Йӧскалык политика ӧрын  грантъёсъя конкурсъёсы пыриськон азьын семинар радъяськиз

Экспертъёс луыса вераськизы ДДН-ысь проектъёсты нуонъя ёзэтлэн кивалтӥсез Лариса Князева но Удмуртиын «Православная Инициатива» калыккуспо грантъёсъя конкурслэн координаторез Татьяна Шестакова.

Лариса Князева  президент фондын йӧскалык кусыпъёслы сӥзем ӵектосъёслы дурбасьтэмзы сярысь вераз, нош Татьяна Шестакова “Православная инициатива” конкурсэ пыриськон понна куриськон гожтонлэн аспӧртэмлыкез сярысь ивортӥз.

Семинаре вуылӥзы элькунысь ёросъёсысь лулчеберетъя но дышетонъя учреждениосын ужасьёс. Ваньзы соос йӧскалык кусыпъёсты юнматонлы, осконэн герӟаськем кусыпъёслы, выжы калык лелчеберетэз утёнлы сӥзем проектъёслэн авторъёссы луо.

Докладъёс бере “20 минут на разбор заявки” амалъя консультирование ортчытӥзы. Озьы, экспертъёслэн малпамзыя, тужгес устоез ӵектос луиз Дэбес ёросысь Зар-Медло школаын пиналъёслы но соослэн анай-атайёссылы клуб кылдытонъя ӵектос. Со анай кылэз утёнлы сӥземын. Со сяна, чакламын кылдытыны фолк-группа, кытчы пырозы школаын дышетскисьёс.