Йӧскалык лулчеберетъя огазеяськонъёслы ватсаса интыос висъяны луонлык Удмуртиын вань
Удмуртиысь армянъёслэн «Урарту» огазеяськонзылэн кивалтӥсез Мнацакан Аракелян пусйиз, соослэн тросэз ужрадъёссы Ижкарысь Калыкъёслэн эшъяськон юртазы ортчо шуыса. Элькунын 130 йӧслыкъёс уло бере, ӵемысь ваньмызлы юртын инты уг тырмы.
«Классъёс зэмзэ но уг тырмо. Куд-ог дыръя ми ужаськом татын но (конференц-залын — ред), кабинетъёсын но, ог-огмылы люкетонтэм понна. Эктонъя зал, кудӥз милям вань, отын дыр ӧжыт сётӥське. Ми ӝоггес выриськом, ӝоггес потӥськом, мукет диаспоралы (залэз бушатыны — ред.)» — шуиз Мнацакан Аракелян, Удмуртиысь армянъёслэн «Урарту» огазеяськонзылэн кивалтӥсез.
Александр Бречаловлэн кылъёсызъя, уже кутӥськытэк улӥсь юртъёсты нырысь-вылысь эскеронъя, мер огазеяськонъёслы ватсаса интыос вань. Куартолэзе рос-прос эскерозы, кызьы соос кутӥськозы.
«Ми дасесь, куд-ог юртъёс коньдонэн медъямын луозы шуыса <…>, нош куд-огъёссэ юртъёсты ми, шуом, кивалтӥсь аппаратын оптимизаци бере, условной рубль понна арендае сётом. <…> Мон малпасько, матысь 3–4 толэзь ӵоже та ужпумез быдэстом», — вераз Александр Бречалов.
Йӧскалык огазеяськонъёслэн ужрадъёсынызы тодматскыса, Александр Бречалов шахматэн шудонъя йӧслыккуспо турнирлы саклык висъяз. Со верамъя, кылем арын инвожое Азбарлэсь, Ёрослэсь, Ижкарлэсь но Россилэсь нуналзэ пусъён улсын элькунлэн шоркараз улӥсьёс куремъя шахматэн шудонъя вожвылъяськонъёс ортчизы. Нош йӧскалыкуспо турнир сярысь тӧролэн кылэмез ӧй вал.
«Мае тӥ радъяськоды, сое мыным потэ ӵектэме огъя дырпусэ пыртыны но (Россиысь шахматъя — ред.) федерацилэн тӧроезлы возьматыны, малы ке шуоно мон ӧй кылылы, йӧскалык кусыпъёс улсын таӵе ужрадъёс ортчытӥсько шуыса», — пусйиз Александр Бречалов,
Тодэ вайытом, Удмуртилэн тӧроез йӧскалык лулчеберетъя огазеяськонъёсын пумиськылыкуз Каракулино ёросысь Кулюшево черкогуртысь школае пор кылъя дышетӥсьлэсь ставказэ ватсан сярысь вераз. Пор пиналъёслы анай кылзэс дышетон луонлык вуоно дышетскон арысен кылдыны кулэ.