъя ужез, пумен соосты пыӵатыны кылэ, калык пӧлы. Та ласянь нимысьтыз ужпум сылэ вал удмурт школаосысь дышетӥсьёс, учебникъёс но дышетон методикая пособиос кылдытӥсьёс но кылтодосчиос азыын. Угось, пиналъёс ӝог валало но вераськоназы куто выль валатонъёсты но нимкылъёсты, собере ини соос вӧлмо калык пӧлы. Термино-орфографической ӧрилы бадӟым юрттэт сётыны кулэ иворъёсты вӧлмытонъя ёзъёс, газетъёс, журналъёс, радио но телевидение.
Бадӟым уж сылэ вал инты нимъёсъя ёзэт азыын но: вань ёросъёсы экспедициосы потано, карта вылэ пыртоно пичизэ но, бадӟымзэ но инты нимъёсты.
Ӧри азе озьы ик пуктэмын ужпум пӧртэм пумо кыллюкамъёс (орфографияя, синонимъёсъя, диалектологияя, фразеологияя, омонимъёсъя но мукет), удмурт кыллэн грамматикаезъя учебникъёс кылдытыны. Куд-огез соос пӧлысь быдэстэмын ни, но троссэ эшшо лэсьтоно на.
Элькунысьтымы кун ёзъёслэн, вылӥ дышетсконниослэн, наукая ужъюртъёслэн, дышетон удысын ужасьёслэн, ивор вӧлмытон ёзъёслэн дэмен тыршеменызы гинэ быдэстэмын луоз та туж бадӟым но кулэ уж.
Вератэк уг лу соизэ но: та ӧрилэн кылъёсыныз лыдӟисьёс пӧлысь куд-огез соглаш ӧз кариське, «Удмурт дунне» газетын но трос гинэ ченгешонъёс вал. Мугез талэн, одӥг ласянь, со бордын но, дыр: выль кылъёслэсь пуштроссэс, кызьы пӧрмемзэс валаны дышетытэк, соосты нуналмысь потӥсь газетъёсы печатлатэк, соку ик радиое но телевидение поттыны уг яра вал, дыр. Кыкетӥез муг: конституциын трос гинэ пумисько юриспруденциен, политикаен, экономикаен герзаськем кылъёс, кудъёс, удмурт кылын гинэ ӧвӧл, ӟучаз но тросэз валантэмесь луо.
Мар веранэз, ӵем дыръя удмурт кылын но, ӟуч кылысь асэстыса, пӧртэм пумо англи терминъёс кутӥсько: шуом, компьютер, принтер, сканер, брокер, маклер, инфляция…
Асьмелы но быгатэммыя тыршоно сыӵе кылъёслы удмурт вариантъёс утчаны, удмурт кылэз чылкытгес но чебергес карон понна.
Выль кылдытэм нимкылъёс куд-огезлы уг ке но ярало, мынам малпамея, та ужен азьланяз но вырыны кулэ, малы ке шуоно, ачим но ӵем кылысь кылэ берыктонэн вырисько бере, туж умой валасько, удмурт кылын туж ӵем уг тырмо кулэ луись кылъёс, сюбег сфераосысь (специфической) терминъёс. Жаляса верано, со возьматэ асьме литературной кылмылэсь куанер луэмзэ, сое одно ик узырмытоно на выль но выль кылъёсын, кыл сочетаниосын, волятоно сое стиль ласянь но, тросгес уже кутоно вераськетъёсын кутӥськись кылъёсты но люкыны луонтэм кылтэчетъёсты (фразеологизмъёсты). Та уже пыриськыны кулэ котькудӥз ассэ гажась удмурт адями: кылчи-а со яке кыӵе ке мукет удысъя ужась тодосчи, дышетӥсь, гожъяськись, газет-журнал поттӥсь яке кивалтонын ужась.
Огез вамыш та югдурез тупатон бордын лэсьтэмын ни мадьяр тодосчилэн, Янош Пустаилэн юрттэменыз но: удмурт школаослы дасямын 10 предметъёсъя кыллюкамъёс (математика, физика, химия, литература, информатика но мукет).
Оскисько, мынам гинэ ӧвӧл со малпанэ, асьмелы но, удмуртъёслы тросгес нуоно выль кылъёс пумысен валэктон уж, ӵемгес печатлано нимысьтыз выль кылъёсын списокъёс, соослэсь пуштроссэс усьтыса но пӧрмемзэс валэктыса. Озыы гинэ быгатомы удмурт кылмылэсь лексиказэ чылкыт, чебер но узыр карыны.
Хохрякова Ксения Михайловна, УдГУ-ысь Удмурт филологияя, финно-угроведениея но журналистикая институтысь дышетскись
Тодослыко кивалтӥсьёсыз: Арекеева С. Т., к. пед. н., доцент, Федорова Л.П., к. пед. н., доцент
Кузёбай Герд – со быдэс удмурт калыклэн Дышетӥсез-Югдытӥсез, озьы ик солэн ӧнер ужез но дышетонэн герӟаськемын вал. Таин валче со школаослы, педтехникумъёслы программаос но дышетон книгаос кылдытон бордын тыршиз.
1924-тӥ но 1929-тӥ аръёсы Герд дасяз кык лыдӟон книгаос: «Шуныт зор» но «Выль сюрес». Дышетон книгаослы инъет луизы Ян Коменскийлэн, Константин Ушинскийлэн, Лев Толстойлэн но удмурт югдытӥсьёслэн Иван Михеевлэн, Иван Яковлевлэн тодослыко малпанъёссы.
«Шуныт зор» книга чакламын «3-тӥ арзэ дышеськысь пиналъёслы». Жанрезъя со нимамын «лыдӟон-ужан» книга. Сое усьтэ таӵе эпиграф: «Удмурт калыклы – удмурт кыл». «Книга гожъясьлэн кылыз» люкетаз Герд пусъе: «Та книга пиналъёслэсь сюлэмзэс шуныт зор кадь ик мед шунтоз. Сое лыдӟыса, пиналъёс удмурт кылзэс яратэмысь медаз дугдэ. Удмурт кылын кӧӵе чебер кылбуръёс, веросъёс та вадесын вань, мон сое ваньзэ “Шуныт зоре” бичаны сюлмаськи».
Книгае пыремын удмурт но ӟуч авторъёслэн пӧртэм жанръем чеберлыко гожтосъёссы: веросъёс, кылбуръёс, басняос, мадиськонъёс, выжыкылъёс, калык кырӟанъёс. Со сяна, пыртэмын на инкуазь сярысь, удмуртъёслэн сям-йылолъёссы сярысь но мукет темаослы сӥзем тодон-валанэз будэтӥсь (познавательной) текстъёс.
«Шуныт зор» книга куинь люкетлэсь пӧрмемын: а) «Улон-вылонъёс», б) «Арлэн дыръёсыз», в) «Вашкала дыръёс».
«Улон-вылонъёс» люкет кык пичи ёзэтъёслэсь пӧрме на: «Сьӧд нуналъёс» но «Горд нуналъёс». Озьыен, Герд тырше нылпиосты мерлыко ужпумъёсын тодматыны, узыръёс но куанеръёс вискын мынӥсь нюръяськонэз соослы возьматыны, выль улонлэсь пуштроссэ вуж улонэн ӵошатыса усьтыны. Милям малпаммыя, та люкетэ пырем куд-ог текстъёс нылпиослэн арлыдзылы уггес тупало: со – «Бунтар Онтон», «Синьтэм Миквор», «Эксэй кошкиз войнае», «Революци», «Интернационал», «Удмурт автономи» но мукет. Автор та кылбуръёслы таӵе но муген вазиськиз, дыр: 1924-тӥ арын пичиослы гожтэм чеберлыко текстъёс туж ик трос ӧй вал али.
Тужгес но устоесь произведениос быръемын «Арлэн дыръёсыз» люкетэ, татын лыдэ басьтэмын пичи нылпиослэн быгатонлыкъёссы но, тунсыкъяськонъёссы но. Кылсярысь, книгае пыремын выжыкылъёс, Михаил Прокопьевлэн познавательной пуштросъем «Тыпы» но «Ӵӧжмер» веросъёсыз, Ашальчи Окилэн «Вордӥськем музъеммы» кылбурез но «Аран дыръя» веросэз.
«Вашкала дыръёс» люкетэ пырем чеберлыко но познавательной текстъёс пичи лыдӟисьлы луонлык сёто удмурт калыклэсь ортчем сюрессэ, историзэ возьматыны, сое гажан но соин данъяськон мылкыд пыӵатыны. Кылсярысь, Кузебай Герд кулэен лыдъя, нылпиос Мултан уж сярысь мед тодозы шуыса. «Удмуртлэн курадӟемъёсыз» люкетын тазьы мадемын: «Удмурт калыклы нэномыр валатэк, пеймыт улэменыз уно шугадӟонъёс етоз вылэм. Одӥг сыӵе бадӟым шугадӟон 1892 арын Мултан удмуртъёслы етэм». Текст тазьы йылпумъяське: «Та гожтэм уж Мултанысь сизьым удмуртлэн ужез гынэ ӧвӧл. Со сизьым удмуртэз адямиез вӧсяллям шуса шеко карыса казаматэ ворсасалзы ке, соёслэн шексы вань удмурт калыклы но етысал, со вань удмуртлы вӧсь карысал: вань удмурт калык адямиез вӧся шуса али но верасалзы, удмурт калыклэн нимыз мукет калыкъёс куспын дантэм ним луысал».
«Шуныт зор» книгалэсь методической аппаратсэ пӧрмыто таӵе рубрикаос: «Юан-вераськонъёс», «Ужъёс», «Пересьёслэн верамъёссы», «Мадён», «Кенеш», «Вашкала кылъёс», «Удмуртъёслэн куазез эскеремзы». Син шоры йӧтэ ужъёслэн практической пуштроссы. Кылсярысь, автор сюлмаське, нылпиос гуртысьтызы фольклор но этнографи материал бичаны мед дышозы шуыса, озьы ик – суредаськыны, аппликация лэсьтыны, лепить карыны. Нимысьтыз саклык висъямын гигиенаез чакланэн герӟаськем быгатонлыкъёссылы. Кылсярысь, «Шайтан уллян» кылбур бере куинь пӧртэм ужъёс сётэмын: 1) Юан-вераськонъёс: «Тӥ пал удмуртъёслэн “шайтан уллян” йылолзы вань-а? Мумы-айыостылэсь юалэ-вералэ: кызьы азьлон шайтан улляло вал? Соёслэсь верамзэс гожтыса сётэ». 2) Ки ужъёс: «Сюез, пуэз тачыртонъёс лэсьтэ. Гуртысь “шайтан уллян” тӥрлыкъёссэс школаады люкаса пичи музей лэсьтэ». 3) Шудон. «Азьлон удмуртъёс кызьы “шайтанэз улляло” вал, тӥ но соёс сеен ик, “шайтан уллян” спектакль лэсьтыса, шудэ. Лэсьтэмдылэсь азьло удмуртъёслэсь юалэ: кызьы, ма сеен соёс лэсьто вал. Собере быдэс классэн огазьын “Шайтан уллян” пьеса гожъялэ». Кызьы луэ адӟыны, куспазы пӧлэстэмын тодон-валанэз будэтӥсь, творчествоез азинтӥсь но киын ужаны дышетӥсь юанъёс-ужъёс.
«Юан-вераськонъёс» рубрикаын сётэм юанъёс огъя юртто нылпилы лыдӟем гожтослэсь пуштроссэ валаны, валтӥсь малпанзэ висъяны, геройлэсь вамышъёссэ но ужъёссэ валэктыны. Книгалэн авторез кенешыса кадь вераське пичи лыдӟисеныз, дышетэ сое малпаськыны но малпанзэ усьтыны. Огдыре ик, чакламмыя, ӧжытгес саклык висъямын кыллэсь чеберлыксэ синйылтонлы, солэсь интыяз кутӥськемзэ эскеронлы, огъя кылын вераса, гожтосъёслэсь эстетика тодметъёссэс висъянлы но дунъянлы. Таиз валамон: нырысетӥ интыын сылӥз югдытон уж, нылпиосты визьман-визьнодан. Нош произведенилэн астусэз (формаез) бордын ужан, солэсь чеберлыко тодметъёссэ висъян – кыкетӥ интыын.
Озьы ке но, книга тунсыко, узыр, туала кылын вераса, «практикоориентированной» луэ, отчы туж кулэ луись «деятельностный» принцип пыӵатэмын, троссэ ужъёсты проектной но шуыны луысал. Ачиз Кузебай Герд пусъе: «Туала арын комплекс метод сярысь уно верасько; комплекс методъя дышетон туж умой маке. Та книгаме со методъя дышетыны каньылгес медло шуса, гожъяны сюлмаськи. Соин котькудаз статья бӧрсьы уно юаськонъёс, эскеретъёс, ужъёс пуктӥ. Со юаськонъёс, ужъёс дышетысьлы сюрес возьматозы кадь потэ». Зэм но, 1920-тӥ аръёсы дышетон но дышетскон удысын пайдаё лыдъяськиз комплекс амал, кудӥз кулэ кариз тодон-валанъёсты практической быгатонлыкъёсын но улонэн герӟаны.
Вить ар ортчыса, потӥз Гердлэн «Выль сюрес» лыдӟон книгаез. Автор пусъе, со пӧртэм группаослы тупалоз шуыса. «Шуныт зор» книгаын сямен ик, татын но шараясько таӵе дидактика принципъёс: тунсыко луон (занимательность), арлыдлы тупан (доступность), син азе пуктымон луон (наглядность), малпаса радъян (системность) но мукет. Огдыре ик дышетскон книгалэн пуштросэз но пушгерӟетэз трослы выльдэмын.
Валтӥсь принцип – календарно-тематической. Кылсярысь, «Толалтэ» люкет висъямын таӵе ёзэтъёслы: «Толалтэ инкуазь», «Урамын но коркан», «Школайын но гуртын», «Гуртысь – каре», «Ленин нуналъёс», «Горд арми нунал», «Удмурт улос нунал», «Нылкышно нунал».
Книгае пыремын Иван Яковлевлэн, Багай Аркашлэн, Михаил Ильинлэн, Ашальчи Окилэн, Михаил Прокопьевлэн, Прокопий Гороховлэн, Айво Ивилэн произведениоссы. Милям малпаммыя, 1929-тӥ арлы нылпиослы гожъям ужъёслэн лыдзы будӥз, соин ик Герд быгатӥз книгаезлэсь пуштроссэ уката узырмытыны но удмуртлыко карыны. Тужгес трос пыризы аслаз Гердлэн кылбуръёсыз: тодмо, макем усто со быгатӥз гожъяны нылпиослы. Ф.К. Ермаковлэн верамезъя, 88 кылбуръёс пӧлысь ог 90 процентэз – Гердлэн.
«Ю-няньлэн бӧрдэмез» шудонлэн (пьесалэн) авторез но луэ Кузебай Герд. Со бӧрсьы таӵе творческой уж сётэмын: «”Ю-нянь нуналэ” тае спектакль пуктэ. Та шудонъя асьтэос мукет емышъёс сярысь та выллем шудон гожтыса, спектакль пуктэ». Нош ик адӟиськомы: нылпиослэсь тодон-валанзэс паськытатэм сяна, Герд сюлмаське практической быгатонлыксэс но азинтыны.
Хрестоматие, чеберлыко произведениос сяна, таӵе тодон-валан сётӥсь (познавательной) но визьнодась текстъёс пыртэмын: «Кызьы калыкъёс няньзэс кутсало», «Маин адями ветлэ», «Кызьы гожтэтъёс гуртысь каре ветло» но мукет. Соос вакчиесь но яркытэсь, тунсыко сюжетэн.
Лыдӟон книгаын бадӟым инты басьто гигиенаез но санитариез чакласа улыны нодъясь ужъёс. Тани Иван Векшинлэн «Милям мунчомы» гожтосэз бере сётӥсько таӵе юанъёс но ужъёс: «Тӥляд кызьы мунчоды лэсьтэмын: йыре йӧттэ-а, уг-а? Вань-а гуртады “тӧдьы” мунчо? Ӵем-а мунчое ветлӥськоды? Эскере, кызьы тӥляд гуртады мунчоос лэсьтэмын. Кӧня “сьӧд”, кӧня “тӧдьы” мунчоос? Кӧня семья майталэн, кӧняез пеньвуэн, веньыкен мунчое пыро».
Югдытон ужлы валтӥсь инты сётэмын ке но, таяз учыре книгалэн авторез произведенилэсь чеберлыксэ синйылтонлы саклык тросгес висъя ини. Кылсярысь, «Толэзь» кылбур бере таӵе юанъёс пуктэмын: «Толэзез кинэн укшатыса верамын? Малы сое азвесь тушо муртэн укшатэмын? Луэ-а толэзьлэн инмысь васькамез? Улэп-а толэзь? Малы сое луло кадь карса верамын?».
Кыллэсь чеберзэ но лэчытсэ, калыклэсь визьзэ валаны дышетӥсь материал луо калык кылосысь пичи жанръем произведениос, озьы тросэз текстъёс бере сётӥсько мадькылъёс, кудъёсыз юнмато но муромыто эскерем темаез. Тани «Толэзь» кылбур бере мынӥсьёсыз: «Корка йылын палнянь», «Гур тыр перепеч, шораз – одӥг колды», «Вордкыкыз – сюрло, будыкыз – сяртчынянь, кулыкыз – бискыли». «Кызьы бусӥын дэрем будӥз» верос бере автор сётэ таӵе мадькылъёсты: «Монэ тышказы, жугизы, сэстӥзы, коттӥзы, куасьтӥзы, вылазы дӥсяса куное кошкизы», «Бусы шорын чагыр кышет», «Удмурт кышно куссэ керттоз но, вуэ тэтчоз». Озьы ик тунсыко визькылъёс но ӵектэмын. Т.Г. Волкова пусъе: «Кылбурчи туж быгатыса кылдытэ литературной мадиськонъёсты: “Одӥг корка вань: пушказ пырыку синтэм пыриськод, потыку – синмо потӥськод”. Валаны секыт ӧвӧл, Герд туала улонэз чакласа, школа сярысь мадиськон кылдытэм».
«Шуныт зор» книгаын сямен ик, «Выль сюрес» хрестоматиын но трос трос ужъёс суредаськонэн герӟаськемын. Кызьы пусъе Л.П. Федорова: «Герд малпаз луоз, суредаськон юрттоз нылпилы текстэз но умойгес валаны, син азяз пуктыны быгатонзэ (воображенизэ) но азинтыны, лыдӟемзэ выльысь ас пыртӥз поттыны» («Видимо, Герд предполагал, что передача прочитанного посредством рисунка способствует и лучшему усвоению текста, и развитию творческого воображения, дает возможность вторично пережить прочитанное»). Оглом автор бадӟым саклык висъя наглядностьлы. Книгае трос суредъёс пыртэмын. Кылсярысь, «Маин адями ветлэ» темалы сётэмын таӵе суредъёс: пужей, пыж, эшак (осёл), дуэ (верблюд), зӧкпыж (парокод), кыкпитран (велик), валтэм уробо (автомобиль), лобан машина (аэроплан). Ф.К. Ермаковлэн гожтэмезъя, со суредъёс пӧлысь ог сюэз быдэстэмын Кузебай Гердэн.
Книгалэн пумаз – «От составителя» люкетаз – Кузебай Герд вера валтӥсь дышетон мугъёс сярысь:
Книгаослэсь пуштроссэс но пушгерӟетсэс эскерыса, ми вуимы сыӵе малпанэ: быръем текстъёс, малпам ужъёс ӵапак тупало та мугъёсты быдэстыны. Туннэ но троссэ текстъёсты, соослы пуктэм юанъёсты но ужъёсты дышетон книгаосы выжтыны луысал.
Элькунмылэн картаез шоры учкыса, ӵемысь син шоры сюро одӥг кадь гурт нимъёс. Шуом: Игра (Эгра ёрос), Старая Игра, Верхняя Игра (Грах ёрос), Алганча-Игра (Пурга ёрос); яке Выль Моння-Сьӧлта но Пичи Пурга ёросъёс; озьы ик Бадӟым Пурга, Тупал Пурга (Эгра ёрос) но Пичи Пурга (Пичи Пурга ёрос). Талэн мугез тросэзлы тодмо – со вашкала удмуртъёслэн воршуд выжыен улон сямзы.
Милям но, Пичи Пурга черкогуртын улӥсьёсслэн, тодэммы потӥз малы меда милям Пургамы, кудаз улэ ог тямыс сюрс адями, нимаське «пичи», нош Эгра ёросысь Бадӟым Пургаез, кудаз улӥсез ог 100 пала гинэ лыдъяське, «бадӟым» шуо? Малы Пурга вӧзысьтымы Орлой гурт куке но Кваскашур-Пурга нимаськиз, нош Куреггуртэз пересьёсмы Агрыз-Пурга шуылӥллям? Сыӵе юанъёс луонлык сётӥзы «Воршуд шурлэн кутсконаз – выль сямен учкон» проектлы вордӥськыны, кудӥз «Культурная мозаика малых городов и сел» огъяросси вожвылъяськонын одӥгез вормисез луиз.
Проектэн ужакумы (со ужрад радъямын вал 2 ар ӵоже, 2015-тӥ-2016-тӥ аръёсы) пуктэмын вал таӵе ужпумъёс: Пичи пурга но Бадӟым Пурга черкогуртъёслэсь историзэс эскерыса, отын улӥсьёслэсь улон сямъёссэс, йылолъёссэс ӵошатыса, пыӵатыны будӥсь нылпиосмылы вордскем шаерзэс но калыксэс гажан но яратон мылкыд.
Со понна егитъёс пӧлын кылдытэмын вал куинь исследовательской группаос, кудъёсыз эскеризы Пурга выжылэсь йылолъёссэс, сямъёссэс, дӥсьcэс, чорыган, пӧйшуран но муш возён сямъёссэс, озьы ик удмуртъёслэсь улон шоры учконзэс.
Кык ар ӵоже трос гинэ лэсьтэмын вал – экспедициен вуылӥмы вашкала пересьёсмылэн улэм интыязы – Эгра ёросысь Бадӟым Пурга черкогуртэ, пумиськылӥмы пересьёсын (кызьы али шуо – информантъёсын), эскеримы тодосчислэсь ужъёссэc — та ласянь бадӟым юрттэт сётӥзы М.Г.Атамановлэн ужъёсыз, асэныз нo пумиськон радъямы вань та лэсьтэм ужмы вылэ пыкъяськыса, ёрос лыдӟиcькон юртын тунсыко этноэкспозиция усьтӥськиз, озьы ик Чимошурын пӧйшуранлы, чорыганлы но муш вордонлы сӥзем музей усьтэмын вал.
Ортчытӥм бадӟым фестиваль, кудӥз огазеяз ёросысытымы Пурга Воршудысь потэм калыкез — нош соос уло Пурга, Орлой, Бигра, Курег но Чутожмон гуртъёсын (нялтас верало на, Пурга воршуд луэ одӥгез бадӟымез воршуд, со пумиське 170 гуртъёсын). Озьы ик дорамы вуылӥзы Эгра ёросысь Бадӟым Пурга черкогуртысь вaшкaлa вoршуд ӵыжы-выжыосмы. Татарстанысь но куноосмы вуылӥзы – варклед-бӧдьяос, кудъёсыз куке но улэмын Пичи Пургалан, Пурга воршудэн артэ, нош кыӵе ке но мугъёсъя кошконо луиллям али улон интыосазы. Соос но та нуналэ гуртазы бертылэм кадь луизы. Фестиваль пӧрмиз зэмос праздниклы, кытын котькудӥз валаз аслэсьтыз кин луэмзэ, данъяськыны кутскиз аслаз выжыеныз.
Ми но, пичи пургаос, юимы кадь вашкала выжыосмылэсь ошмeсысьтызы дун вузэс, шодӥм соослэсь юрттэмзэс но кужым сётэмзэс. Куке но вискысытымы чигтэм сӥньысмес быгатӥмы выльысь ваче герӟаны.
Улонэ пыӵатэм проектмы бугыртыны быгатӥз ёросысьтымы калыкез но, тросээ тунсыкъяськыны кутскизы асьсэ выжыенызы. Та ласянь адӟымон луиз Баграш-Бигра гуртысь Ботё семьяослэн адӟытонзы, соос ас мылкыд каремзыя вазен ини выжызылэсь историзэс эскеронын бадӟым уж нуо, али но Ботё выжызылэсь пуссэ утё. (Пус шуэмысь. Та ужен вырыкум, аслым ачим но усьтон лэсьтӥ. Ӵужмемеелэсь кылем чыртывесям жильы бордын дурeмын азвесь коньдонлы укшась арбери, кудаз пуктэмын кыӵе ке нo cуред. Мон ноку но ӧй вaлaлля, малы со висъяське мукет коньдонъёслэсь. Мыным сое анае но вераны ӧз быгаты, ӵужмемее но ӧй вал ини. М. Г.Атамоновлэсь «Происхождение удмуртского народа» книгазэ лыдӟем берам гинэ валай – со дэндор (яке милям дэмдор) вылэм шуыса — выжымылэн пусыз. Туж шумпотӥ, со пус ми дорозь вуыны быгатэм шуыса). Воршудлы cӥзем фестивалямы ваньзэсты паймытӥз Анатолий Иванович Прозоров, кудӥз озьы ик ас выжыпушъетъёссэ эскерoнлы трос саклык виcъяз.
Проектлэн ужaмeз улсын ёросмылэн пӧртэм сэрегъёсаз — гуртъёсын ортчизы Бигра, Норья воршудъёслы сӥзем ужрадъёс, бадӟым исследовательской уж нуиське Эдэйгуртын Уча воршудъя.
Удмуртъёслэн воршуд выжыен улэмeнызы Кузебай Герд но тунсыкъяськиз. «Докья выжы удмуртъёс» ужаз со гожтэ «Вашкала дыръя удмуртъёс выжыен-выжыен улозы вылэм. Котькыӵе выжы ялан ас понназ, ас выжы калыкеныз гинэ улоз вылэм».
Кузебай Герд азиз Докъя воршуд выжыысь луэ. Кызьы тодмо, со выжы Вавож ёросысь милям ёросамы но вуэмын — Яган-Докья гуртэ. Та гуртын улӥсьёс вазен ини асьсэ выжыенызы тунсыкъясько. Шаерчи Людмила Михайловна Посадова кивалтэм улсын пиналъёс исследовательской ужъёс нуо, со ужъёсынызы Москваын но пӧртэм вожвылъяськонъёсы пыриськылизы ини.
Кузебай Герд вуылэмын милям ёросамы, Яган-Докьяе, 1918-тӥ арын. Татын ик со нырысьсэ калыкысь кылэм гондыръёс сярысь выжыкылэз, кудӥз бӧрысь пӧрмиз тодмо «Гондыръёс» поэмалы.
Аслэсьтым веранме мон нимай «Воршуд шур кузя: маин кужмо удмуртъёс» шуыса. Удмурт калыкмылэн сюрсо аръёс пыр потэм историез возьмaтэ: асьмелэн кужыммы выжыосмы бордын. Ӵош, валче, ог-огмес валаса, вашкала сямъёсмес утьыса но гaжaсa улӥмы ке, ум сётӥське пашмыны, кылмес, ас валанлыкмес лябомытыны.