Вавожын удмурт кылын служба ортчиз

Службаез нуиз приходысь настоятель Павел Григорьев. Солы юрттиз Вавожысь священник Александр Бердников. Чирдонъёсты быдэстӥз Иулия Филипова кивалтэм улсын Ижкарысь хор.

Пётр но Павел апостолъёслэн приходзы Ижкар епархиын одӥг, кытын службаос удмурт кылын ортчо. Отысь баӵкоос мукет черкъёсы ветлыса службаос нуыло. Озьы удмуртъёслэн анай кылынызы Инмарлы вазиськыны луонлыксы кылдэ.

Туэ Пётр но Павел апостолъёслэн приходазы нырысьсэ Андрей Критскийлэсь канонзэ анай кылын лыдӟизы. Сое берыктӥз  филологи тодосъя доктор, удмурт кун университетысь профессор, протодиакон Михаил Атаманов.