Визьзэс сыназы Ижысь удмурт кылэз дышетӥсь пиналъёс

    Визьзэс сыназы ижысь удмурт кылэз дышетӥсь пиналъёс 1

    Арлы быдэ визь сынанлэн темаез воштӥське. Миым юанъёс «Удмурт Кенеш» огазеяськонлы 20 ар тырмонлы сӥземын вал, туэ — югдытӥсьмылэн К. Гердлэн вордскемез дырысен 120 ар тырмонлы. Тема азьвыл ик тодмо луэ бере, нылпиос дасяськыса вуо. Озьы ке но арлы быдэ йырвизьзэс рос-прос бергатоно луэ, тросэзлы юанъёслы валэктон уг шедьто. Тани туэ но уноез вераны ӧз тодэ, удмуртсэ сяна, кыӵе кылэз тодэ вал К. Герд. Та юанъя кроссвордэ пыртэмын вал. 4 буква. Озьы ке но «коми» шуыса, тросэзлэн тодазы ӧз лыкты. Вань заданиос пӧлысь кроссвордэз ик тужгес шуген лыдъязы. Кроссвордтэк но шугъяськонъёссы кылдӥзы. К. Гердлэн кӧня нылпиез вал шуыса валэктонлы уноез «вить» шуизы, нош солэн 7 пиналъёсыз вал. Со понна кыӵе зол шумпотӥзы нылпиос ӟучысь удмуртэ но удмуртысь ӟуче кылъёсты берыктонъя ужлы. Котькуд командаын угось удмурт кылэз умой тодӥсь луэ. Соин ик та заданиез быдэстыкузы, тужгес трос балл люканы быгатӥзы.

    — Удмурт кылэз тодӥсьёсты ми, дышетӥсьёс, пичиысен кыдатӥмы-будэтӥмы. Туэ мартэ соос понна олимпиада 9-тӥзэ ортчоз. Та дыр ӵоже нылпиос, дышетӥсьёсынызы ӵош ялан дасяськыса, удмурт кылэз нимысьтыз дышетыса, будӥзы. — Вера визь сынанъя шудонэз малпась но радъясь, городысь удмурт кылъя дышетӥсьёсты огазеясь Елена Ямщикова.

    Визь сынанэ пыриськись школаослэн лыдзы туэ йылӥз. Ог-огзылэсь кылыса-адӟыса, асьсэды возьматэмзы, кужымзэс мертамзы потӥз. Удмурт егит дышетӥсьёс но городын уногес луизы, таослэн котькытчы пыриськыны мылкыдзы задор. Туэ визьсынанэ озьы 3 выль команда пыриськиз: 50-тӥ, 69-тӥ, 100-тӥ школаосысь. Удалтӥз 69-тӥ школалы — со 3-тӥ интыез утӥз. 2-тӥ луиз 11 номеро школа. 1-тӥ интые потӥзы К. Герд нимо гимназиысь пиналъёс. Визь сынанэ вань пыриськем командаосты пиццаен куноятӥзы. Вормисьёслы шуд усиз на Удмурт театре спектакль учкыны вуылыны. Соослэн мылкыдзы анай кылзэ дышетыны уката но лӧптӥз.