«Зарни маска» фестиваль нырысьсэ ортчиз Ижкарын
«Отчы 4 сюрслэсь трос учкисьёс вуылӥзы. Вань спектакльёс тырмем залъёсын ортчизы, учкисьёс туж шуныт пумитазы», — вера Владимир Соловьёв, Удмуртиысь лулчеберетъя министр.
Ижкарысь сценаос вылэ Россиысь валтӥсь театръёс артистъёс потӥзы: Омскысь драмая театрысь («Время секонд хенд»), Башкириысь М. Гафури нимо драмая театр («Зулейха открывает глаза»), Карелиысь крезьгуро театр («Золушка»), Новокуйбышевскысь «Грань» театр-студия («Корабль дураков»), Москваысь «Практика» театр (Пётр и Феврония муромские»). Фестивалез Москваысь «Мастерская Петра Фоменко» театрлэн «Волки и овцы» спектакленыз усьтӥськиз, нош йылпумъяз Удмуртиысь Драмая ӟуч театрлэн «Король Лир» спектаклез, 2019-тӥ арын со «Зарни маска» премилэн номинантэз луиз.
Спектакльёс возьматэм сяна, фестиваль улсын нимысьтыз дышетон программа радъязы – «Театр но кар» котырес ӝӧк но туала театрлы сӥзем лекциос.
Театрлэн араз Россиысь улосвылъёсын йӧскалык премилэн лауреатъёсыз луэм спектакльёсын тодматӥзы. Соосты Южно-Сахалинскын, Омскын, Тараын Новосибирскын, Екатеринбургын, Каменск-Уральскын, Нижний Тагилын, Саровын, Шарыповын, Хабаровскын, Комсомольск-на-Амуреын, Ульяновскын, Дмитровградын, Петрозаводскын, Костромукшаын, Новосибирскын но Санкт-Петербургын улӥсьёс адӟизы. Ижкарен одӥг дыре фестиваль Череповецын ортчиз.