«Яратоно удмурт кыл» лагерьлэн тол сменаез ужалоз

Евгения Лекомцева ивортэмъя, тросэз мылкыд карисьёс гужем лагере лыктыны ӧз быгатэ, соин ик ужрадэз толалтэ но ортчытыны малпазы.

«Ми котьку вераськом вал, (лагерь — ред.) арлы одӥг пол шуыса. Но адямиос лыкто бере, тани кыкетӥ аре тросэз ӧз быгатэ, малы ке шуоно отпускъёссы со дырлы ӧз тупалэ, малпамы толалтэ но ортчытыны», — валэктӥз Евгения Лекомцева.

«Яратоно удмурт кыл» лагере люкаськемъёсты дышетоз, азьвылаз кык сменаосын сямен ик, кылосбур тодосъя кандидат, кылчи но полиглот Артём Федоринчик. Толшор кутсконын со Удмуртие Киевысь вуоз.

«Солэн аслаз аналитика амалэз вань, кудӥз котькинлы дышетскыны сётэ: бадӟымъёслы но, 10 аресысен нылпиослы но. Отын ик грамматика, отын ик предложениос кылдытон. Воксё мукет амал, асьме удмурт дышетӥсьёсын ӵошатыса. Вераськон ӧвӧл, аналитика амал», — пусйиз лагерез радъясь но мукет дышетӥсьёс но луыны быгатозы шуыса ватсаз.

Евгения Лекомцева вермъя, гужемен ӵошатыса, толалтэ кырын концертъёс ортчытъяны уз луы. Озьы ке но, «Живицаын» ваньзэ гурт шӧмын радъяны луонлык вань.

Та дырлы тодмо ӧвӧл на, кӧня группа «Яратоно удмурт кыл» лыгерьлэн тол сменаяз ужалоз. «Живица» этнокомплекс 30 пала пыриськисьёсты тэрытыны быгатэ. Сомында адями люкаськиз ке, 3 группа ужалоз. Мылкыд карись пиналъёслы нимысьтыз группа кылдытозы, нош анай кылын умой вераськисьёс удмурт дуннелы пайдалыко видео- но аудиороликъёс гожъялозы.

Ватсалом, лагере мыныны мылкыд карисьёс куриськонзэс 20-тӥ толсурозь кельтыны быгато. Смена сярысь берпуметӥ иворъёс ужрадлэн ВКонтакте вотэсбамаз пото.

Тодэ вайытом, туэ гужем «Яратоно Удмурт Кыл» лагерь Кияса ёросысь «Сальядор» агроусадьбаын 23–30 пӧсьтолэзе ортчиз. Арня ӵоже лагерь пыр 120 пала адями потӥз. Со пӧлысь 40 мурт кылэз дышетыны лыктэмъёс, со сяна, дышетӥсьёс, крезьгур, фольклор коллективъёс, гуртын улӥсьёс.

Источник ИА «Удмуртия»