Ваньмыз пӧрмиз йӧскадь. Балезино ёросын удмурт кыллы сӥзем «Yesкадь!» нимо ужрад ортчиз

Пумиськонлэн валтӥсь ужпумез туала будӥсь егитъёс пӧлын удмурт кылэз гажан но сое утён мылкыд пыӵатон. Соин ик Ижысь куноос но ӧтемын вал. Соос мастер-классъёс сётӥзы: радиоуж, актёр луон, кырӟанъёслы гуръёс гожъян, эктон но газет лэсьтон.
Ӧръёс пӧртэмесь. Пиналъёс ӝуась синъёсын учкизы лыктэм куноослэн быгатонлыкъёссы шоры.
Алексей Пикулев кырӟан гожъян ӧрезъя мастер-класс сётӥз.

Нош «Ӟечбур» газетысь журналистъёс пиналъёслы «Yesкадь!» ужрад улсын газет лэсьтыны дышетӥзы.

Шулдыр вал эктӥсьёслэн висъетазы. Дышетӥсьсы — Светлана Зайцева -«Чебеляй» студие ветлӥсь усточи — удмурт эктонлэсь яркыт тодметъёссэ нылпиослы усьтӥз.

Актёр устолыкъя тодон-валанъёс сётӥз Йӧскалык театрысь артист Максим Князев.

Озьы ик пиналъёс тодматскизы радиоужен, ивор гожтыны дышетскизы, шонер лыдӟиськыны. Дышетӥсь чотын — «Мынам Удмуртие» телерадиокомпаниысь тодмо журналист Елена Плотникова.

Исак школа огазеяз Юнда, Пӧбья, Люк, Эркеш, Узякар, Быдыпи, К. Заделье школаосысь дышетскисьёсты.
Озьы ик мем кылдытонъя конкурсэ пиналъёс пыриськизы. Вормисьёсты бырйизы Ижысь лыктэм ӧнерчиос. «Yesкадь!» ужрад йӧскадь пӧрмиз. Табере радъясьёс азязы вуоно арлы ужпумъёс пукто ни. Балезино ёросын удмурт кыл кужмояны кулэ — лыдъяло Исакысь дышетӥсьёс.

ивортон дасямын myudm.ru/udm сайтъя
туспуктэм — vk.com/tvbalezino