Вавож шор ёзо школаысь удмурт класс мукетъёсызлэсь вазьгес тырме пиналъёсын
![Вавож шор ёзо школаысь удмурт класс мукетъёсызлэсь вазьгес тырме пиналъёсын 1](https://udmddn.ru/wp-content/uploads/2017/02/exact_600x280_jko.jpg)
Ваньзы соос чылкак ӟуч яке ӟучомем семьяосысь. Дышетӥсь Татьяна Буркова вань мылкыдзэ сётэ пиналъёс удмурт кылын вераськыны ӧз ке но кутске, мед валолозы шуыса.
«Пайдазэ адӟисько, — шуэ Татьяна Буркова. — Пиналъёслы но анай-атайёслы туж тунсыко потэ. Мыным аслым золгес кельше, соин ик быгатӥсько пиналъёсыз бордам кыскыны».
Вавож шор-езо школаын удмурт кылэз предмет чотын 5-тӥ арзэ нуо. Арлы быдэ та классэ пиналъёс нырысь ик люкасько. 20 адями — со шӧдскымон азинскон школа понна. Трос аръёс ӵоже анай-атайёс пӧлын уж нуэмын. Со уж уг дугды али но. Дышетонъя ёзэтысь ӧнерчиос, дышетисьёс нылпи садъёсы, школаосы ветло, удмурт кыллэн кулэлыкез сярысь анай-атайёслы валэкто, ужрадъёс ортчыто.
«Пиналъёслэн анай кылзэс дышетэмзы огшоры уз ортчы, — вера Вавож ёросысь дышетонъя управленилэн кивалтӥсезлэн воштӥсез Римма Борисова. — Со куке но соослы кулэ луоз. Сое шӧдозы, куке бадӟым будозы. Туш шумпоттэ та югдур, но сюлмаськытэ анай-атайёслэн мылкыдзы, угось тросэз потэ ӵапак анай-атай бордысь».
Азьланьтозы-а Вавож школаысь пиналъёс удмурт кылэн тунсыкъяськонзэс шор классъёсы выжыса — со бордын сюлмаськон. Анай-атайёс кулэен лыдъязы ке, со уз могӟы. Азьпалан удмурт кылэз факультатив яке урок чотын ик нуон сярысь али уж мынэ. Нош огъя, туннэ ёросысь 17 школаос пӧлысь 10-аз удмурт кылэз предмет чотын дышето, 2-аз — факультатив амалэн.