Ува ёросын удмурт йӧскалык йылолъёсъя клуб кылдытӥзы

Нырысетӥ пумиськонэы 8 гуртъёсысь удмурт азьветлӥсьёс ветлӥзы. Отын Вожодыр вакытысь сям-йылолъёсты тодэ ваизы — ивортэ "Удмуртия" информагенство.

«Котькуд гуртысь делегация вал, Валентина Яковлева. — Соос мынам юрттӥсьёсы луозы ни, ваизы 3,4, 5 адями. Тӥни озьы ик пукыны малпаськомы — котькуд удмурт гуртысь удмурт адямиос, кинлэн удмурт сямен вераськемез потэ, удмурт дӥськут нуллэмез потэ, удмурт умой адямиосын пумиськемез потэ. Сыӵе ужпумез милям со клубмылэн»

Валентина Яковлева оскемзэ вераз, вуонояз пумиськонъёсазы ёросысьтызы мукет удмурт гуртъёсын улӥсьёс но пыриськозы шуыса. Тулыспалэ удмурт дӥськут сярысь вераськыны малпало: кытчы, кыӵе пужы пуктоно удмурт дӥськут вылын, кыӵе дэрем дӥсяно бызьымтэ нылмуртлы, кыӵезэ нуллыны яра бызем кышномуртлы. Со сярысь ивортодэт сётыны ӧтизы Узей-Тукляысь Кибашлыослэн юртысьтызы ӧнерчиез Надежда Сидороваез.

Куинетӥ пумиськонзы улсын «Сяськаяськытом шаермес» семинар радъяны малпало. Ижысь гурт возёсъя кун академиысь удмурт кылын вераськись ӧнерчиез ӧтемзы потэ. Будосъёсты будэтон ласянь визь-кенеш сётэм сяна, со турын-куаръёслэсь, будосъёслэсь удмурт нимъёссэс но тодэ вайытыны юрттоз.

«Собере планамы вань на ай ярмарка карыны. Ваньмыз киужъёсын ужало кадь. Фермеръёсты но ӝутканы турттӥсько. Кин мар будэтэ, кин мар куиське, лэсьтэ, вуриське. Кыӵе ке но ярмарка быгатӥм ке, лэсьтом -благотворительность но лэсьтыны мед быгатом шуыса та клубамы», — азьланезлы малпанъёссы сярысь вераса ватсаз Валентина Яковлева.

Элькунысь «Удмурт нылкышно кенеш» 2017-тӥ арез анайёслы сӥзьыны пуктӥз бере, шуркынмонэ Ува ёросын «Данъяськом тонэ, анай» бадӟым ужрад ортчытыны мылкыдзы вань.

Удмурт йылолъёсъя клубен валче ужаны мылкыд каремзэс веразы ёросысь ваньмыз сямен Лулчеберетъя юртъёс. Валентина Яковлева оскемзэ вераз, соослы юрттӥсьёс луозы ёрос админстраци но, ёросысь Йӧскалык лулчеберетъёсъя центр но.