Вылӥ дышетсконниосысь студентъёс олимпиадалы дасясько

Таӵе олимпиада нырысьсэ ортчоз. Радъя сое Казаньысь федерал университет. Олимпиадалэн нырысетӥ тураз пыриськозы Удмурт кун университетысь но Глазкарысь кун пединститутысь удмурт кылэз дышетӥсь студентъёс.

Вера Удмурт филология, финно-угроведениея но журналистикая Институтысь огъя но финн-угор кылтодонъя кафедралэн кивалтӥсез Мира Самарова: «Улосвыл тур сӥземын луоз удмурт кыллы. Студентъёс возьматозы асьсэлэсь кылысь кылэ берыктыны быгатэмзэс, удмурт кыллэсь историзэ тодэмзэс. Со сяна соос гожтыны кулэ луозы сётэм темая эссе. Озьы эскериськоз олимпиадае пыриськисьёслэн гожъяськыны быгатэмзы».

Олимпиадалэн йылпумъян турез ортчоз 1-2 шуркынмонэ Москваын. Отчы пыриськозы улосвыл турын 2 вормисьёсыз. Соос возьматыны кулэ луозы ини ӟуч кылэз тодэмзэс. Со сяна асьсэ калыксы сярысь презентация лэсьтозы, озьы ик ӟуч кылын но удмурт кылын кылбуръёс лыдӟозы.