Выль Татышлы гуртын «Дуно марӟанъёс» фестиваль ортчиз
Ужрадэ удмурт гуртъёслэсь йылолъёссэс, кырӟан-веранъёссэс утись 15 фольклор коллективъёс пыриськизы. Башкортостанысь сяна, отчы Татарстан, Марий Эл элькунъёсысь но Киров, Свердловск улосъёсысь куноос вуизы.
Ансамбльёс «Гуждор шудонъёс», «Ӝок кышет вӧлдон», «Выждэра миськон» но мукет сямъёсын учкисьёсты тодматӥзы.
Фестивальлэсь Гран-призэ басьтӥз Башкортостанысь Татышлы ёросысь Выль Татышлы гуртысь «Шулдыр ӝыт» ансамбль.
Нырысетӥ интыез утӥз Киров улосысь Вятские Поляны карысь «Чипчирган» калык ансамбль. Кыкетӥ луизы Башкортостанысь Татышлы ёросысь Кызыл-яр гуртысь «Марӟан» калык ансамбль но Янаул ёросысь Вуж Варяш гуртысь «Югдон» фольклор ансамбль. Куинетӥ интыез но жюри одӥгезлы гинэ сётыны ӧз быгаты. Башкортостанысь Татышлы ёросысь Вязовка гуртысь «Уӵы ныл», Татарстанысь Кукмор ёросысь «Сактон» но Марий Элысь Карлыган гуртысь «Ӟардон» калык ансамбльёс куинетӥ интыез люкизы.
Вормисьёс но ужрадэ пыриськем коллективъёс ваньзы дипломъёсын но синпель кузьымъёсын пусъемын вал.