Юкаменскын «Ашальчи лыдӟонъёс» ортчизы.
Арлы быдэ радъяськись ужрад туэ сӥземын вал нырысетӥ удмурт нылкышно кылбурчилэн, эмчилэн, фронтовиклэн Ашальчи Окилэн (Акилина Векшиналэн) 125 ар тырмонэзлы но «Удмурт нылкышно кенеш» огазеяськонлэн 30 ар тырмонэзлы.
Конференцие тодосчиос, гожъясьёс, журналистъёс, мерлыко огазеяськонъёслэн ёзчиоссы, егитъёс, Ашальчи Оки нимо йӧскалык премилэн лауреатъёсыз пыриськизы. Ужрадын вить валтӥсь докладъёс шараяськизы, соос Ашальчи Окилэн творчествоезлы, эмчи сямен ужамезлы, Юкаменск ёросын улон вакытэзлы сӥземын вал.
Озьы ик лыдӟонъёсын шараямын вал Ашальчи Окилэн улон но ужам сюресэз сярысь архивысь выль документъёс.
Ужрад йылпумъяськиз Ашальчи Оки нимо йӧскалык премилэсь лауреатъёссэ сӥё-дано пусъёнэн. Сое туэ кылбурчи но эмчи басьтӥзы.
АДИЯ (АДА) ЗАИТОВНА ДИЕВА – удмурт нылкышно кылбурчи, кылысь кылэ берыктӥсь, кырӟанъёс гожъясь, кырӟась, Россиысь писательёслэн но журналистъёслэн Союззылэн ёзчиез, Удмурт Элькунысь лулчеберетъя сиё-дано ужась, «Удмурт Кенеш» огазеяськемлэн Ижысь Ленин ёросысь ёзчиез. Вордӥськиз но будӥз Башкортостанысь Янаул ёросысь Вотская Ошья гуртын. Данъяське удмурт луэменыз, ас выжыосыныз но калыкеныз. Ада Диевалэн тросэз кылбуръёсыз сӥземын вордскем палъёссэ данъянлы, ӵыжы-выжыоссэ, эшъёссэ сӥлы каронлы, инкуазьлэсь чеберлыксэ шӧдонлы. Солэн творчесвояз бадӟым инты басьто лирической кылбуръёс, калык гуръёслы матын луись эстрада кырӟанъёс. Вань мылкыдзэ, быгатонлыксэ кылбур чуръёсаз вераны тырше. Ада Диева мыло-кыдо пыриське мерлыко уже, сюлмаське удмуртлык понна, трос тунсыко пумиськонъёс ортчытъя, пӧртэм ужрадъёс радъя.
ЛИДИЯ ВАСИЛЬЕВНА КРЕСТЬЯНИНОВА — нылпиосты эмъянъя 9-тӥ номеро поликлиникаысь эмчи, тодмо удмурт мерлыко ужась, Удмурт Элькунысь тазалыкез утён удысысь сӥё-дано ужась, «Удмурт Кенеш» огазеяськемлэн Ижкарысь Октябрь ёросысь ёзчиез. Лидия Васильевна яратэ удмурт культураез, вордскем кылзэ, тодэ ас калыкезлэсь сюлмаськонъёссэ но висёнъёссэ, котьку тунсыкъяське мерлыко ужен, эшъяське «Удмурт Кенеш» огазеяськонэн. Лидия Васильевна Крестьянинова удмурт движениез мытӥсьёс пӧлысь одӥгез луэ. Удмурт калыкез сайкатонын, удмуртлыкез ӝутон но солэсь асваланзэ будэтон удысын трос кужымзэ сётӥз, калык пӧлын валэктон уж нуиз. 90-тӥ аръёсы удмуртъёсты утчаса Москваозь но, Эстониозь но, Казахстанозь но вуылӥз. Нырысетӥ Бадӟым ӧтчамез ортчытонын но радъянын одӥгез кичӧлтӥсь луиз. Удмурт калыкез утёнын, нылпиослэсь тазалыксэс эскеронын, нылпи висёнъёсты эмъянын, дун-чылкыт сямъёсты пыӵатонын, эшъяськон кусыпъёсты юнматонын вань кужымзэ, тодон-валанзэ сётыса тыршиз но тырше Лидия Васильевна Крестьянинова.