Вавожын усьтӥськиз Ашальчи Окилы но Кузебай Гердлы сӥзем адӟытон
Вавожысь лулчеберетъя ёрос юртын усьтӥзы элькун архивен дасям «Кузебай Герд и Ашальчи Оки: к 125-летию со дня рождения» адӟытонэз.
– Адӟытонэз усьтыса вераськиз Улосвыл кивалтэт бордын ужась архив ужъёсъя комитетлэн тӧроез Наталья Тойкина, – ивортӥз Вавож ёросысь «Удмурт Кенеш» огазеяськонлэн кивалтӥсез Ирина Ложкина. – Со нимысьтыз пусйиз, элькун архивъёсын та удмурт поэтъёслэн улон-вылонэнызы герӟаськем трос гинэ документъёс утисько шуыса. Элькунлэн историяяз Кузебай Гердлэн бадӟым инты басьтэмез сярысь вераськиз Вавож ёросэн тӧроез Олег Овчинников.
Архивын ужасьёслэсь экскурсиязэс аслаз тодэмъёсыныз йылэтӥз Гердлэн музей-юртаз ужась Лидия Сидорова. Ужрадлэсь пуштроссэ озьы ик узырмытӥз пичильтык дасям концерт. Вавожысь шаертодонъя музейысь «Туривесь» но Ӟозлудысь «Бӧляк» ансамбльёс ӵошен крезен шудӥзы-кырӟазы, Выль Биялась Нина Ефремова аслэсьтыз кылбуръёссэ лыдӟиз, Итчи Докъя школаысь дышетскись нылъёс Гердлэн кылъёсызъя гожтэм «Чагыр кышет» кырӟанэз быдэстӥзы».
Вавожын адӟытон ужалоз 12-тӥ оштолэзёзь. Собере сое Юкаменске нуозы. Тодады вайытом, 14-тӥ оштолэзе отын Ашальчи лыдӟонъёс ортчозы.