Яр ёросын Флор Васильевлэсь нимзэ уг вунэто
Фестивале трос калык люкаськиз, пӧлазы — Удмуртиысь писательёс, художникъёс, композиторъёс. Ӟеч кылъёсын куноосты пумитаз Яр ёрослэн йырыз Тамара Уткина.
Ужрад кутскиз Ф. Васильевлэн кинюртэменыз книгаосты, поэтлэсь туспуктэмъёссэ, куд-ог арбериоссэ адӟытонысен. Адӟытонэ вуэмъёс Ф. Васильевлэсь кылбуръёссэ лыдӟизы.
Кылбурчилэн пиез Сергей Васильев возьматӥз архивъёсысь люкам материалъёсты. Соос Флор Васильевлэн егит дырыныз — Глазовысь педучилищеын но пединститутын дышетскем вакытэныз — тодмато.
Фестивальлэн гала-концертаз ӟечкылазы кибашлыослэн, шара лыдӟисьёслэн, суредаськисьёслэн, композиторъёслэн но кырӟасьёслэн конкурсъёсазы вормисьёсты.
2014-тӥ арысен Ярын «Тюрагай» литературая премия сётӥське. Быдэ вуэмъёс пӧлын премиен пусйизы Ӟанкагуртысь Екатерина Болтачеваез.
Премиосын озьы ик пусйизы конкурсэ пыриськем кибашлыосты. Ярысь 2-тӥ школаын дышетскись Дарья Петухова трос аръёс ӵоже киужен выре, пӧртэм кружокъёсы пыриське. Ярысь Марина Данилова 25 ар киужен выре ини: туала шӧмо удмурт дэремъёс вуре, мунёос лэсья, ёросын куиськон но пужыятскон удысъёсты азинтэ.
Суредаськисьёслэн вожвылъяськоназы вормиз Эгралась искусствоосъя нылпи школаын дышетскись Алёна Корепанова.
Шара лыдӟисьёслэн конкурсазы вормизы Ярысь Антон Дюкин, Балезино ёросысь Ольга Першина, Глазов ёросысь Марина Суворова. Озьы ик нимысьтыз кузьымен пусъемын Глазов ёросысь Октябрьской черкогуртысь культурая юртысь драмкружоке ветлӥсь Екатерина Мышкина но Руслан Князев.
Крезьгуръя конкурсын премия сётэмын Укан гуртысь «Зареница» ансамбльлы.
Крезьгурчиослэн но кыр-ӟасьёслэн конкурсазы вормисьёсты жюри ӧз бырйы, вань пыриськисьёсты дипломъёсын но кузьымъёсын пусйизы.