Веник керттом… Герберын

– Евдокия Михайловна – вань сюлмыныз удмурт лулчеберет но калык понна «висись» адями, – вера Сюмсиысь лулчеберетъя юртын режиссер луыса ужась Зинаида Лебедева. – Арлыдыз вань ни ке но, со али но тырше ужаны мерлыко огазеяськонъёсын, ёросысь «Удмурт Кенешлэн» азьветлӥсез луэ. Пичи шаерезлы, Тукангуртэзлы, трос ӟеч уж лэсьтэмез понна сое пусйизы «Сюмси ёрослэн Дано муртэзь» нимын. Оскисько, ваньзы, кин «Гербер» дыръя вуылоз та площадкае, Евдокия Михайловналэн сабырлыкезлы луыса, одно ик ӟеч мылкыдын кошкозы.

Евдокия Михайловна аслаз юрттисьёсыныз, «Ивушка» калык коллективысь кырзасьёсын, возьматозы веник керттонъя мастер-класс, вералозы вениклэн йӧнатыны быгатӥсь аспӧртэмлыксы сярысь. Кызьпу, тыпы но беризь веник сяна, кышномуртъёс Гербере лыктэмъёсын ӵош бичалозы эмъюм турынъёслэсь керттэтъёс но – пыштурынлэсь, ӵужсяськаослэсь но мукет. Та «Гербер саламъёслэсь» азьланяз, куасьтыса, эмъясь чай парыны луоз.