Калык эктонъёслы сӥзем «Танцуй, Поволжье!» фестиваль-конкурсын вормиз шаерысьтымы эктонъя «Чебеляй» студия.
Кузебай Герд нимо йӧскалык гимназилэн бурд улаз ужась «Чебеляй» ансамбль аслаз номинацияяз лауреат луиз но конкурслэсь гран-призэ басьтӥз. Таиз ар понна та «Чебеляйлэн» 3-тӥ бадӟым вормонэз ини, талэсь азьло егитъёс Казаньын но Чебоксарыын ортчем ӵошатсконъёсын 1-тӥ интыосын бертылӥзы.
Тодады вайытомы, «Чебеляй» ансамбль 20 арлэсь кема улэ ни, шаерамы но, палэнын но адӟем карымон луэ.
23-тӥ-27-тӥ инвожое Чувашиысь Чебоксарыын нырысьсэ Нылпиослэн огъяросси фольклориадазы ортчиз. Со улсын Нылпиослэн фольклоръя росси Ассамблеязы – конкурс ужрад радъяськиз. Ижкарысь Кузебай Герд нимо йӧскалык гимназиысь калык эктонъя «Чебеляй» образцовой студия вожвылъяськонлэн вормисез луиз.
Нылпиослэн нырысетӥ огъяросси фольклориадаязы кунысь 76 улосвылъёсысь коллективъёс но нимаз быдэсъясьёс пыриськизы. Оглом 1 сюрс 100-лэсь трос 10-17 аресъемъёс люкаськизы. Соос пӧлысь Нылпиослэн фольклоръя росси Ассамблеязы пыриськыны 56 улосвылъёсысь 43 коллективъёсты но 17 нимаз быдэсъясьёсты бырйизы. Пиналъёс калык шудонъёсты, сям-йылолъёсты, шулдыръяськонъёсты возьматӥзы, калык кырӟанъёсты но крезьгурез быдэсъязы.
Удмуртиысь «Чебеляй» ансамбль тужгес бадӟымез делегация луиз – ужрадэ 22 кузя пыриськизы. Соос программаысьтызы пӧртэм эктонъёсты быдэстӥзы, пӧлаз, кылсярысь, «Ваче эктон», «Пумитан эктон», «Юмшан эктон». Пиналъёс шаермылэсь данзэ туж усто утизы. Ансамбльёс пӧлын конкурслэн лауреатъёсыз луизы.
«Чебеляй» сяна, фольклориадае Алнаш ёросысь пинал арганчи Никита Катаев (дышетӥсез Валерий Гоголев) но пыриськиз. Солы но ассэ конкурсын возьматыны шуд усиз. Пияш нимаз быдэсъясьёс пӧлын вожвылъяськиз но дипломант луиз.
«Удмуртия» агентство гожтэмъя. Туспуктэм вотэсысь басьтэмын.