Йӧскалык лыдӟиськонниын «Берыктон луд» неоконференци ортчоз

«Берыктон лудлэн»  пумиськонэз сӥземын кылысь кылэ берыктӥсьлэн нуналэзлы.

Нош «Берыктон луд» сярысь ке, 2010- тӥ арысен ини берыктон уж бордын тыршисьёс  неоконференци амалэн люкаськыло. Отын верасько удмурт кылысь берыктонэн герӟаськем  шуг-секытъёс сярысь, эскерисько бырыктэм ужъёс. Нош неоконференци амал отчы пыриськисьёслы луонлык сётэ асьсэ мылкыдзыя радъяны солэсь ужзэ.

«Берыктон лудлэн»  таяз  люкаськемаз удмурт гожъясен Лидия Нянькинаен пумиськыны чакламын. Солэн тодмо ужъёсыз пӧлын – Ашальчи Окилэсь берыктэм прозаез, со печатламын «Та буртчин чуръёсыд» бичетын 2011-тӥ арын. Туэ Лидия Нянькиналэн мукет берыктэм ужез потӥз, со Галина Романовалэн нылпиослы веросъёсын но выжыкылъёсын «Чёрное озеро и живая трава» книгаез. Пумиськонын Лидия Степановна удмурт но ӟуч кылъёсы берыктонлэн аспӧртэмлыкъёсыз сярысь вералоз.

Нош йӧскалык библиотека берыктонэн герӟаськем аслаз ӵектосъёсыныз тодматоз. Соос пӧлын – 2009-тӥ арын поттэм «Художественные переводы на удмуртский язык» библиографияя указатель, озьы ик улосвылкуспо «Перевод в поле многоязычия» вожвылъяськонэз радъян. Со ужрад кӧня ар ӵоже ини ортче. Со выллем конкурсъёс быдэс кунын ӧвӧл.