«Зарни перепеч» синпелет кылдӥз Удмуртиын

    «зарни перепеч» синпелет кылдӥз удмуртиын 1

    Аспӧртэмлыко объектэз «Пельняньлэн калыккуспо нуналэз» фестиваль улсын радъяськись «Зарни — Ё перепеч, табань но пельнянь!» фестиваль дыръя усьтӥзы. Со сярысь иворъёсъя «Удмуртия» агентстволы вераз Дэбес ёросысь лулчеберетъя но туризмъя «Сибирский тракт» центрысь ӧнерчи Галина Опарина.

    «Малпан сётӥз лулчеберетъя но туризмъя „Сибирский тракт“ центрлэн кивалтӥсез Будина Эльвина Аполосовна. Малпаз, эскиззэ лэсьтӥз Дэбес политехникумысь ИЗОен дышетӥсь Белослудцева Елена Николаевна. Нош лэсьтӥзы, киужен выризы ни Чеберлыко киужъёсъя юртысь ӧнерчиос».

    Синпелет лэсьтон понна пӧртэм материалъёс кутӥзы: инъетсэ корлэсь быдэстӥзы, табазэ — кортлэсь, нош ассэ перепечез — пулэсь. Зорлэсь но лымылэсь утён понна «Зарни перепечез» кӧня ке някыртӥзы, нош ву медаз люкаськы шуыса, табаяз пась лэсьтӥзы.

    Синпелетлэн нимыз «Зарни перепеч» юнме ӧвӧл. Дэбес ёросысь Зар-Медло гуртын лушкем рецептъя зарни пырыосын перепеч пӧрало шуыса верало.

    «Перепечмы укша Шунды-мумылы, табаньмы но укша Шунды-мумылы, шундылы. Вот отысь пӧрме милям со зарни перепечмы, зарни табаньмы», — валэктэ Галина Опарина.

    Ватсалом, «Зарни — Ё перепеч, табань но пельнянь!» фестивальын туэ кылем арлэсь кык поллы тросгес перепеч пӧразы но сиизы.

    http://udmurt.media/udm/news/kultura-i-turizm/24466/