«Ярдуртэм нюлэс» спектакльлэн премьераез ортчиз

Ужрадэ пыриськиз УдГУ-ысь егитъёслэн «Ватка» театр этностудизы. Егит артистъёс удмурт поэтэссалэн Лариса Ореховалэн кылбуръёсызъя пуктэм «Ярдуртэм нюлэс» спектакль возьматизы.
 
Лариса Орехова — аспӧртэм поэтэсса. Солэн кылбуран дуннеез нокинэн сурантэм. Солэн дуннеяз буёлъёсыз но мукетэсь. Адямиос но адямиос ӧвӧл кадь, соос кесясько куаратэк но бӧрдо синкылитэк.
 
Вера йӧскалык лыдӟиськонниысь ёзэтэн кивалтӥсь Татьяна Николаева: «Туннэ нуналлы Лариса Ореховалэн нимыз тодмо луэ быдэс дуннелы, шуыны луоз. Солэн аспӧртэмлыко кылбуран манерыз тодмо кариз сое быдэс финн-угор дуннеын. Солэн нимыз пыртэмын дуннеысь кышномурт поэзилэн антологияз».
 
«Ярдуртэм нюлэс» книгаез Лариса Ореховалэн удмурт, ӟуч, эстон но англи кылъёсын поттэмын. Бичетэз тодо Германиысь, Швециысь но Франциысь пичи лыдъем калыкъёслэсь лулчеберетсэс эскерисъёс.
 
«Кылбур книгая пуктэм спектакльын удмурт ныл пыр возьматӥське асьмелэн азьпал улонмы — мар вите, мар каре асьмемын туала мегаполис, цивилизация, — шуэ режиссёр, «Ватка» этностудилэн кивалтӥсез Василий Ушаков. — Тани ми кӧня районъёсы ветлӥм, мон кышкай вал, гуртын улӥсь калык уз вала, уз шӧды сое. Но паймымон — калык учке валаса, вал синвуаськисьёс но».