Йӧскалык лулчеберетъя огазеяськонъёс грантъёс утӥзы

Конкурсын йӧскалык но вӧсьлык кусыпъёсты юнматонъя проектъёс пусъемын.

Озьы, Удмуртиысь еврей общиналэн «Герои народа – герои страны» проектэз школьникъёслы чакламын. Соосты Быдӟым атыкай ожын вормонэз пӧртэм выжыысь калыкъёслэн верамзы пыр син шоры пуктыны но эссеын яке эскерон ужъёсын возьматыны ӵектозы. Со сяна ӵектос улсын Кузебай Герд нимо гимназиысь пиналъёс «Треугольники судьбы» адӟытонын экскурсовод луыса тыршозы. Озьы ик чакламын на «Письма с фронта» интернет-каталог кылдытыны.

Воткинскысь егитъёслэн «Поколение Некст» движенизы грант басьтӥз удмуртъёслэсь киужъёссэс утёнлы сӥзем «Зарни Шыкыс» проектсы понна. Со сӥземын вашкала но туала куиськон амалъёсты огазеяса калыкез дышетонлы. Дышетон площадка кибашлыослэн элькун центразы луоз. Отын ар талэсь азьло куиськон удыслы дышетыны кутскизы.

Грант уксёен юрттэт вуиз улосвылкуспо  «Наследие бесермян: от прошлого к настоящему» фольклоръя фестивальлы но. Ужрад ӧжыт лыдъем калык выжыен тодматэ. Нош валтӥсь ужпум – егитъёслэсь огазеяськонзэс кылдытонэн бесерманъёслэсь лулчеберетсэс утён луэ. Озьы ик бесерманъёслэсь аспӧртэмлыксэс турмаршрут пыр возьматыны чаклало.

“Колёса питран” театрлы грант бесерман калыклы ас выжыезлы тунсыкъяськонзэ будэтыны юрттоз. Со понна кылэз дышетонъя кружок усьтыны, «Читаем стихи М.Федотова-первого бесермянского поэта на языке оригинала» видео-марафон лэзьыны но тетр возьматонъёс пуктыны чаклало.