«Вань марлы ог-огмылэсь дышетскыны»

Котырес ӝӧксьӧрын Удмуртиысь йӧскалык политикая министерстволэн но дышетонъя министерстволэн ыстэм муртъёссы веразы, кыӵе югдур элькунын кылъёсты дышетон ласянь — 216 школаын удмурт кылэз дышето, 14 — бигер но 5 — пор кылъёсты. Нылпи садъёсын со лыдпусъёс — 229, 20 но 4. — ивортэ «Удмуртия» агентство.

«Ми татчы лыктӥмы Удмуртиысь парламентэн кутэм катъёсты быдэсъян ужен тодматскон понна. Тӥляд туж трос тунсыкоез, ми вуылӥмы Калыкъёслэн эшъяськон юртазы. Синмаськимы солэн чеберезлы, умой радъямезлы, ужамезлы. Тӥляд вань тунсыкоез, мар милям кытын кеӧвӧл, номилям новань тунсыкоез. Милем вань марлы ог-огмылэсь дышетскыны», — вераз Татарстанысь Кун Кенешлэн дышетонъя, лулчеберетъя, тодосъя но йӧскалык ужпумъёсъя комитетлэн кивалтӥсез.

Удмуртиысь печатья но калыке ивортодэт вӧлмытонъя агентстволэн кивалтӥсез Алексей Воронцов элькунын иворъёсты вӧлмытӥсь йӧскалык ёзэсъёсъя югдурен тодматӥз.

«Ужъюлтошъёсты гинэ ӧвӧл, ми союзникъёсты шедьтӥмы, азьланяз соосын ӵош ужаломы. Ми валаськомы, Россия — одӥг кун, валтӥсез отын — лулчеберетъёслэн, калыкъёслэн но кылъёслэн пӧртэмлыксы. Кыӵе ке кылэз ыштыса, ми Россиез ыштыны быгатомы», — вераз Удмуртиысь Кун кенешлэн йӧскалык политикая, мерлык кышкыттэмлыкъя, регламентъя но ужез радъянъя ялан ужась ӧрилэн кивалтӥсез Энвиль Касимов.