Йылпумъяськиз егитъёслэн «ЭТНОэксперт» шудонзы

«Ортчизы ньыль зоная шудонъёс, — вера ужрадэз огез радъясь, «Вместе» ассоциацилэн координаторез Мария Царёва. — Отчы 40-лэсь ятыр командаос пыриськизы. Котькуд зоная шудонысь быдэн куинь вормись команда финалэ сюриз. Но, жаляса верано, туннэ асьмелэн туж кезьыт куазь, соин ик 12 команда пӧлысь 8-эз ми дорозь вуиз. Со Ува ёрос, Сарапул ёрос но Сарапул кар, Красногорск ёрос, Вавож ёрос, Глазкар, Дэри ёрос, Можга кар».

Конкурсэ пыриськисьёслы пӧртэм-пӧртэм юанъёс сётъязы. Нырысь ик командаослы текстъёсын кагазъёс люкылӥзы. Соослы кылъёс пӧлысь кар нимъёсты шедьтыны кулэ вал. Сыӵе амал филворд нимаське. Собере экранъёс вылын пӧртэм пӧрамъёсты возьматӥзы. Шудӥсьёслы тодыны кулэ вал, кызьы со нимаське но кыӵе калыклэн сиёнэз луэ.

Куинетӥ конкурс — «Своя игра». Со телевидениын сыӵе ним улсын ик мынӥсь шудон выллем радъяськиз. Тунсыко, но шудӥсьёсты шугъятӥзы «Брангурт песянайёс» коллективысь Наталья Пугачёва сярысь юанъёс. Пиналъёс уггес тодо вылэм, кин со сыӵе.

Со сяна, ёрос шудонъёсын вормемъёслы суредъёсысь мультфильмъёсты тодманы ӵектӥзы. Тазэ ужез тросэз умой быдэстӥзы.

Берпуметӥяз, йылпумъясь конкурсын тоды кулэ вал, кыӵе кылын чузъяське ӟуч кылысь берыктэм кырӟан.

Вань конкурсъёслы йылпумъянъёсъя, Сигаевоысь «Мозговой штурм» команда вормисе потӥз. Кыкетӥ луиз Глазовысь пиналъёслэн «Тамада» командазы. Куинетӥ — Красногорск ёросысь «БЭМС» команда.

Вормисьёсты «ЭТНОэксперт» гожтэмен зарни, азвесь но туй медальёсын, кузьымъёсын пусйизы. Мукетъёсызлы пыриськисьёслы «ЭТНОэксперт» шудонлэн тодметпусэныз ик термокружкаос сётӥзы.