«Яратоно Удмурт Кыл» лагерь вуоно арлы инты утча
«Инты утчаськом на, кин ке милемыз пумитаны мылкыд кароз, оло. Нырысетӥ лагерьын 20 дышетскисьёс вал, таяз кык поллы тросгес — 40 адями, куинетӥез лагерь эшшо бадӟымгес луоз — кошкылытэк 60–70 пала адями улоз, соин ик бадӟымгес инты кулэ вал. Со сяна, элькунысь мукет ёросэз возьматэммы потэ, малы ке шуоно тросэз милям кык пол ветлӥзы ни, куинетӥзэ но лыктозы на», — вераз Евгения Лекомцева.
Нош туэ «Яратоно Удмурт Кыл» лагерь Кияса ёросысь Салья гуртысь «Сальядор» агроусадьбаын 23–30 пӧсьтолэзе ортчиз. Евгения Лекомцевалэн верамезъя, лагерь пыр арня ӵоже 120 пала адями потӥз. Со пӧлысь 40 мурт кылэз дышетыны лыктэмъёс, со сяна, дышетӥсьёс, крезьгур, фольклор коллективъёс, гуртын улӥсьёс.
Удмурт кылэз дышетыны яке тодон-валанъёссэс будэтыны мылкыд карем адямиос туж пӧртэмесь вал, озьы ик пӧртэм интыосысь.
«Туж пӧртэм адямиос. Милям вал кылчиос но, кылосбурчиос но, студентъёс но, нунокъёсынызы песянайёс но вал, дышетӥсьёс но вал. Вуизы Москваысь, Питерысь, Свердловск улосвылысь, Татарстанысь, Комиысь, Марий Элысь, Удмуртиысь Вавож, Сьӧлта ёросъёсысь, Ижкарысь, Сарапулысь», — вераз Евгения Лекомцева.
Озьы ик кунгож сьӧрысь куноос вуылӥзы — Финляндиысь. США-ысь, Венгриысь, Украинаысь. Тодэ вайытом, финнъёс, мадьяръёс но американец Удмурт кун университетэ Удмурт кылъя гужем школае лыктэмын вал, кык нуналлы Салья гуртэ но вуылӥзы. Йылпумъян концертын соос люкам тодонлыкъёсынызы гуртоосты паймытыны быгатӥзы.
Удмурт кылэз дышетонъя урокъёсты нуизы Оксана Крылова, Наталья Дмитриева, Дарали Лели но Артём Федоринчик. Нимысьтыз ӧтем ӧнерчиос киужъёсъя, эктонъя, удмурт сиён-юонъёсъя, радиоын ужанъя мастер-классъёс ортчытӥзы, пиналъёс открыткаос суредазы. Со сяна, удмурт дуннеен герӟаськем трос лекциос ортчизы. Ваньмыз сямен соос удмурт кылын мынӥзы.
«Трос лекторъёс вал. Ачиз Михаил Гаврилович Атаманов вуылӥз, солэн творчествоезлы сӥзем пумиськон вал, со ваньзылы удмурт кылын Библиез кузьмаз. Москваысь Артём Малых но Ольга Урасинова ветлӥзы, али Финляндиын улӥсь Светлана Едыгарова», — вераз лагерьлэн радъясез.
Оглом, ваньмыз ужрадъёс удмурт кыл но удмурт лулчеберет котырын бергазы.