Ува ёросын нырысьсэ ортчоз удмурт лулчеберетъя «Крезьгуро шыкысэ» нылпи фестиваль

    Ува ёросын нырысьсэ ортчоз удмурт лулчеберетъя «крезьгуро шыкысэ» нылпи фестиваль 1

    Ужрадэ 5-ысен 15 аресозь нылпиос пыриськыны быгато. Фестивалез радъясьлэн, Ува ёросысь удмурт калык кырӟанъя «Купанча» ансамбльлэн но «Шундысиос» нылпи коллективлэн кивалтӥсезлэн  Валентина Комиссаровалэн кылъёсызъя, «Крезьгуро шыкысэ» фестиваль пиналъёс пӧлын удмурт лулчеберетэз вӧлмытон но покчи усточиосты шараян вылысь радъяське.

    «Милям одӥг кулэлыкмы — удмурт лулчеберетэз ӝутыны, удмурт калыкез ыштытэк улыны. Пӧртэм нимъёс йыре лыктылӥзы, таиз борды мон дугдӥ — «Крезьгуро шыкысэ» шуыса. Именно со шыкысэ кыл мыным яраз. Шыкысын оломар но ватыса удмуртъёс возё вал ук. Отын (фестивальын — ред.) со вань быгатонлыкъёссы нылпиослэн, ватыса возем быгатонлыкъёссы, мед потозы», — шуэ Валентина Комиссарова.

    Со верамъя, Ува ёросын нылпи коллективъёс туж ичи, нош чылкак удмуртъёсыз, «Купанча» но «Шундысиос» сяна, воксё ӧвӧл. Озьы ик ёросын арганчиос уг тырмо, соин ик фестивалез трос ӧръёсъя — кылбур лыдӟон, кырӟан, крезьгуро инструментэн шудон, удмурт эктон но киуж — радъяны малпан кылдӥз.

    «Кырӟасьёс туж трос ӧвӧл, эктӥсьёс ваньгес ик ини, нош шудӥсьёсты адӟеммы ӧвӧл на. Тӥни соин сыӵе номинациез кутӥм. Киужъёсты но, весь киужъёс лэсьто ке, ӟуч пӧртэмгес луо ваньмыз. Нош татын гожтӥм «удмурт сямъёсты но формаосты лыдэ басьтыса», — шуэ Валентина Комиссарова.

    Ватсалом, «Крезьгуро шыкысэ» ёрос фестивале нылпи коллективъёс но нимаз пиналъёс пыриськыны быгато. Туннэ нуналлы 12 коллектив ужрадэ лыктыны мылкыдзэ вераз ни.

    https://udmurt.media/udm/news/kultura-i-turizm/35837/