Уж выль кужым сётэ

Анатолий Попов нокыӵе ужлэсь уг кышка. Нырысь-валысь «Луч» колхозлэн шутэтскон базаяз утялскись луыса ужаны кутскиз, табере сое отчы кивалтӥсе юнматӥзы.

Шутэтскон сэрегазы солэн кичӧлтэмезъя алигес кылдӥз крезьлы синпелет. Сое ас киыныз Анатолий Попов ик лэсьтӥз.

— Марлы гинэ туала вакытэ синпелетъёс пуктэмын ӧвӧл — апельсинлы, пыдкуклы, пельняньлы. Нош крезьлы нокытын ӧвӧл. Со удмурт калыклэн вашкала инструментэз ук, — шуэ Анатолий Аркадьевич, — песянай-песятайёсмы крезь шудэм улсын вань сюлэм ӝожзэс кисьтылӥзы. Вавож палъёсын солы синпелет пуктыны тужгес тупась инты. Ми палан вордӥськемын тодмо удмурт гожъяськись К. Герд. Со кылбуръёсаз крезез данъялляз. Собере асьме гуртысь ик нылпиос вашкала инструментэз улӟыто, Вавожысь искусствоосъя школае дышетскыны ветло.

Нош пуэн вырыны Анатолий Аркадьевич 1990-тӥ секыт аръёсы кутскиз, быгатэмез ик семьязэ сюдыны юрттылӥз. Кибашлы укно янакъёс чибориё вандылыны ӧдъяз, Партчиын, Вавожын сяна, Татарстанын но вань солэн ужъёсыныз уно коркаос.

— Пу монэ ачиз бордаз кыске, — вераз Анатолий Аркадьевич. — Огвакытэ палэнэ улыны кошкылӥ вал, но отын асьме дорын кадь кызъёссы, пужымъёссы ӧвӧл. Соин ик отын кема улыны ӧй чида, туж мӧзми асьме тэльёсмылэн зынзылэсь.